The Definitive Guide to Living in the Capital , Cairo , Egypt

بيسترو رووج – Bistro Rouge

بيسترو رووج: مطبخ لبناني وقعدة كلاسيكية في المعادي

  • 29 شارع 257
  • لبناني
  • 0225200343,0225164145,0225164218
  • 12 ظهراً - 1 صباحاً
تم التقييم بواسطة
Waleed Abuarab
قيم
قيم الآن
بيسترو رووج: مطبخ لبناني وقعدة كلاسيكية في المعادي

فكرة المطعم اللي داخل مطعم ميزة وعيب، ميزة أنك ممكن تروح مع مجموعة ناوية تأكل من مطبخ معين “إيطالي مثلًا” وأنت مش عاوز تأكل منه فـ تلاقي نفس المكان فيه منيو مختلف لمطبخ مصري مثلًا فـ تطلب محشي وملوخية، والكل ينبسط، أما العيب أن مش كل الناس بـ تأخذ بالها أن المطعم ده فيه مطبخ ثاني جوه بمنيو مختلف واسم مختلف ولازم تبقى من رواد المكان الدائمين علشان تعرف معلومة زي دي، أو تقف أمام الباب وتدقق زي ما إحنا بـ نعمل لحد ما تشوف يافطة صغيرة عليها الاسم الثاني للمطعم وتكتشف أن دول مكانين مش مكان واحد. وده اللي حصل لما عدينا أمام مطعم «بكين» الشهير للأكلات الصينية في فرع المعادي، واكتشفنا يافطة صغيرة باللون الأحمر مكتوب عليها «بيسترو رووج – Bistro Rouge» وعرفنا أن ده مطعم لبناني موجود داخل المطعم الصيني، نفس القعدة ونفس الجرسونات ونفس لكن المنيو مختلف، منيو «بيسترو رووج» مستقل بذاته وفيه أكلات لبنانية وبس.

لو كنت عارف قعدة «بكين» وشياكتها يبقى إحنا مش محتاجين نتكلم عن القعدة هنا، لكن لو مش عارف بـ نقول لك أن هنا واحدة من أرقى القعدات في المعادي، أضواء هادئة وشموع على الترابيزة وستائر حمراء وترابيزات خشبية كبيرة ومزيكا كلاسيكية وجرسون بالملابس الرسمية، مكان مناسب لخروجة رومانسية جدًا أو عشاء عمل أو حتى أكلة صينية مش هـ تلاقيها في أي حتة وتحب تقعد تنأنأ فيها لوحدك في أجواء شاعرية لذيذة. الحقيقة حبينا القعدة داخل المكان ومستوى الخدمة الجيد جدًا وما كانش فاضل غير أن الأكل يطلع حلو، ولأننا عارفين مستوى مطبخ «بكين» الرائع، ما كناش قلقانين قوي من الموضوع ده.

بدأ بمقبلات عبارة عن بان كيك بشرائح البط الباردة (51 جنيه) كانت لذيذة وتتبيلة البط كانت بسيطة لكن ما خلتش للحم البط الدسم أي رائحة مش مرغوب فيها، واستمتعنا بالطبق مع صوصات الصويا الحلوة والباربكيو الحار، طبق جانبي ممتاز ويفتح النفس. ومن منيو «بيسترو رووج» طبق مشويات على الطريقة اللبنانية (83 جنيه) فيه قطع كباب وكفتة وشيش طاووق وشرائح فلفل رومي وطماطم مشوية، بـ يُقدم مع الأرز الأبيض أو البطاطس المحمرة، كان أكثر من رائع والتسوية ممتازة والكمية قليلة شوية في الطبق لكن المذاق الحلو بـ يخليك ما تركزش في الموضوع ده، لكن لفت نظرنا أن مافيش عيش بـ يُقدم مع المشويات! ولولا أننا طلبنا طبق البان كيك اللي كان معاه رقائق عيش أبيض، كنا اضطرينا نأكل المشويات بالشوكة والسكينة مع البطاطس.

منيو بيسترو فيه مناقيش وشوية شاورما وشيش طاووق وبيتزا، حبينا نكسر القاعدة ونبعد عن الشاورما واللحوم بعد ما جربنا الميكس جريل وكان كويس، وجربنا بيتزا السي فوود (63 جنيه) من منيو البيتزا المتنوع الموجود عند «بيسترو رووج» وعلى غير العادة في المطاعم اللبنانية. البيتزا كانت كبيرة تكفي أكثر من فرد، رقيقة ومليانة موتزاريلا ومتغطية بكمية كبيرة من الكاليماري والجمبري من الحجم الكبير، ملحها قليل والتوابل عمومًا كانت قليلة، بس ده كان كويس علشان تزود الملح حسب رغبتك، لكن التسوية والخبيز على الطريقة الإيطالية المتميزة كانت مفاجأة، تقريبًا ده ثالث مطبخ متخصص نلاقيه في المكان ده.

تجربتنا في «بيسترو رووج» كانت حلوة مافيش كلام، وبـ بـ نلوم عليهم بس عدم وضوح المكان بشكل كافي، وبـ نتمنى أننا نشوفه مطعم مستقل قريب خارج جدران «بكين» العظيم.

نصيحة 360

هنا أسعار الأطباق بـ تشمل الضريبة والخدمة.

أحسن حاجة

جودة الطعام والقعدة الراقية والخدمة المتميزة.

أسوأ حاجة

المنيو اللبناني ناقصه حاجات كثير لبنانية.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح