The Definitive Guide to Living in the Capital , Cairo , Egypt

تشابا لاونج

تشابا لاونج: كافيه ومطعم هادئ عند سور نادي الشمس

  • شارع عبد الحميد بدوي
  • عالمي
  • 0226207608
تم التقييم بواسطة
Waleed Abuarab
قيم
قيم الآن
تشابا لاونج: كافيه ومطعم هادئ عند سور نادي الشمس
شارع عبد الحميد بدوي والشوارع المتفرعة منه بالقرب من نادي الشمس تعتبر من الشوارع المهمة جدًا لو بـ تدور على كافيهات أو أماكن للأكل، ده غير محلات الأدوات الرياضية والملابس. وإحنا مش بـ نروح المنطقة كثير، لكن لما رحنا من فترة قريبة لقينا أن فيه أماكن كثيرة جديدة فتحت أبوابها ومعظمها يستحق الكتابة عنه ولفت النظر إليه. ميزة الشوارع دي بالرغم من أنها رئيسية وفي قلب مصر الجديدة المزدحمة دائمًا، إلا أنها بـ تتميز بالهدوء. ولما شوفنا «تشابا لاونج – Tchapa Lounge» أكثر حاجة شدتنا فيه هو الديكور الخارجي للمكان، واللون البيج الهادئ والستائر والإضاءة البيضاء الرقيقة. متناغم تمامًا مع الشارع اللي هو فيه. المكان مكون من طابقين، وعرفنا أنه فيه Wi-Fi من العلامة الموجودة على البوابة، وطلعنا للطابق العلوي علشان المنظر أحلى من فوق، لكن بعد ما قعدنا شوية وحاولنا نجرب الدخول على الإنترنت اكتشفنا أن الـ Wi-Fi مش واصل للدور الثاني، وأننا لازم نبقى في الدور الأرضي اللي فيه الراوتر.

قررنا ننسى موضوع الإنترنت ونركز في المكان اللي إحنا فيه وتفاصيله. الديكور من الداخل بنفس ألوان الواجهة الخارجية للمحل، لكن للأسف مش بنفس الشياكة والاهتمام اللي معمول بها المحل من الخارج، وحتى تقسيم المكان نفسه وتوزيع أماكن الجلوس مش معمول بحرفية، ولما سألنا الجرسون اللي معانا عن سبب عدم الاهتمام بالمكان من الداخل قال لنا أن ده مؤقت لأنهم لسه في مرحلة تجريبية بعد الافتتاح اللي كان في شهر يونيو اللي فات، وأن حاليًا تم الاتفاق مع مهندس ديكور لتغيير شكل المكان بالكامل من الداخل.
منيو عالمي زي كل مطاعم وكافيهات مصر، فقررنا نستعين بالجرسون ونسأله السؤال الشهير: أنتم بـ تعملوا إيه كويس؟ وبعد 5 دقائق كان رشح لنا صنفين من كل قائمة موجودة في المنيو، وعجبتنا أمانته لما شاور لنا على أصناف بعينها فقال لنا أنها دون المستوى وممكن ما تعجبناش، مش عارفين دي حاجة تحسب له ولا تحسب على المحل. المهم؛ استقرينا على باستا فتوتشيني كاربونارا اللي بالسلامي وشرائح الطماطم (38 جنيه) وبيف فيليه تشابا (70 جنيه) المغطى بصوص المشروم ومعاه خضار سوتيه وأرز بسمتي، وطبق مقبلات فيه سبرينج رولز بالخضروات واللحم المفروم (31 جنيه). طبعًا فيه ساندويتشات وبيتزا وكريب وأطباق دجاج وأسماك وجمبري، بس إحنا كان لازم نجرب أي طبق مكتوب عليه “تشابا”.
الباستا عظيمة، دي أقل حاجة نقولها عنها، غنية بالسلامي والكريمة والزبدة، دسمة شوية بس طعمها لذيذ والكمية في الطبق كبيرة. البيف فيليه ممتاز ومستوي كويس “صحيح تأخر شوية بس علشان إحنا كنا طالبينه Well Done والسوتيه والأرز كويسين. طبق رولز المقبلات كان غلطة ومش هـ تتكرر، ننصحكم بتجربة أي مقبلات ثانية. 6 وحدات ملسوعة من السبرنج رولز، وما حسيناش بطعم الحشو خالص، واضح تمامًا أنها مش فريش.
طبق آيس كريم بعد الوجبة دي كان ضروري، طعم المانجو كان لذيذ وقُدم لنا بشكل وسعر شيك (9 جنيه للبولة). وبما أن المكان في الآخر ممكن يستخدم ككافيه وبس، جربنا القهوة التركي (9 جنيه) وكانت مضبوطة وعلى الفنجان علامة الجودة للبن من ماركة Illy.
خدمة ودودة ومرحبة جدًا، ومعاملة 5 نجوم من أفراد الضيافة، حبينا المكان ومنتظرين نشوفه في شكله الجديد بعد تعديل الديكور، وشكلنا هـ نحب نأخذ إفطارنا وقهوتنا الصباحية في الدور العلوي من «تشابا لاونج».

نصيحة 360

ممكن تطلب تغيير قنوات التليفزيون، الإدارة مش ملزمة بتشغيل قنوات معينة زي كافيهات ثانية.

أحسن حاجة

مستوى الخدمة والمذاق الجيد في الأكلات.

أسوأ حاجة

مافيش إنترنت في الدور العلوي.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح