The Definitive Guide to Living in the Capital , Cairo , Egypt

مطاعم
تابلا لونا – Tabla Luna

تابلا لونا: الأكل اللاتيني على أصوله في المعادي

  • 41 شارع 218
  • عالمي
  • 5 مساءً - 11:30 مساءً -
تم التقييم بواسطة
Nagla Ashraf
قيم
قيم الآن
تابلا لونا: الأكل اللاتيني على أصوله في المعادي

من المطابخ القليلة في القاهرة المطبخ اللاتيني وممكن مش كل الناس بتحب تجربه، بس الأكيد أن تابلا لونا – Tabla Luna على مدار السنين تميز على نفسه وقدم مستوى لا يُعلى عليه سواء في جودة وطعامة الأكل أو الخدمة على مدار السنين اللي فاتت.

المكان في المعادي صغير مش كبير حوالي 6 ترابيزات، منهم واحدة بس الكبيرة تكفي 10 أفراد، والباقي صغيرين، وسط الكراسي الملونة هتلاقوا المنيو متعلقة على سبورة بالألوان وممكن تسألوا الجرسون على أي حاجة عاوزين تفهموها. أول ما بتبص في المنيو بتبدأ رحلتك لأعماق المطبخ اللاتيني اللي هيخطفك من كل الأكلات اللي عرفتها في حياتك ويسيبك مذهول عاوز تجرب كل الأنواع المختلفة.

وصل لنا  ترحيب من المكان ببعض قطع التورتيلا  الصغيرة الخضراء والحمراء المشطشطة، ومعها صوص حار شيلي وصوص أخضر يجنن مش عارفين هو مكون من إيه بالظبط، وصوص رانش بالمايونيز والثوم.

بعد كده طلبنا شيلي ناتشوز (72 جنيه). وكانت مقرمشة وسخنة وتحفة ومليانة مكونات مختلفة مع الناتشوز، غير اللحمة المفرومة من درة وفلفل ألوان وزيتون وجبنة. لحسن حظنا إن عددنا كان كبير في زيارتنا للمكان فقدرنا إننا ندوق أكتر من حاجة مختلفة وننقل تجربتنا في المكان بحيادية.

طلبنا كمان  chicken enchiladas بـ 88 جنيه ودي بتكون شبه الكانيلوني شوية بس طعمها مختلف صلصة أقل وجواها دجاج وفلفل ألوان وذرة ومتغرقة بالجبنة من فوق مع صلصة الطماطم وكان طعمها مختلف عن الكانيلوني بنكهات لاتينية وحجمها أعرض وبيقدم 2 جنب بعض في طاجن فخار كبير. وزيها بالظبط الـ Beef Enchiladas بـ 105 جنيه، نفس المكونات بس ممكن جبنة أكتر شوية من بره لكن الفرق إن قطع اللحم أكبر ومستوية على الآخر مش طرية.

وبرغم أن ريحة الأكل كانت كفيلة إنها تشبعنا وتخلينا في عالم تاني إلا أنها  مامنعتناش نجرب Lomo Saltado بـ 130 جنيه، واللي كان عبارة عن قطع لحم مقطعة بالبصل والجزر وبيقدم معاها أرز وبطاطس، ممكن قطع اللحم كانت مستوية زيادة عن اللزوم بس نكهة اللحم كانت أشبه باللحمة المتشوحة مع البصل والطماطم والليمون وممكن حبة صويا صوص تدخلك عالم أمريكا اللاتينية.

أما ملك أطباق اليوم فكان Duck au papaya بـ 140 جنيه، وده مهما نوصفه مش هنعطيه حقه، أولًا من الصعب جدًا أنك تطبخ بط من غير ما يكون ني أو مستوي زيادة عن اللزوم وحقيقي أنبهرنا وفرحنا جدًا من درجة استواء البط اللي كان مستوي لدرجة أنه بيدوب في فمك، وقطع البط كانت مرصوصة على قطع تورتيلا شاربة الصوص البرتقالي اللي كان مزيج من الليمون والتفاح والسكر مع شرائح تفاح وبطاطا مقلية وبصل أخضر وباقي الصوص اللي أكيد فيه مكونات تانية مانعرفهاش بس حسينا بيها زي حبة برتقال مع التفاح أو ترياكي صوص مش قادرين نحدد بالظبط، بس أجمل حاجة بالنسبة لنا كانت قطع التفاح اللي على جنب اللي خلتنا نفضل مستمتعين بالطبق لآخر لحظة، الطبق ده من أجمل الأطباق اللي جربناها مؤخرًا وأكيد هتعجب أي حد من عشاق الأكل الـ sweet and sour  زينا.

ماقدرناش نقاوم جمال الحلو خاصة بعد ما عرفناه  La Bomba بـ 65 جنيه، ودي chocolate bomb عبارة عن كورة من الشوكولاتة جواه آيس كريم فانيليا وبيتصب عليها صوص كراميل سخن يدوب الشوكولاتة ويدخلك لمنطقة تانية من النعيم، خاصة إن الشوكولاتة خداعة أول ما تلمس فمك بتكون عادية ومسكرة لكن في الآخر طعم الشطة بينشطك ويخليك عاوز تاكل آيس كريم بسرعة، ودي كانت مغامرة لوحدها. للأسف ماكنش فيه غير مشروبات غازية في المكان وكنا نتمنى فعلًا إننا نجرب مشروبات من أمريكا اللاتينية كمان بس الأكيد إنها مش هتكون زيارتنا الأخيرة خاصة إن الأكل ماكنش فيه ولا غلطة ودي معجزة بالنسبة لنا.

 

نصيحة 360

جربوا كل حاجة

أحسن حاجة

كل حاجة بس أكثر حاجة كان طبق Duck au papaya

أسوأ حاجة

المكان صغير ومافيش عصائر فريش

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح