The Definitive Guide to Living in the Capital , Cairo , Egypt

مطاعم
تمارا إلنا – Tamara Elna

تمارا إلنا: أكل لبناني كلاسيكي بطعم مميز

  • بوينت 90 مول – أمام الجامعة الأمريكية – بوابة 5 – القاهرة الجديدة
تم التقييم بواسطة
Ramy Soliman
قيم
قيم الآن
تمارا إلنا: أكل لبناني كلاسيكي بطعم مميز

معشوق الجماهير “بيسترو تمارا اللبناني” قرر يدلعنا أكتر وأكتر ويقدم لنا مفهوم جديد مختلف للأكل اللبناني وهو “تمارا إلنا” في بوينت 90 مول، واللي جايز يكون أحلى حتى من المطعم الأصلي.

ديكورات تمارا إلنا من حوائط بالحجر وأرضيات ثلاثية الأبعاد، وكمان القعدة الشبيهة بكافيتريا الجامعة والرسومات الملونة على الحيطة عملوا للمكان هوية مميزة. كل قسم من أقسام المنيو – مشروبات أو مشاوي أو مقبلات – لهم مكان مخصوص في المطبخ المكشوف، وبكده دايمًا المكان فيه حيوية وحركة مستمرة.

المنيو هنا قريبة جدًا من منيو تمارا، والفرق بينهم شوية أصناف مبتكرة زي سلطة الحلوم بالكينوا (45 جنيه) وكراب ستيكس بالبافالو صوص (55 جنيه)، مع مشروبات جميلة زي فانيلا باشون (35 جنيه).

لما تروح مطعم لبناني لازم تلتزمبطقوس معينة، وعلشان كده بدأنا بمقانق بصوص الليمون (45 جنيه) وميني صفايح بالسبانخ (35 جنيه).مين فينامش بيحب دبس الرمان؟ بس بصراحة صوص الليمون اللي على المقانق كان تحفة وعمل طعم مزز جميل، وضيف كمان شوية شطشطة من الفلفل السبايسي وبكده تقدر تاكل وتدعيلنا. أما الميني صفايح فالعجينة المحشية سبانخ بتدوب من كتر حلاوتها وفيها طعم مسكر من قطع البصل الأحمر.

قبل حتى ما نخلص على المقبلات وصل الطبقين الرئيسين الخاصين بتمارا إلنا؛ الأولاني كان كفتة ميكس (90 جنيه) والتاني إلنا شيش طاووق (80 جنيه). طبقة الكفتة كان عبارة عن أربعة أسياخ بتختارهم من بينستة أنواع كفتة، فإحنا طلبنا سيخ إلنا كفتة وواحد كفتة إسطنبولي، واتنين كفتة بصوص الخشخاش.

نبتدي الحكاية مع كفتة إلنا اللي إضافة الجبنة والمشروم معاها عملت طعم جميل، بس الكفتة كانت بتتفتت عشان المشروم مش مخلوط معاها كويس. بالنسبة للكفتة إسطنبولي فكان معاها فستق مطحون عمل طعم مقرمش لذيذ، وفي نفس الوقت كانت أطري كفتة في المجموعة. نروح للكفتة بصوص الخشخاش وتتبيلتها الجميلة، بس صوص الخشخاش –  اللي بيتقدم لوحده ماكانش له نكهة مميزة. الطبق ده معاه بطاطس فرن وعليها طبقة سميكة من الجبنة الجبنة الشيدر السايحة.

أما طبق إلنا شيش طاووق فوصفه في المنيو مختلف شوية عن الحقيقة، يعني المنيو بتقول إنه معاه صوص أبيض، لكن لما سألناهم عن تفاصيل الطبق عرفنا إنه تتبيلة كريمية. على العموم، التتبيلة كانت غنية جدًا وعملت طعم مميز للطاووق، اللي معمول هو كمان بتتبيلته التقليدية اللذيذة، لدرجة إننا ماكناش محتاجين التومية (28 جنيه) اللي طلبناها عشان نغمس فيها الفراخ. المشكلة الوحيدة في الطبق إن الويدجز اللي بتتقدم معاه كانت باردة.

مسك الختام كان كنافة بالجبنة (42 جنيه). الكنافة المرشوش عليها فستق كانت مقرمشة، والجبنة مطاطية جميلة، وكمية ماء الورد – اللي مش كل الناس بتحبها – كانت مضبوطة.

نهاية مثالية لأكلة شبه متكاملة.تمارا إلنا قدر يميز نفسه عن بيسترو تمارا، يعني الأكل ممتاز وفيه كوكتيل نكهات هايل، والأجواء هناك مريحة ولطيفة لأقصى درجة.لكن بصراحة أكتر حاجة أبهرتنا هناك كانت الخدمة السريعة جدًا جدًا، ودي حاجة متوقعة من فريق موري.

نصيحة 360

ممكن تطلب من موري سوشي وأنت في تمارا إلنا. في جمال كده؟

أحسن حاجة

الويدجز الباردة كانت الغلطة الوحيدة.

أسوأ حاجة

الشيش طاووق عند تمارا إلنا من كوكب تاني، ويعتبر دليل علي بساطة وحلاوة المنيو.

Avatar
Shimo2003

اولا مطعم شيك جدا واول اما تدخل تحس انك في لبنان اغاني فيروز ورقان ???? .ثانيا النضافه من انضف المطاعم الي دخلتها اهتمام وزوق في المقابلة ثالثا الاكل طعم الاكل تحفه بمعني الكلمه طلبت ميكس شاورما الطبق 60جنيه نزلي لبنه ووزيت زيتون وعيش لبناني لسه مخبوز ظازه تحفه طعم اللبنه العيش علي مجه الاكل كنت شبعت من اكل الزعتر وزيت الزيتون الطبق عباره عن 6 سندوتش شاورما لحمه وفراخ وبطاطس وطبق طحينه شبعت جدا وطهم الشاورما حلو

أكتب تقييم

One thought on “تمارا إلنا: أكل لبناني كلاسيكي بطعم مميز

  1. اولا مطعم شيك جدا واول اما تدخل تحس انك في لبنان اغاني فيروز ورقان ???? .ثانيا النضافه من انضف المطاعم الي دخلتها اهتمام وزوق في المقابلة ثالثا الاكل طعم الاكل تحفه بمعني الكلمه طلبت ميكس شاورما الطبق 60جنيه نزلي لبنه ووزيت زيتون وعيش لبناني لسه مخبوز ظازه تحفه طعم اللبنه العيش علي مجه الاكل كنت شبعت من اكل الزعتر وزيت الزيتون الطبق عباره عن 6 سندوتش شاورما لحمه وفراخ وبطاطس وطبق طحينه شبعت جدا وطهم الشاورما حلو

أضف تعليقاً

يجب أنت تكون مسجل الدخول لتضيف تعليقاً.

مقترح