The Definitive Guide to Living in the Capital , Cairo , Egypt

مطاعم
بركة – Baraka

بركة: زيارة جديدة لمطعم الشاورما في الزمالك

  • 9 شارع البرازيل
  • مأكولات سريعة
  • 9 صباحًا - 2 صباحًا -
تم التقييم بواسطة
Aliaa Serry
قيم
قيم الآن
بركة: زيارة جديدة لمطعم الشاورما في الزمالك

حياتنا الصعبة في القاهرة اللي كلها زحمة ساعات بـ تجبرنا نعمل كل حاجة بسرعة من غير وقت كافي نستمتع فيه بأكلنا، من هنا كانت فكرة مطاعم التيك أواي والتوصيل اللي بـ تنقذ يومنا من الضياع، بحيث نقدر نأكل حاجة على الماشي وإحنا بـ نخلّص مصالحنا.

بركة يعتبر من أشهر معالم الزمالك وتحديدًا في شارع البرازيل، وأعتقد صعب يفوتك بيافطته الضخمة وشعاره من اللون البرتقالي والنبيتي المميز. مافيش في المحل أي أماكن للأكل، وفكرته ببساطة أنك تدفع ثمن الأكل، تستنى طلبك يخلص وتأكله في أي مكان ثاني.

ندخل على وصف منيو بركة، المنيو متقسمة قسمين رئيسيين: ساندويتشات لحم، ودي تشمل ستيك بالجبنة (22: 26 جنيه)، فاهيتا لحم (18: 22 جنيه) وكفتة بلدي (14: 18 جنيه)، وساندويتشات فراخ تشمل طاووق (16: 20 جنيه)، فراخ موتزاريلا (18: 22 جنيه) وكبد فراخ (12: 15 جنيه)، والأحجام الموجودة وسط أو كبير. لو حبيت تطلب كومبو زود 9 جنيه على سعر الساندويتش.

علشان نكون في المضمون، طلبنا ساندويتشين شارومة فراخ (18 جنيه للواحد) وساندويتشين شاورمة لحم (18 جنيه للواحد)، ويكونوا كلهم في عيش سوري. بعد ما دفعنا، سلمنا الطلب لشيف ودود، ووصلتنا الساندويتشات الساخنة بعد حوالي 10 دقائق.

الساندويتشات الملفوفة كويس كانت طازجة وسخنة مولعة، والعيش السوري كان مقرمش وطعمه رائع. صحيح حجم الساندويتشين سواء كانوا لحم أو فراخ كان أقرب للوسط من الكبير، بس الحق يتقال كانوا مليانين حشو يشمل طماطم ومخلل، مع قطع الشاورمة، رغم كده، الاثنين كان ينقصهم كمية كافية من الصوص، يعني الشاورمة فراخ كانت محتاجة ثومية زيادة واللحم محتاجة شوية طحينة.

الملخص، بركة يعتبر مكان ممتاز لأكلة سريعة ع الماشي، الساندويتشات كانت لذيذة مافيش كلام، بس لو التانك فاضي وواقع من الجوع، هات لك ساندويتشين علشان ساندويتش واحد مش كبير لدرجة أنه يشبعك.

نصيحة 360

بركة بـ يوصل للدقي، جاردن سيتي، وسط البلد، المهندسين، الزمالك والعجوزة.

أحسن حاجة

العيش السوري المقرمش كان تحفة وحشو الساندويتشات كان لذيذ.

أسوأ حاجة

فين الطحينة والثومية يا جماعة؟

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح