The Definitive Guide to Living in the Capital , Cairo , Egypt

تشابي يانكيز – Chubby Yankees

تشابي يانكيز: مطعم أكل أمريكي في الزمالك ممكن تعمل أكل أحسن منه في البيت

تم التقييم بواسطة
Dina Mokhtar
قيم
قيم الآن
تشابي يانكيز: مطعم أكل أمريكي في الزمالك ممكن تعمل أكل أحسن منه في البيت

أسباب كثير تخلينا نحب المطبخ الأمريكي؛ أولًا لأنه من أول المطابخ العالمية اللي انتشرت في مصر في صورة سلاسل مطاعم الوجبات السريعة في الثمانينات، وأنه بـ يضم مجموعة من الأطباق اللي لها نكهات من ثقافات بلاد ثانية، ده غير أن دسامته لسبب ما مغرية جدًا لناس كثيرة. كل الأسباب دي كفيلة أنها تخلي مطاعم الأكل الأمريكي تتواجد بكثافة في القاهرة. تشابي يانكيز Chubby Yankees في الزمالك هو أجدد مطعم أمريكي على الساحة.

بعيد عن زحمة شارع البرازيل، تشابي يانكيز فاتح في منطقة شبه معدومة المحلات. المكان مكون من دورين: الأول عبارة عن صالة الطعام بمجموعة من الترابيزات الخشبية العالية تكفي 4 أشخاص، وشاشة LCD. أما الدور العلوي، ففيه قعدتين بترابيزات أقل في الارتفاع عن اللي في الدور الأول، وبـ يوصل ما بين القعدتين كنبة خشبية. أمام الكاونتر الرئيسي بار بـ يطل على الشارع، وده أحسن منظر ممكن تتفرج عليه، لأن الديكور كئيب جدًا بـ يعتمد على اللون الأسود والطوب الأحمر للحوائط. كان ممكن الموضوع يكون أقل كآبة لو ما كانتش تقريبًا كل الحوائط مدهونة بالأسود، حتى محاولة كسر اللون بورق حائط مرسوم عليه تصور حديث للموناليزا فشل في مهمته لأن ألوانه أبيض وأسود.

طلعنا الدور الثاني –اللي كان فيه حوالي أربعة أشخاص شكلهم بـ يشتغلوا في المكان- لأن الأول كان مهجور تمامًا. المنيو عبارة عن ورقة 18x20 سم، منظرها من حيث التصميم ما يبشرش بأي خير، وبغض النظر عن أن الأصناف اللي بـ يقدموها ثمانية بالعدد، الأسعار مش مكتوبة، ودي كانت أغرب حاجة صادفتنا في حياتنا المهنية ككتاب مقالات نقدية.

طلبنا كفاتح شهية تشيكن ستريبس (25 جنيه)، واللي المفروض بـ يُقدم معها صوص من اختيارك. كل اللي جاء لنا هو 6 قطع فراخ في طبق فويل وللتزيين 4 أكياس كاتشاب وشرائح طماطم. الفراخ كانت مضبوطة من حيث التسوية ولكن الطبقة المقرمشة ما كانتش متماسكة نهائيًا غير أن الطبق ككل مافيهوش أي نوع من التوابل وبالتالي ما كانش فيه أي شيء يميزه عن أي مكان ثاني، حتى بعد ما طلبنا صوص Thousand Island  –واللي اختاره لنا الشيف من نفسه- كان بلا أي طعم، وما ساعدش في تحسين الطبق نهائيًا.

طلبنا ماك أند تشييز (17 جنيه) بما أنه من أشهر الأطباق الأمريكية، ولكن للأسف هو كان عبارة عن مكرونة بالصوص الأبيض متنكرة. توقعنا أن الجبنة تكون كميتها أكثر من كده، وأن يكون فيه أي نكهة مميزة.

التاكوز (27 جنيه) تعتبر أحسن حاجة ممكن يقدمها المكان، صحيح الفرق بينها وبين التشيكن ستريبس هو عيش التورتيا والخس، لكن ميزته الوحيدة أن الطبق مكون من قطعتين تاكو كبار، وبطاطس مقلية. الخدمة ما كانتش أفضل من مستوى الأكل؛ القائمين على المكان تواجدهم كان شبه معدوم بالذات في الدور الأول، وبالتالي كنا بـ نناديهم من بئر السلم علشان نطلب أي حاجة إحنا عاوزينها.    

بالرغم من أن المكان أسعاره مش غالية مقارنة بأماكن ثانية، إلا أن مستوى الأطباق خسارة أنه يدفع فيها أي فلوس. وللأسف نعتقد أن المكان مش هـ يضيف حاجة بالأداء ده وسط كم هائل من المنافسين.

نصيحة 360

تشابي يانكيز بـ يوصل للبيت: اتصل بـ 01067888896.

أحسن حاجة

ولا حاجة...

أسوأ حاجة

الأكل مش متبل تمامًا.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح