The Definitive Guide to Living in the Capital , Cairo , Egypt

السيد – El Sid

السيد: مطعم أبو السيد للأكلات الشعبية بيقدم أكلات مصرية على السريع في الدقي

تم التقييم بواسطة
Ramy Soliman
قيم
قيم الآن
السيد: مطعم أبو السيد للأكلات الشعبية بيقدم أكلات مصرية على السريع في الدقي

أبو السيد من أهم رواد الأكلات المصرية في القاهرة اللي بيقدروا يحققوا كل أحلام عشاق الأكل البيتي، ودلوقتي بيقدم فكرة جديدة وهي "السيد". وهي فكرة مبتكرة من سلسلة المطاعم الشهيرة بتقدم أكلات مصرية على السريع في شارع مصدق الزحمة دائمًا.

أبو السيد زي ما كلنا عارفين يتميز بإضاءة خافتة وأثاث كلاسيكي وفواصل خشبية وصور قديمة لأبو السيد، أما السيد فشكله مختلف وبتشوف فيه تماثيل مبتكرة لأم كلثوم وعبد الحليم حافظ، ومخدات عليها صور لفريد الأطرش وهند رستم، وأخيرًا علب شوكولاتة بسكو مصر وسيما. الأجواء في السيد يغلب عليها طابع كاجوال مبهج بالألوان الحمراء والصفراء وعدد قليل من الكراسي وترابيزات متصلة بالحائط، وكل ده عمل الشكل المطلوب لمطعم "فاست فوود".

منيو "السيد" بيقدم أكلات من الشارع المصري، زي الشاورما والفول والطعمية والفطير، مع كلاسيكيات من المطبخ المصري زي الشركسية والمولوخية. بصراحة مقدرناش نقاوم وقررنا نجرب كل حاجة في المنيو، والبداية كانت مع فاتح للشهية وهو طبق ممبار (23 جنيه)، أما الأكلات الرئيسية فكانت كوبيبة في العوامة (38 جنيه) وساندوتش طنط فاهيتا (18 جنيه).

نبدأ كلامنا عن المقبلات ونقول إن شكل الممبار كان هايل ومتقطع لقطع صغيرة في كوباية، بس بالنسبة للطعم فكان متواضع. صحيح الممبار من بره كان مستوي كويس، بس الأرز كان ناشف والتتبيلة تقريبًا مش موجودة.

أما الكوبيبة في العوامة فكانت أحسن، وفيها كمية مناسبة من اللحم المفروم طعمها تحفة وتتبيلتها روعة الروعة. المشكلة إن الشركسية كانت سيئة، ورغم إن أبو السيد مشهور بصوص عين الجمل، لكن وقت زيارتنا الصوص كان خفيف جدًا ومفيش أي وجود للبهارات.

أما طنط فاهيتا، وده اخترناه عشان اسمه الجذاب، وهوعبارة عن فاهيتا فراخ في عيش فرنساوي طري فطعمه كان روعة وتتبيلة الفراخ ممتازة، بس الساندويتش عمومًا ناشف نوعًا ما لأن قطع الفراخ كانت صغيرة جدًا ومفيش أي صوص ينقذ الوضع.

خلصت أكلتنا مع فطيرة أم علي اللذيذة (33 جنيه)، والحقيقة أن فطير السيد مختلف عن شكل الفطير المعروف، لأنه على شكل البوريتو المكسيكي. وصلت طلبنا على شكل فطيرة رقيقة ملفوفة ومحشية كل مكونات أم علي زي عين الجمل والعجينة المنقوعة في اللبن، وأحلى حاجة كانت رشة جوز الهند اللي عملت طعم مميز. هو في أحلى من أم علي ملفوفة في فطيرة؟

عمومًا، الخدمة من مطعم بيقدم فاست فوود كانت زي توقعاتنا والأسعار تعتبر معقولة بالمقارنة مع التغليف الأنيق وكمية الأكل. طبعًا السيد أقل من مطعم أبو السيد الأصلي، وصحيح في حاجات في المنيو محتاجة تضبيط من ناحية الطعم والنكهة، لكن أجواء المكان وفكرة التيك آوت بشكل عام قدمت تجربة ممتازة.

نصيحة 360

مافيش مشكلة لو عايز تطلب مولوخية وتأكلها في بيتك، التغليف ممتاز.

أحسن حاجة

فكرة فطيرة أم علي تحفة.

أسوأ حاجة

صوص الشركسية كان متواضع.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح