The Definitive Guide to Living in the Capital , Cairo , Egypt

الست أمينة

الست أمينة: توصيل أكل بيتي لكل مكان في القاهرة

  • مدينة المعرج
  • مصري
  • 01002202644,01002202744
تم التقييم بواسطة
Waleed Abuarab
قيم
قيم الآن
الست أمينة: توصيل أكل بيتي لكل مكان في القاهرة
واضح أن فكرة المطبخ البيتي وتوصيل الأكل للمنازل أصبحت فكرة رائجة اليومين دول وعدد المطابخ من النوع ده بـ يزيد كل يوم. وبما أنها بـ تزيد فهي أكيد عليها إقبال وبـ تحقق مكاسب معقولة، وتفسيرنا للموضوع ده حاجتين: أولها عدم رغبة الناس في النزول كثير مؤخرًا، وثاني حاجة الاستسهال في العزومات بدل وقفة المطبخ والنتائج غير المضمونة. المهم إحنا اكتشفنا «مطبخ الست أمينة» من خلال صفحتهم على الفيسبوك  وتفرجنا على المنيو الشرقي المتكامل بتاعهم وعجبنا الأسعار قبل الأصناف، وقررنا نجربه في البيت.
المطبخ نفسه موجود في المعادي الجديدة وبالتحديد في مدينة المعراج، لكن مش هـ تحتاج العنوان في حاجة لأنه بـ يوصل الطلبات بس ولأي مكان في القاهرة، هـ تحتاج ساعة أو ساعتين قبل طلب الأوردر بتاعك وده حسب حجمه، لكن لو عزومة أو وليمة “كاترنج” هـ تحتاج 24 ساعة قبلها علشان تحدد طلباتك.

منيو كبير وهو موجود في صفحتهم على الفيسبوك فمش هـ نتكلم عليه كثير لأنكم تقدروا تشوفوه، لكن هـ نقول لكم على الأصناف اللي جربناها وحاولنا من خلالها نشوف جودة المطبخ وحرفية الست أمينة. جربنا دجاج رستو مدخن على صينية التورلي (60 جنيه) ودي كانت دجاجة كاملة مقطعة بطريقة الشيش ومش مخلية، طعمها وشكلها زي ما أي ست بيت شاطرة ممكن تعملها، والخضار تحتها بصلصة الطماطم والتوابل، وقبل أي حاجة شكل الطبق الفويل اللي وصلت لنا فيه بـ تدخن وريحتها تجنن تفتح النفس. طاجن فخار من السجق البلدي بـ 100 جنيه، فيه تقريبًا كيلو سجق مطبوخ بالصلصة والتسبيكة البيتي المعتبرة، لحم نظيف وفريش، لكن التوابل كانت قليلة شوية والسجق مش حراق زي المعتاد، بس مع الأرز بالشعرية (13 جنيه) والسلاطة الخضراء والطحينة (5 جنيه) هـ تعمل طبق محترم كأنك في عزومة أو غدوة بيتي كلاسيكية. الكميات في الطواجن والصواني معقولة جدًا، يعني لو طلبت أكثر من صنف بالأحجام الكبيرة ممكن تكفي من 5 لـ 6 أشخاص وكل واحد يملأ طبقه كأنه في بوفيه مفتوح ويأكل براحته. طبق محشي مشكل الست أمينة بـ 10 جنيه الحجم الصغير وفيه باذنجان وكوسة وفلفل محشي بالأرز واللحم المفروم، لذيذ بس الحبهان فيه كان مطحون وطعمه ظاهر قوي في الخلطة ودي حاجة مش ظريفة. السلاطات تجنن، وبعثوا لنا طبق بصارة بالتقلية هدية مع الوجبة وكان لذيذ بس مش زي ما محلات الأكل الشرقي الكبيرة بـ تعمله. والطلب بـ يوصل معاه حوالي 5 رغيف كبير عيش شامي، والتغليف وشكل التقديم كان أكثر من رائع ومحافظ على حرارة الأكل تمامًا ودي كانت أهم حاجة بالنسبة لنا في الطقس البارد ده، ومافيش أي سوائل اتدلقت من أي عبوة ودي حاجة تحسب لهم برضه.
طاجن صغير أم علي (12 جنيه) بالزبيب والمكسرات كان حلو ومخدوم كويس، الحقيقة تجربتنا مع «الست أمينة» كانت جيدة جدًا من حيث جودة الطعام ونظافته وكمياته والتوصيل في الميعاد المتفق عليه، بس مبلغ التوصيل (15 جنيه) كان زيادة شوية عن المكتوب في المنيو. والمبلغ بـ يختلف من منطقة لمنطقة وفيه حد أدنى للطلبات لكل منطقة كمان. بس عرفنا أن «الست أمينة» ممكن تبقى شريك يعتمد عليه في العزومات والحفلات، وأسعاره كويسة خاصة في الأعداد الكبيرة والكاترنج. ادخل خذ فكرة عن المنيو بتاعهم على الفيسبوك وقول لنا رأيك بعد ما تجربه.

نصيحة 360

تقريبًا مافيش حاجة مش موجودة، اتصل واحلم وهم هـ يحضروا لك الأوردر زي ما أنت عاوز حتى لو الحاجة المطلوبة مش في المنيو، الخدمة معانا كانت ممتازة.

أحسن حاجة

خدمة التوصيل والتغليف والمذاق البيتي "جدًا" للأكل.

أسوأ حاجة

لوجو الست أمينة؛ بـ يفكرنا بعلاء ولي الدين في فيلم الناظر "في دور الأم".

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح