The Definitive Guide to Living in the Capital , Cairo , Egypt

سهل جدًا لما مشروع جديد يبدأ يكون على القمة، علشان حماس البدايات بيكون حاضر وبقوة، واحنا لما اتعرفنا على “عبده الجزار” من 5 سنين كان محافظ على وجوده كمنافس للأكل المصري البلدي، وكمان كان فيه أكلات معينة بيتفوق فيها على أقوى المنافسين. لكن في زيارتنا الأخيرة الموضوع اختلف تمامًا والأكل والمنافسة بتوع زمان مبقوش موجودين.

خلال السطور الجاية هنقول لكم على تفاصيل زيارتنا الأخيرة لمطعم عبده الجزار في ساحل شبرا.

رغم أننا رحنا في وقت متأخر في المساء لكن مالقيناش ركنة بسهولة، واضطرينا نركن بعيد عن المكان، وده عيب موجود في المطعم من زمان، خاصة أن المطعم موجود وسط ورش وتجار ومافيش مساحة قريبة لأي ركنة للعربية، وعلشان كده بننصحكم تركنوا على الكورنيش أو شارع موازي له، ولما دخلنا المكان للأسف موظف الخدمة ماكنش في المود ومكشر وواضح عليه أن شغال بالعافية، وحتى اللي نزل لنا السلطة واللي بتدفع عليها إجباري للفرد 20 جنيه، كان بيرمي الأطباق مش بيحطها على الترابيزة، قررنا نكون إيجابيين وضحكنا وهزرنا معاهم علشان نلطف الجو.

بدأنا تجربتنا عند مطعم عبده الجزار بـ”شوربة حمام”، وكان سعرها 30 جنيه، وهي أعظم شوربة حمام ممكن تتاكل في مطعم، علشان بتجيلك بالبهاريز وكمان فيها قطعة من الحمام تنقنق فيها، وكمان جربنا طبق محشي مشكل وسعره 35 جنيه، وكان فيه “كرنب – ورق عنب – كوسة” وماكنوش أحسن حاجة للأسف، وكانوا ناشفين وكأنهم كانوا لازقين في الحلة، وطبق المحشي كان فيه كمان قطعة باذنجان واحدة، ودي كانت حلوة بالنسبة لمستوى باقي المحشي.

طلبنا موزة مشوية وسعرها 140 جنيه، وللأسف كانت مش كويسة خالص، سواء في التتبيلة أو في التسوية، ورغم اننا رجعناها مرة إلا أنها جت وهي ماختلفتش كتير في الطعم وللأسف سبناها وماكملنهاش.

طلبنا كمان من عندهم طاجن فريك باللحمة سعره 100 جنيه، الفريك ماكنش وحش ويتاكل، ولكن اللحمة ماعجبتناش خاصة أن ريحتها كانت تقيلة والسمين فيها كتير، ولو قارناها بمكان تاني متعودين أننا ناكل فريك من عنده هنطلب منهم ياخدوه قدوة في عمل الفريك.

تجربتنا ماكنتش أحسن حاجة ولكن نأمل أن مطعم عبده الجزار يرجع تاني زي زمان وينافس الكبار بطعامة أكل وحسن خدمته، وأكيد وقت ما ده يحصل هنجربهم تاني علشان نقول إنهم رجعوا وبقوا في قائمة أحسن المطاعم.

تقدروا تعرفوا أكتر عنهم من خلال صفحة الفيسبوك من هنا.