The Definitive Guide to Living in the Capital , Cairo , Egypt

مطاعم
توم & بصل

توم & بصل : كشري وفطائر في مدينة نصر

  • 5 عمارات طريق النصر
  • مأكولات سريعة
  • 24 ساعة -
تم التقييم بواسطة
Basma Mostafa
قيم
قيم الآن
توم & بصل : كشري وفطائر في مدينة نصر

ماينفعش تنزل يوم تتمشى في شوارع القاهرة بغرض استكشافها من غير ما تجرب
أكلة مصري تكمل بيها جولتك؛ عشان مش هـ تفهم طبيعة المصريين غير لما تجرب الأكل
اللي حبوه وتوارثوه جيل بعد جيل.

«توم & بصل» سلسلة مطاعم أكلات شعبية مصرية لأصحاب الميزانيات
المحدودة، لدرجة أن 8 أشخاص ممكن ياكلوا ويشبعوا بأقل من 100 جنيه، صفقة هايلة لو
بصينا للأسعار الخيالية لمطاعم كتير في القاهرة.

الواجهة عبارة عن ألواح زجاج من الأرض للسقف عشان وانت قاعد على ترابيزتك
جوة تبقى بـ تتفرج على شوارع مدينة نصر المجنونة خاصة أن موقع المطعم إستراتيجي
لأنه بـ يطل على طريق النصر وشارع عباس العقاد وقريب من شارع مكرم عبيد وميدان
الساعة وهـ تحس بالحيوية وانت بـ تتفرج على المنظر ده.

المكان مناسب جداً للعائلات اللي معاهم أطفال بـ يلعبوا ويعملوا دوشة عشان
الجو العام للمكان يسمح بكده. والمطعم عموماً عادي ومش مميز في حاجة غير أن أسعاره
قليلة فعلاً، بس لو بـ تعمل دايت ما ننصحكش تاكل من هناك.

كل ترابيزة عليها أبريق مية، ووقت ما كنا هناك كان فيه طرطشة صلصة على
الأبريق وفتافيت حاجات سودة جوة المية فـ ماجيناش جنبه طبعاً، بعد ما تخيلنا كام
أيد مسكته قبلينا وهو لسة ماتغسلش.

المطعم مشهور بالكشري، ولما طلبناه خيب ظننا في مفاجأة مش متوقعة، الرز
اللي هو المفروض أساسي في الكشري كان قليل جداً والمكرونة كانت مستوية زيادة
ومعجنَّة شوية، بـ 1.25 جنيه ممكن تجيب تقلية زيادة أو عدس أو حمص، فيه أحجام
مختلفة والأسعار بـ تبتدي من 6 جنيه للطبق. بعد زيارتنا للمطعم ده زادت قناعتنا أن
مفيش أحسن من الكشري البيتي.

منيو كبير للفطائر الحادقة والحلوة بحجمين هما الوسط والكبير، طلبنا فطيرة
بالجبنة الرومي (15 جنيه) وكانت عليها فلفل رومي وطماطم وزيتون، كانت دسمة ولذيذة
جداً وكانت بـ تنقط زبدة وجبنة وإحنا بـ ناكلها.

وجربنا فطيرة حلوة بالسكر البودرة (4 جنيه) وكانت دسمة جدا لدرجة خلتنا نقلق
من كمية الكوليسترول في الأكل، وطبعاً تخيلنا كمية السعرات الحرارية اللي إحنا
داخلين عليها. بدأنا فعلاً نكشط طبقة الزبدة من على الوش عشان نقلل شوية من الدهون
وتبقى خفيفة على المعدة. رغم أن ده كان الحجم الوسط بس كانت كبيرة على شخص واحد
أنه يخلصها لواحده.

الخدمة بطيئة نوعاً ما، إستنينا حوالي 45 دقيقة عشان يجيلنا الفطير،
والأسوأ من الزبون الغضبان هو الزبون الجعان.

مارضيناش نجرب حاجة من الحلويات زي الرز باللبن بالمكسرات (3.5 جنيه) عشان
ماكانش عندنا إستعداد يغمى علينا من كتر الأكل ودسامته.

نصيحة 360

لو موسوس شوية وبـ تقلق من قلة النظافة ممكن تطلب كل حاجة تجيلك في أطباق بلاستيك وشوك وسكاكين بلاستيك.

أحسن حاجة

أكلات محبوبة ورخيصة.

أسوأ حاجة

الخدمة بطيئة جداً.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح