The Definitive Guide to Living in the Capital , Cairo , Egypt

مطاعم
تراس – Terrace

تراس: شرفة على عالم من الرومانسية في الزمالك

تم التقييم بواسطة
Samah Nageh
قيم
قيم الآن
تراس: شرفة على عالم من الرومانسية في الزمالك

مطعم وكوفى شوب تراس موجود بجانب حديقة الأسماك بالزمالك.. مش مجرد مطعم، نقدر نقول أنه شباك كبير على عالم رومانسي نقدر نهرب من زحمة الحياة ونأخذ أجازة ونروح نعزم نفسنا على غداء أو مشروب دافى يخلينا نعمل “Restart” ونرجع نمارس حياتنا بحيوية ونشاط.

لما روحناه كنا فاكرين أنه هـ يكون مطعم مودرن وتغلب عليه الروح الشبابية زى أغلب المطاعم والكوفى الشوب اللى فى المنطقة، لكن تفاجأنا أنه مكان كلاسيك جدًا وشيك جدًا وبـ يغلب عليه الطابع الرومانسى، وهـ نحس أن القائمين على المكان بـ يعملوا كل حاجة علشان يوصلوا للزائر الروح دي، يعنى مثلاً هـ نلاقيهم طوال الوقت مشغلين موسيقى كلاسيك والإضاءة كمان هادية ومريحة نفسيًا.

ولأن كل حاجة فى تراس بـ تتعمل بدقة هـ نلاحظ أن الإضاءة متناسقة مع الديكور والأثاث، وهـ نلاحظ كمان ميزة مهمة جدًا وهى أن الطاولات بعيدة عن بعضها يعنى نقدر نتكلم براحتنا مع أصحابنا بدون ما نكون قلقانين أن الناس اللى جنبنا يسمعونا ودى ميزة بـ نفتقدها فى أغلب المطاعم والكوفي شوب دلوقت.

أما الأكل فده بقى حقيقى أحلى حاجة فى المكان، حسينا أن الشيف عمل لنا الأكل وهو فى أبهى حالاته النفسية، لأن الطبق هـ ينطق من شياكة تقديم الأكل ورائحته اللى هـ تخلينا ننسى أى حاجة ونركز فى الطبق.. ومافيش داعى أننا نشرب حاجة لغاية ما يجهز الأكل لأن الأوردر بـ يجهز بسرعة جدًا والعاملين فى المكان مش لازم ننده لهم لو عاوزين حاجة كفاية بس نظرة بسيطة هـ نلاقيهم جنبنا فى ثوانى.. طبعًا كل دى مميزات حلوة جدًا بس المثل بـ يقول “مافيش حلاوة من غير نار”.. و الأسعار فى تراس نار بس بصراحة المكان يستاهل.

لما روحنا طلبنا تشيكن بانيه بارميزان (63 جنيه) وكان طعمه مميز جدًا وكمان الكمية كانت كويسة، وطلبنا شوربة كريمة بالفراخ (25 جنيه) وكانت حلوة جدًا غير اللى أكلناها فى أى مكان، وطلبنا سلاطة سيزر بالدجاج (40 جنيه) طعمها كان حلو جدًا وبـ تشبع لوحدها من غير أى أكل معاها ومفيدة ومناسبة جدًا لأى حد عامل دايت، وكان فيه إضافات زى ثومية (16 جنيه) وطحينة وبابا غنوج بنفس السعر.

وللناس اللى بـ تحب الأكل الشرقى تراس فيه منيو أكل شرقى هـ نلاقى مثلاً ملوخية بالأرانب وفتة باللحمة وفتة كوارع وهـ نلاقى كمان منيو لأكلات عربية فمثلاً فيه حواوشى على الفحم بالطريقة المغربية، كمان فيه منيو بيتزا بكل أنواعها ومنيو مكرونات.. وتراس بـ يتميز بأطباق خاصة مش هاناكل زيها غير فى تراس زى ثلاً طبق “رول اللحمة” (83 جنيه)، وطبعًا بالإضافة إلى منيو  المشروبات.

فى أى مناسبات تراس بـ يعمل عروض ومفاجآت خصوصًا للجروبات وكل فترة بـ يعمل عروض بداية من شخصين يعنى ممكن مثلاً يبقى فيه عرض الـ 80 جنيه لفردين ومن حق كل فرد فيهم أنهم يطلبوا أى طبق رئيسى، وهكذا فى عروض 3 أفراد وأربعة، يعنى ممكن نتابعهم على صفحتهم على الفيسبوك ونستفيد من العروض اللى بـ يقدمها تراس إحنا وأصدقائنا.. وكمان المكان مناسب جدًا للعائلات.. خصوصًا فى المناسبات بـ ندور دائمًا عن الأماكن المناسبة للاحتفال خصوصًا وإحنا مع أسرتنا، وفى تراس هـ نلاقى كل المميزات دى، كمان ممكن نحجز مكاننا بالتليفون قبل ما نروح وعلشان ما نقلقش من الفاتورة قوى نحب نقول أن تراس مش فيه Minimum  ودى حاجة مهمة بالنسبة لناس كثير.

أما عن طريق الوصول فممكن نوصل عن طريق المترو وننزل محطة الأوبرا ونأخذ تاكسى أو نتمشى مسافة بسيطة ولو معانا عربية ما نقلقش لأن فيه باركينج.

نصيحة 360

من الأفضل نحجز بالتليفون قبل ما نروح خاصة فى المناسبات.

أحسن حاجة

أن المكان هادى جدًا وهـ يفصلنا عن العالم الخارجي ولو لوقت قليل.

أسوأ حاجة

أن الأسعار غالية وكثير مننا ممكن ما يقدروش يروحوا كثير علشان الميزانية.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح