The Definitive Guide to Living in the Capital , Cairo , Egypt

بيسترو زيتونة اللبناني – Zeitouna Lebanese Bistro

بيسترو زيتونة اللبنانى: لبنان فى طبق من التميز فى نايل سيتي تاورز

  • نايل سيتي تاورز - كورنيش النيل
  • لبناني
  • 0224619944
  • 9 ص: منتصف الليل
تم التقييم بواسطة
Angie El Batrawy
قيم
قيم الآن
بيسترو زيتونة اللبنانى: لبنان فى طبق من التميز فى نايل سيتي تاورز

لما «بيسترو زيتونة اللبنانى» فتح
أول مطعم له فى نايل سيتي تاورز على كورنيش النيل كان بـ يقول فى الدعايا بتاعته
أن مكونات الأطباق قادمة مباشرة من أرض لبنان علشان تُقدم للذواقة فى مصر لدرجة
أنك مش هـ تحتاج تحجز تذكرة للبنان.. وبالفعل ده كان إحساسنا لما زرنا المكان
وعشنا تجربة متميزة هناك.

المكان بـ يغلب عليه لون بنفسجي
محبب بشكل أساسي مع البيج والبني، طاقم العمل ودود جدًا ومتعاون، فيه منطقتين
للجلوس: للمدخنين وغير المدخنين، منيو المكان فيه قائمة أفطار بـ تُقدم من الساعة
9 صباحًا فيها جزء للفخارات زي فخارة البيض (29 جنيه) وحلومى مشوي (26 جنيه)، ولبنة
(23 جنيه)، وفخارة فلافل (24 جنيه)، وفول مدمس (28 جنيه)، وفيتانكليش (22 جنيه)
وده عبارة عن جبن فيتا أبيض بالبصل والطماطم والزعتر اللبنانى وزيت الزيتون البكر،
وفطائر السبانخ (28 جنيه).  

فيه كمان قائمة المناقيش فيها
أكثر من 10 أصناف بـ تتراوح أسعارها من 9 إلى 28 جنيه، وممكن تضيف خضروات بـ 5
جنيه، وفيه ساندويتشات، و3 أنواع شوربة: الخضار مع كرات اللحم والخضار والعدس،
وقسم للسلاطات، والمزات فيها أكثر من 20 صنف، وركن الأطفال فيه ميني طاووق ومينى
كفتة وباستا وتشكيلة (ميني بيتزا، موتزاريلا ستيك، بطاطس مقلية، كاتشب)، والمشاوي،
وحلويات وعصائر، ومشروبات باردة وساخنة وشيشة (30 جنيه) بـ 9 أصناف.

شكل الأطباق والأصناف فى جروبهم على الفيسبوك مغري
جدًا وده شجعنا أننا نطلب كذا حاجة هناك، نزل لنا سبت عيش متنوع، وطلبنا فى المزات
سمبوسك لحمة (28 جنيه) وبابا غنوج (23 جنيه) وورق عنب (28 جنيه)، والسلاطات فتوش
(حجم صغير 24 جنيه، والكبير بـ 39 جنيه)، وفى الشوربات جربنا شوربة الخضروات (21
جنيه) وشوربة عدس (22 جنيه)، وفى الأطباق الرئيسية اختارنا كفتة (61 جنيه)،
وشاورما لحمة.

إيه التقديم المبتكر ده؟.. ده كان
التعليق اللى على لساننا لما شفنا الأطباق على الترابيزة، ورق العنب محطوط فوق بعض
زي الحزمة مع التزيين، والشوربة محطوطة فى فخار وشكلها شهي جدًا وفيها عيش مقرمش
طويل ورقيق على شكل ملعقة.

سمبوسك اللحم رائع، اللحم مستوي
كويس ومتوسط ومش محروق، البابا غنوج كان محطوط فوقه كتزيين قطع تين مجفف كانت
غريبة لكن طعمه جامد، الشوربتين كانوا خرافة، العدس كان قوامها مضبوط ولا ثقيل قوي
ولا خفيف وكانت النكهة قوية جدًا، والخضار كمان طازج جدًا وفيه قطع فراخ مقطعة
صغيرة، ورق العنب كان الأرز فيه مستوي كويس وبـ يلمع وكان مغري جدًا، ونفس الشيء
الفتوش. الكفتة والشاورما اللحمة أكلناهم بأنفنا وعيوننا قبل ما يدخلوا فمنا،
الطبق بـ ينزل معاه طماطم مشوية وكوسة وباذنجان مشوي وكمان ذرة حلوة.. الكمية
كبيرة لكننا خلصناها من طعامتها وحرفية صنعها.

من المشروبات طلبنا ليمون بماء
الورد (17 جنيه)، فكرة المزج بين الليمون وماء الورد كانت قوية، لأن ماء الورد بـ
يشيل اللذاعة اللى فى الليمون وكمان الطعم النهائي كان خرافى، من مبتكرات
“زيتونة” كمان الآيس كريم بنكهاته فى قسم التحلية، ممكن تختار من 4
نكهات جديدة للآيس كريم (24 جنيه) هى: حلاوة وسحلب وأم على وفانيليا، اختارنا أم
على والفانيليا وكانت مبتكرة، أم على حسينا أنه محتاج يكون أقرب شوية للطعم، لكن
الفكرة نفسها تستحق الإشادة، كمان جربنا عثمانلية (27 جنيه) وهى عبارة عن كنافة
بالقشطة والعسل، الطعم كان جامد جدًا بس العسل كان كثير شوية والكنافة ما كانتش
متماسكة فكان صعب أكلها شوية، لكن طعمها خلانا ما نركزش مع النقط دي.

“بيسترو زيتونة
اللبنانى” قدر يتميز خلال سنة وكام شهر بين المطاعم اللبنانية الأصيلة، لو
عاوز تزور لبنان من غير ما تدفع تذكرة روح هناك وذوق أكل من بتاع بلاده –زي ما بـ
يقولوا- وعيش تجربة من الابتكار والتميز.

نصيحة 360

موقعهم على الإنترنت لسه مش شغال، لو عاوزين تعرفوا أى معلومات أو تتابعوا أخبارهم تابعوا جروب الفيسبوك.

أحسن حاجة

الابتكار والتقديم فى الأطباق.. مبهر.

أسوأ حاجة

كنافة العثملية محتاجة تمسك فى بعضها شوية.. بس هي حلوة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح