The Definitive Guide to Living in the Capital , Cairo , Egypt

تشيل أوت – Chill Out

تشيل أوت: قعدة مُريحة ومسلية في المهندسين

  • 7 ميدان عمان
  • عالمي
  • 0237618386
تم التقييم بواسطة
Shahista Sherif
قيم
قيم الآن
تشيل أوت: قعدة مُريحة ومسلية في المهندسين

المنافسة في ميدان عمان في المهندسين فجأة بقت كبيرة لأنه بقى بـ يضم
مطاعم وكافيهات كثيرة كلها بـ تتنافس مع بعض. لكن الغريب أنك تلاقي مكانين في نفس
المنطقة وكمان لهم نفس الاسم، وده كان السبب أن «أهل كايرو» يغير اسمه ويبقى «تشيل
أوت –
Chill out». وبما أن تجربتنا مع «أهل كايرو» ما كانتش قد كده، فـ قررنا نعطي
له فرصة ثانية على أمل أنه مع تغيير الاسم كمان يكون المكان أحسن من الأول، وده
تحقق فعلاً.

المكان له نفس الديكور الجميل والقعدات المُريحة، فيه شاشات تليفزيون
في وقت زيارتنا كانت مشغلة أفلام أجنبية. اختيارات الأكل كانت كثيرة جدًا لدرجة
مُحيرة، طلبنا طبق أصابع جبن الموتزاريلا المقلية بـ 22 جنيه، اللي كانت عبارة عن
5 أصابع جبنة موتزاريلا بانيه، طعمها كان لذيذ قوي وكانت فريش وساخنة ومعاها صوص
المسطردة الحلو (
Honey Mustard). ومن الأطباق الرئيسية اختارنا طبق التشيكن مونتيري (Chicken Monetary) والتشيكن كوردون بلو (Chicken Cordon Blue)، كل طبق منهم كان بـ 55 جنيه.

الأطباق الرئيسية بـ يبقى معاها صنفين جانبيين من اختيارك (بطاطس
محمرة، أرز، سوتيه)، إحنا طلبنا مع الكوردون بلو أرز وبطاطس، ومع التشيكن مونتري
مكرونة بالصوص الأبيض. الأكل كان جميل وكان مضبوط، وكميات الأكل بعد تجديد المكان
زادت وبقت معقولة، على عكس الأول كانت الكميات قليلة جدًا. المكرونة بالصوص الأبيض
كان طعمها واضح وكان عليها جبنة مبشورة، لكن مش كثيرة بزيادة (على عكس تجربتنا
اللي فاتت طعم المكرونة ما كانش باين فيها من كُثر الجبنة). رغم أننا شبعنا بسرعة،
بس كان عندنا فضول نجرب الحلو في المكان. طلبنا كريب بالشوكولاتة اللي نزل لنا
بسرعة وطعمه كان حلو.

الخدمة في المكان لطيفة والجرسونات كانوا ودودين وبـ يستيجبوا لنا
بسرعة لمّا نطلب حاجة. وكل طبق نزل لنا كانوا بـ ييجوا يسألونا ويطمنوا أن الأكل
عجبنا ويسألوا لو عندنا تعليق عليه. وغير الأكل والمنيو المتنوع جدًا من بيتزا
ومشويات وأكل بيتي وساندويتشات، المكان فيه كمان سوشي وشيشة.

يعني نقدر نقول أن «تشيل أوت» مكان مناسب لو عاوز تتغدى، أو تأكل وجبة
خفيفة، أو حتى تذاكر وتشرب عصير أو حاجة بسيطة. هـ تلاقي هناك أنواع كثيرة ومتنوعة
من الأطباق، وكمان قعدته مُريحة وبسيطة والناس هناك لطيفة، وفيه وسائل كثيرة
للتسلية زي التليفزيون والألعاب (شطرنج وكوتشينة وطاولة).

نصيحة 360

وقت ما رُحنا كان فيه منيو للسوشي، لكن في الحقيقة شكله ما كانش مُشجع.

أحسن حاجة

التنوع في المنيو، وكمان الجرسون والخدمة الكويسة.

أسوأ حاجة

من الصعب أنك تلاقي ركنة في ميدان عمان مع وجود كافيهات ومطاعم كثيرة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح