The Definitive Guide to Living in the Capital , Cairo , Egypt

مطاعم
توتي ماتي – Tutti Matti

توتي ماتي: تمتع بالأكل الإيطالي في المعادي

تم التقييم بواسطة
Nagla Ashraf
قيم
قيم الآن
توتي ماتي: تمتع بالأكل الإيطالي في المعادي

بونجورنو سينيوريتا، سينيوري، عاملين إيه، Buongiorno , Come state.

النهارده مطعمنا إيطالي، كتير مننا بـ يحب الأكل الإيطالي، مين فينا ما بـ يحبش المكرونة والبيتزا والرافيولي؟ بس مش كل المطاعم بـ تحترف صنع البيتزا والمكرونة بالطريقة الإيطالية. صحيح أن القاهرة معروفة بكثرة وجودة المطاعم الإيطالية بس قليل اللي تلاقيه بـ يقدم ثقافة البلد وجودة نوع الطعام في مكان واحد.

أول ما وصلنا المطعم الإيطالي “توتي ماتي – Tutti Matti” لاحظنا أن فيه مكان تقعد بره مفتوح على الشارع، وبالداخل علشان لو عاوز تستمتع بالجو الإيطالي المعاصر، هـ تلاقي الديكور معمول كأنك أخدت تذكرة ورحت إيطاليا أكلت وانبسطت ورجعت مصر تاني، الكراسي بسيطة من الخشب والحوائط مُزينة بالطوب الأحمر، وطبعًا المنيو مكتوب بالإيطالي وجنبه شرح بالإنجليزي علشان نفهم هـ نأكل إيه، كمان المنيو بـ يتميز أنه شامل كل حاجة مش المطبخ الإيطالي بس، هـ تلاقي فيه ساندويتشات برجر وفراخ للي مش بـ يحب المكرونة والبيتزا، كمان فيه قسم خاص لأكل الأطفال، اللي معروف أنهم مش بـ يحبوا الأكل الغريب، وقسم للإفطار واللي مش بـ تلاقيه في كل المطاعم، يعني عاوز إفطار تلاقي، نفسك في غداء تلاقي، واللي يدور بالإيطالي ياما هـ يلاقي.

بس يا سيدي وأول ما طلبنا مافيش خمس دقائق، النور قطع.. طبعًا إحساسنا كان عظيم في اللحظة دي.. جاء لنا الجرسون وطبق بالحرف مثَل “الجيش قال لك اتصرف”، خيرنا بأننا ممكن نطلب طلب واحد من اللي اختارناه لنا إحنا الاثنين، لأنهم كانوا حطوه على النار خلاص، أو أننا نستنى لحد ما النور ييجي، وبما أننا كنا فاضيين، فوضنا أمرنا لله وقولنا نستنى وماله، ونقل لنا مكاننا من جوه في التكييف لبره في النور.

إحنا طلبنا Crena di Pomodoro اللي هي شوربة طماطم حضرتك (21 جنيه)، الحمد لله كانت جاهزة قبل الكهرباء ما تقطع، قدمها لنا على لوح خشب وصحن بيضاوي كبير جدًا Bowl وجنبها قطع توست صغيرة جدًا ومقرمشة. الحقيقة أننا جربنا الشوربة دي في أماكن كتير قبل كده بس شوربة “توتي ماتي” كانت خفيفة ومشبعة وده المزيج الصعب، ناقصة ملح وفلفل أسود صحيح بس دي حاجة مقدور عليها، والعيش لما بـ تحطه بـ يفضل يقرمش في فمك، علشان فيه أجزاء من أطراف التوست اللي بـ تبقى أنشف من التوست العادي اللي بـ يدوب في فمك فبـ تبقى عاملة مزيج من الذوبان والقرمشة، ده غير أن حجم الشوربة كان كبير جدًا، وفضل مشبعنا فعلًا لغاية قبل النور ما ييجي بخمس دقائق تقريبًا.

كمان طلبنا Tutti Fizz بـ 23 جنيه، وده عبارة عن عصير ليمون بالنعناع والصودا والثلج المجروش، الحقيقة أنه كان حلو قوي ومناسب لجو النور المقطوع لأنه بـ ينعشك ويفوقك بقرمشة الثلج وانتعاش النعناع.

الحمد لله النور جه، وبالضبط بعد نصف ساعة الأكل هل علينا، وكان عبارة عن Pollo Alla Grilia يعني فيليه فراخ مشوي مع الخضار المشوي الطازة (65 جنيه) و بـ يتميز به “توتي ماتي” أنه بـ يبقى مستوي كويس لا أقل ولا أكتر من المفروض. الفيليه كان مقرمش من بره وطري جدًا من جوه (juicy)، تحس بملمس الفراخ على لسانك مقرمش وبعدين طري، فـ تبقى جمعت متعة الاستمتاع بالطعم في قضمة واحدة.

أما طلبنا الثاني هو Agenello con salsa Alla menta بـ 119 جنيه وده بقى المفروض أنه كان يبقى لحمة ضاني مكعبات بصوص النعناع والبطاطس المهروسة بالأعشاب والروز ماري، ولكن تأتي الرياح بما لا تشتهى السفن، نظرًا أن النور كان مقطوع، اللي طلع من الثلاجة ريش ضاني مش قطع لحمة، وتطبيقًا لنفس مثل “الجيش قال لك اتصرف” بعد ما الجرسون استأذننا في الخطأ رضينا بالتبديل علشان جُوعنا، وللأسف برضه الريش كانت بـ تمط جدًا كأنك داخل مصارعة مع كل قضمة، تتحايل عليها علشان تتندغ، وحتى بعد ما طلبنا أنه يسويها زيادة فضلت تمط وتمط أكثر، عارفين ليه ده خيب أملنا؟ لأن الصوص كان في منتهى الروعة، طعم النعناع مع دبس الرمان كان تحفة لدرجة أننا أكلناه مع البطاطس اللي كانت شهية جدًا، ومقطعة مكعبات صغيرة بتتبيلة بسيطة ومنعشة بالأعشاب والروز ماري. وهي دي مصر يا عبلة، تحمل يا شعب النور اللي بـ يقطع وما خفي كان أعظم.

صراحة الخدمة كانت ممتازة، مش بس في التقديم، كمان المطعم قدم لنا الحلو هدية Crème Brule اللي كان طعمها حلو جدًا وطازة جدًا، الكريمة مطبوخة كويس ومافيهاش أخطاء، زي أنك تحس بطعم صفار البيض مثلًا ودي غلطة بـ يقع فيها كتير من المطاعم، ومن فوق سكر محروق بـ تكسره الأول علشان تعرف توصل للي تحته، أجمل حاجة كان طعم السكر المحروق مع الكريمة، بس لو كمية السكر كانت زادت أكتر الطبقة كانت هـ تبقى أسمك وأحلى.

بشكل عام إحنا انبسطنا جدًا هناك، والمرة الجاية نجرب أصنافهم التانية المتنوعة والشهية، ويا رب النور ما يقطعش علينا ساعتها. لو عاوز تدخل تشوف المنيو بتاعهم، ادخل على صفحتهم على الفيسبوك من هنا أو على موقعهم الإلكتروني من هنا.

Arrivederci Miei Amici يعني إلى اللقاء يا أصدقاء، دمتم بفرحة من غير مناسبة.

نصيحة 360

جرب تشرب Tutti Fizz هـ يعجبك.

أحسن حاجة

شوربة  الطماطم.

أسوأ حاجة

الكهرباء اللي قطعت في النص.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح