-
داندي مول - المدخل الرئيسي - محل رقم 10 - طريق مصر إسكندرية الصحراوي
-
لبناني
-
Angie El Batrawy
مافيش مكان في داندي مول إلا لما
تلاقى فيه إما كافيه أو مطعم أو كاونتر صغير في طرقات المول بـ يعمل وافلز أو
كريب، ومن المطاعم اللي وقفتنا – خاصة لما قرأنا جملة “أكلات من الشرق الأوسط”- مطعم «بيبلوس – BYBLUS».
وإحنا واقفين محتارين لقينا
الجرسون بـ يرحب بنا وبـ يعرض خدماته فـ سألناه يعني إيه أكلات
من الشرق الأوسط فـ قال لنا بـ يبقى كذا مطبخ من كذا بلد يعني لبنانى وإيطالي
وكده.. فـ تحمسنا وقلنا نجرب، لكن الفكرة أننا لما شفنا المنيو لقيناها عادية شوية
ما حسيناش بحاجة مخصوصة بالمكان أو بطبيعة المطعم، غالبًا الجرسون غلطان مش عارفين. لأن اللى عرفناه أن “بيبلوس” هو الاسم اليوناني
للمدينة الفينيقية “جبال” ودي مدينة في جبل لبنان وتعتبر من أقدم وأحلى
المدن في العالم، وبالتالى هو مرتبط أكثر بلبنان!
المكان والقعدة كويسة مقفولة
ومحاطة بمشمع أكيد علشان الشتاء لأن المطعم موجود فى المنطقة الخارجية قبل ما تدخل
كارفور والمول نفسه، وعامة أغلب المطاعم اللي بره حاطة المشمع ده لأن المول موفرة
لهم، الكنب والكراسي بـ يغلب عليها اللون الأبيض والبني والقعدات قريبة قوي من
بعضها وفيه شاشات تليفزيون كانت مشغلة ماتش كرة.
المكان بـ يقدم شيشة، وعلى الرغم
أن المكان شكله لطيف والجرسونات متعاونة وكويسة المنيو كانت عكس كده خالص، شكلها
وحش جدًا ورديئة وكان فيها صفحات مقطعة ودى ما كانتش واجهة كويسة للمطعم خالص. مقسمة
لجزءين عربي وإنجليزي وهـ تلاقي فيها مزات، ومناقيش (زعتر وجبنة وسجق)، ساندويتشات،
وبيتزا، وباستا، وركن الأرز (بالخلطة والكبدة) وفتة شاورمة، وأطباق رئيسية، والستيك،
والحلو، وجزء لأكلات الأطفال وجزء كمان للمشروبات الساخنة والباردة.
جربنا فى البداية كفاتح شهية سلطة
الفتوش (18.95 جنيه) وكانت حلوة جدًا والخضروات صابحة والعيش الناشف المقرمش اللى
فيها كان حلو قوي، وبعدها نقلنا على الأطباق الرئيسية، جربنا حاجتين مختلفتين بما
أنه مطبخ متنوع، اختارنا بيف فيليه (74.95 جنيه) وكان اللحم مستوي حلو قوي والصوص
بتاعه كمان وأخذنا معاه بطاطس وخضار سوتيه، والحقيقة طعامة الأكل مافيهاش كلام،
والخضار برضه كان طازج والبطاطس كويسة.
ثالث مطبخ عالمى جربناه كان
الإيطالى، طلبنا تشيكن باربيكيو بيتزا (29.95 جنيه) وكانت حلوة جدًا واللي خلانا
مبسوطين جدًا أنهم كانوا حاطين جبنة موتزاريلا بزمة وكانت كثيرة قوي وإحنا بـ نحبها
كده.
بعد ما استريحنا شوية وقعدنا
نتفرج على الماتش طلبنا مشروب أوريو شيك (16.95 جنيه) لكن كان عادي حلو لكن فيه
اللى أحلى منه ذقناه قبل كده فى أماكن ثانية، ودخلنا على الثقيل كمان بقى.. أم على
(24.95 جنيه) كانت رهيبة حلوة جدًا وضخمة وجبة لوحدها مش هـ تقدر تكملها لكن اللى
أفسد علينا حلاوتها أنهم قالوا لنا أن المكسرات بـ تيجي منفصلة مع الطبق لكن لما
جاءت لنا ما كانش فيه مكسرات، وفكرنا الجرسون أنهم نسيوها فـ قال لنا أنه هـ
يجييبها.. لكن لا حياة لمن تنادي! برضه ما جاتش.
على الطلب بتاعك بـ يتم إضافة
خدمة لكن مافيش ضريبة ومافيش حد أدنى للطلبات لكن بـ يضاف كمان Cover (7.95 جنيه). “بيبلوس” فتح ما بقالوش 4 شهور في داندي مول، لكن له فروع ثانية فى ميدان لبنان ومول العرب،
المطعم كاتب شعار على المنيو بـ يقول: “The love of serving” ده كان موجود بالفعل لكن
للأسف موقف المكسرات ساب عندنا انطباع سيء وإحنا ماشيين، لكن نتمنى أنه ما يتكررش
ثاني في زيارتنا القادمة.