The Definitive Guide to Living in the Capital , Cairo , Egypt

بوتري كافيه – Pottery Cafe

بوتري كافيه: مطعم بديكور وأكل هائل فى تيفولي دوم زايد

تم التقييم بواسطة
Angie El Batrawy
قيم
قيم الآن
بوتري كافيه: مطعم بديكور وأكل هائل فى تيفولي دوم زايد
ده مش انبهار لأول مرة، ده عن سابق تجربة فى فروع كثيرة آخرها كان فى المعادي، ولكن لأننا بـ نحبه وكمان بـ نحب المكان اللى إحنا رايحينه فكان لازم نشوف هل المكان بنفس قوته ولا لأ.. من الآخر إحنا بـ نتكلم عن “بوتري كافيه”.
المكان رغم أن اسمه “كافيه” لكن طبيعة الأطباق اللى بـ يقدمها تعطي له طابع المطعم، فى فرع تيفولى زايد هـ تدخل من باب صغير فى الدور اللى تحت وهـ تطلع كام سلمة علشان توصل للدور اللى فوق اللى بـ يطل على منظر أكثر من رائع للـ Dome كلها بالزرع والنافورات وحتى بوابة الدخول.

قعدنا فى مكان بـ يطل على المنظر الجميل ده، الديكورات ألوانها مبهجة سواء فى وحدات الإضاءة أو الكنب، المنيوهات فيه منها بالعربي وفيه بالإنجليزي، ومقسمة التقسيم العادي لأى منيو لكنها مدعمة بصور رائعة تفتح النفس ووصف لكل طبق، أخذنا من السلاطات بوتري شيف سلاد (40 جنيه) اللى كان حجمها كبير جدًا ومكوناتها رائعة وطازجة واستمتعنا بكل ما فيها، العيب الوحيد أنها جاءت بعد مدة طويلة على الرغم أن مكوناتها غير معقدة ومش محتاجة تجهيز كبير.

الهواء هناك كان منعش بطريقة مش طبيعية، على الرغم أن الجو كان حر يومها فى القاهرة بس إحنا مش عارفين سر الطراوة اللى فى المكان ده (اللهم لا حسد)، بعدها بشوية جاء لنا من الأطباق الرئيسية طلبنا من سي فوود باستا (55 جنيه) فيها جمبري وكاليماري وجاندوفلى إلى جانب أننا طلبنا الباستا بنا بالصوص الأبيض، كانت رائعة وكميتها ضخمة بس لازم تغطس فى الطبق وتقلبه كويس علشان تشوف السي فوود اللى مستخبي تحت، طلبنا كمان سبايس شريمب أند تشيكن (55 جنيه) وده برضه من أطباق الباستا (بنا وطلبناها بدون سبايسي) وكمان أضفنا عليها ريحان (5 جنيه)، ما تتخيرش عن اللى قبلها فى الطعم والتحضير والكمية.

ختام الأطباق الرئيسية بيف فيليه (75 جنيه) طلبناه Well done وبـ ينزل معاه طلبين اختارناهم بطاطس بيوريه وخضار سوتيه، الطبق كان فوق الممتاز ماعدا البيف كان عاوز يستوي شوية زيادة كمان لأن اللحم كان بـ يشد فى التقطيع، الخضار طازج وتحفة وبرضه الكميات كبيرة مع البطاطس البيوريه اللى كان مبشور عليها جبنة رقيقة.
جاء وقت المنعشات والمفرفشات.. يعني المشروبات، بوتري عندهم عصائر فريش وكوكتيلات فريش برضه، وميلك شيك وفرابيه ومشروبات ساخنة كمان، طلبنا بوتري أمازون (22 جنيه) مكون من خوخ وكيوي وأناناس، فى الأول ما تخيلناش طعمه لكن بمجرد ما ذقناه وقعنا فى  غرامه، مذاذة كل فاكهة من دول أضافت حلاوة مختلفة للعصير خلتنا نحبه، ولأن بعض أصدقائنا كانت أطماعهم وعيونهم كانت على الحلويات اشتركنا كلنا (لأن ما كانش فيه مكان فى بطننا) في بوتري مادنيس (25 جنيه) اللى واخدة نفس طابع “الأوريو مادنيس” الشهير وبـ يكون عليه صوص شوكولاتة وكمان كراميل.. من الآخر ما اتسابش فتفوتة منه فى الطبق.. اتمسح، وبعدها كان لازم نجيب زجاجة مياه صغيرة (7 جنيه) علشان نروي عطشنا ونسد كمية الأكل الهائل اللى أشبعنا ده.

لو عاوزين تعرفوا أكثر عن طبيعة المكان والمنيو ادخلوا على صفحة بوتري كافيه على الفيسبوك، نوعدكم بالانبساط.. مش هـ تندموا.

نصيحة 360

المكان بـ يقدم شيشة، وفيه منيو منفصلة صغيرة على كل ترابيزة فيها سعر كل نكهة شيشة وأنواعها وكمان اللى الطبي والعادي.

أحسن حاجة

كل حاجة.

أسوأ حاجة

البيف كان محتاج تسوية زيادة بس.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح