The Definitive Guide to Living in the Capital , Cairo , Egypt

مطاعم
Blue El marakby – بلو المراكبي

بلو المراكبي: أكلة سمك مظبوطة بأحسن سعر في كورت يارد الشيخ زايد

أكلة الشيخ زايد بلو المراكبي جمبري رز سمك طاجن كورت يارد مطعم ملوخية
  • الحي الـ 12، مول كورت يارد، الشيخ زايد
تم التقييم بواسطة
Angie El Batrawy
قيم
قيم الآن
بلو المراكبي: أكلة سمك مظبوطة بأحسن سعر في كورت يارد الشيخ زايد

أحيانًا ترشيحات الأصدقاء لمطعم من المطاعم، إما بتكون في الجون، أو بتطلع مقلب. واللي بيشجع كمان أنك تروح المكان ده لما بتشوف صور للأكل أو الديكور أو الموود العام بتاعه. ده اللي حصل في تجربتنا مع بلو المراكبي (Blue El Mrakby)، في مجمع مطاعم ذا كورت يارد في الشيخ زايد.

مجمع The Courtyard موجود جنب كومبوند ذا أدريس، في الشيخ زايد في الحي الـ 12. المكان مش حيوي أوي لأنه لسه جديد، واللي فاتح هناك 4 مطاعم بس، لكنه مكان لطيف وهادي. المطعم عبارة عن 3 أدوار. الدور الأرضي قعدته بره، ومحاط بمشمع قوي علشان الهوا في الشتاء. المكان بيغلب عليه اللونين الأزرق والأبيض، ودي حاجة مريحة نفسيًا وفي نفس الوقت شيك. الجرسونات هناك قمة في الذوق ومتعاونين جدًا. حتى عددنا كان كبير ومعانا أطفال، قعدوهم على ترابيزة منفصلة وجابوا لهم ألوان ورسومات، علشان يشغلوهم عقبال ما الأكل يجهز.

المنيو متنوعة جدًا. طبعًا غير أنواع السمك والجمبري اللي بتختارهم بنفسك من حلقة السمك. عندهم كذا نوع شوربة، سي فوود وشوربة جمبري. وكمان قسم الطواجن فيه أنواع مختلفة، منها اللي شدنا لسان عصفور بالسي فوود، وطاجن فريك بالجمبري. وفيه الأرز بأنواعه: صيادية، أرز سي فوود، أرز بالجمبري. المكرونة نوع واحد بس بالسي فوود، وانت بتختار الصوص أبيض ولا أحمر. الجديد بقى أنهم كمان بيعملوا كبدة بانيه ومخ بانيه، وممكن تاخدهم “مشكل” من الاتنين. ده غير الساندويتشات والمشروبات والسلاطات.

طلبنا بعد تفكير طويل سمكة بوري (الكيلو بـ 100 جنيه) تتعمل زيت وليمون. وكمان طاجن سي فوود باور (85 جنيه)، مكون من: جمبري وسبيط وقطع سمك فيليه وكريمة، مع فلفل ألوان وبصل، عليهم جبنة موتزاريلا. وأرز صيادية (18 جنيه). من السلاطات اختارنا سلاطة بلدي (20 جنيه)، وبابا غنوج (20 جنيه)، وباذنجان مخلل (15 جنيه).

بعد كده نزلت السلاطات والشوربة وسلة، عيش بلدي (فيها عيش طري ومحمص)، وكمان نزلوا لنا ملوخية بالجمبري كمجاملة. وكانت لفتة حلوة من المكان.

نخش بقى في التفاصيل المهمة.. الأكل خد حوالي نص ساعة تجهيز، زي ما قالوا لنا. ريحة الأكل لوحدها كانت علامة أننا داخلين على تجربة عظيمة. السمكة البوري كانت عظيمة، تسوية السمك ممتازة ومش مزفرة (ناشفة زي ما طلبنا). طعمها نفسه بالتتبيلة اللي عليها كان مضبوط. الأرز الصيادية لما جالنا كان شكله عالمي، الأرز مخدوم في التسوية ولونه بني غامق وبيلمع، من أحلى الأرز الصيادية اللي ذقناه في حياتنا. وكان فيه إجماع من الناس كلها على ده. الملوخية كانت حادقة شوية صغيرة، بس كانت حلوة. البرنس الكبير بقى كان الطاجن، أولاً حجمه كبير ممكن يكفي شخصين، زائد إن كمية السي فوود اللي فيه رهيبة بالنسبة لسعره. وتسوية الأكل رائعة وطعمه كمان. كان نفسنا بس الكريمة قوامها يتقل شوية، علشان كانت المكونات كأنها في مياه كريمة. كنا محتاجين نحس أن المكونات متماسكة سوا في قوام واحد. وطبعًا السلاطات مافيش كلام عليها، ممتازة زي الأكل.

بعد ما خلصنا أكل طلبنا ليمون (25 جنيه). كان خفيف ومنعش وسكره مضبوط. فيه ناس طلبت ساندويتشات تيك أواي معاها وهي ماشية. كلنا كنا مبسوطين والجرسونات هناك كانوا مهتمين يعرفوا رأينا واقتراحاتنا. ممكن تعرفوا أكتر عن المكان من صفحتهم على فيسبوك، بس خلوا بالكم هتجوعوا لما تشوفوا الصور.

نصيحة 360

بلو المراكبي عاملين خصم 15% على المأكولات فقط داخل المطعم والتيك أواى والديليفري بمناسبة الأعياد.

أحسن حاجة

أكل مخدوم وبسعر معقول وخدمة ممتازة.. مش محتاجين حاجة تاني.

أسوأ حاجة

قوام الكريمة في الطاجن كان محتاج يبقى أتقل.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح