The Definitive Guide to Living in the Capital , Cairo , Egypt

مطاعم
تيدز – Ted’s

تيدز: ضحك ولعب وأكل وشرب ومنيو جديدة

  • داخل سيتي سنتر ألماظة
  • عالمي
  • 10:00 - 23:59
تم التقييم بواسطة
Ramy Soliman
قيم
قيم الآن
تيدز: ضحك ولعب وأكل وشرب ومنيو جديدة

كلنا عندنا الصاحب اللي مش هيروح أي حتة إلا لو فيها شيشة والصاحب النباتي اللي عايش على السلاطات والجبنة، وطبعًا الأكيل اللي عايز يجرب حاجة جديدة مع كل خروجة؛ بصراحة اختيار مكان يرضي كل الناس موضوع صعب جدًا، بس مع نظرية تيدز الجديدة “ضحك ولعب وأكل وشرب” -وكمان المنيو الجديدة -اللعبة تغيرت.

كنا على نار لتجربة منيو تيدز الجديدة، وعلشان كده ماضيعناش وقت وطلبنا من الجرسون تشيكن كاساديا (69 جنيه) وريد باشون سموزي (36 جنيه) وإحنا لسه بنتفرج على الأطباق الجديدة في المنيو. 

عصير الباشون فروت مع التوت الأحمر عملوا سموزي منعش وقوامه مميز، وكمان قطع الكانتلوب أضافت نكهة مميزة للعصير. بداية مميزة لأكلة واضح إنها هتكون مختلفة. 

الكاساديا كانت محشية فراخ مشوية وجبنة شيدر سايحة وهالوبينو وطماطم، ومعاها ساور كريم وصلصة طماطم. جايز الفراخ كانت قليلة شوية بس لذيذة والتورتيلا نفسها كانت مقرمشة، أما الساور كريم فكان فيه بصل طازة مبشور هايل، وعجبنا كمان اللسعة المشطشطة من الهالوبينو وطعم الكزبرة القوي. 

تعالوا معانا نروح للأطباق الرئيسية ونحتار مع بعض وسط الأطباق المغرية اللي تشمل Green Way Pasta وستيك ساندويتش وسي فوود باييا وغيرهم كتير من الحاجات الحلوة، وفي الأخر قررنا نطلب ليمون ماسترد تشيكن (110 جنيه) وبيتزا فراخ بالسبانخ. الفراخ بصوص الليمون والمسطردة اللي معاها مكرونة بالجبنة مستوية كويس عبارة عن قطعتين صدور فراخ طرية محطوطين على سبانخ مسلوقة معصور عليها ليمون مع نكهة ثوم لذيذة، وفوق كل ده صوص كريمة وكزبرة طازة. الملحوظة الوحيدة إن مافيش أي إحساس بطعم المسطردة، بس الطبق بشكل عام كان خرافي.

نفس الكلام يمشي مع بيتزا الفراخ بالسبانخ. العجينة الرفيعة الجميلة مع الأطراف المنفوخة وعليها كمية فراخ مشوية محترمة وجبنة بارميزان وموتزاريلا وسبانخ، ومعاهم طماطم مجففة عملت طعم مزز ومسكر قوي، والريحان الطازة عمل ريحة جميلة للأكل وأخيرًا الصلصة كانت مضبوطة عال العال. المهم إن النتيجة في الأخر كانت بيتزا خفيفة ولذيذة ونقدر نقول بكل ثقة إنه أحسن طبق بيتزا نجربه من فترة.

في الفقرة دي هنتكلم عن العوم في الغويط، أصلك مش سهل تختار بين شوية بان كيكس بزبدة الفول السوداني وكيندر شوكليت دوم وشوكليت فادج كيك وغيرهم من الحلويات الجميلة. في الأخر الجرسون نصحنا نجرب نسختهم الجديدة من pain perdu وهي Nutella Pain Perdu (70جنيه)، عبارة عن قطعة فرينش توست عملاقة مقرمشة وطرية من النص، وغرقانة في بحيرة من كريمة الفانيليا وعليها نوتيلا وبولة آيس كريم فانيليا ومكسرات وصوص كراميل. الطبق على عكس توقعاتنا ماكانش مسكر بزيادة ومعمول بمزاج.

أكلنا وشربنا وضحكنا واتكلمنا، وبعدين أكلنا تاني وهكذا. تيدز بجانب أجواءه الشيك والخدمة الهايلة عمل منيو جديدة روعة تستحق الإشادة. التنوع عند تيدز كبير وأكيد هيرضي كل الأذواق، يعني الأكيل هيتبسط والنباتي هيتبسط وكل الناس هتتبسط.

نصيحة 360

بلاش تقرأ "أسوأ حاجة"، علشان في إشاعات إن تيدز هيفتح فرع في الإسكندرية وفرع تاني في الشيخ زايد. #سعادة.

أحسن حاجة

كل حاجة حلوة وخصوصًا الأطباق الرئيسية.

أسوأ حاجة

تيدز عنده فرع واحد #حزن. لازم تكون عايش في شرق القاهرة وإلا الموضوع هيكون صعب #حزن

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح