The Definitive Guide to Living in the Capital , Cairo , Egypt

مطاعم
جاكيت بوتيتو – Jacket Potato

جاكيت بوتيتو: ما لذ وطاب من البطاطس المخبوزة فى المعادى

  • 22 شارع 9
  • مأكولات سريعة
  • 9 صباحًا - 12 صباحًا -
تم التقييم بواسطة
Gaser El Safty
قيم
قيم الآن
جاكيت بوتيتو: ما لذ وطاب من البطاطس المخبوزة فى المعادى

فى كل مطاعم القاهرة، لازم تلاقى أكلات مكررة فى كل المنيوهات مهما اختلفت مدارسها، أحيانًا بـ تكون على شكل طلب جانبى أو طبق كامل. فى كل الأحوال، ومهما كان الطبق غالى أو أنت بـ تجربه فين، لازم تلاقيه نصف مستوي (إيه!) ومافيش اهتمام كافى به.

مثال حى على كلامنا البطاطس المخبوزة. أكيد تقدر ترش عليها شوية ملح وفلفل وتضيف شوية زبدة وكله يبقى تمام، لكن موضوعنا هنا مختلف شوية عن المعتاد.

لغاية وقت قريب، كان فيه محل وحيد بـ يركز جدًا على الطبق ده وهو سيمبلى بوتيتوز، لكن دلوقت سكان المعادى عندهم اختيار جديد فى شارعهم المحبوب، شارع 9.

“جاكيت بوتيتو – Jacket Potato” –على حسب تسمية الإنجليز– بدأ الشهر اللى فات، بمطعم شيك متوسط الحجم باختيارين للقعدة، داخل المطعم أو فى الخارج. المطبخ المفتوح بـ يكشف عن بار سلاطات وإضافات من كل الأصناف، ومنه تقدر تطلب تحضير حاجة خارج المنيو الثابتة، أو تعمل حاجة على مزاجك.

رحبوا بنا بحرارة على باب المطعم ووصلونا لترابيزة فاضية، لكن إحنا طلعنا فورًا على بار الإضافات علشان نقرر نطلب إيه.

المنيو فيها مجموعة متنوعة من اختيارات الفراخ، واللحوم والخضروات، بجانب السلاطات وحلويات من البطاطا الحلوة. طلبنا طبق تقليدى من لحم مفروم بالجبن (37 جنيه) وتشيكن بابريكاش (39 جنيه).

وقت التحضير كان قليل جدًا، ودائمًا بـ يكون عندهم كميات من البطاطا خارجة من الفرن وجاهزة للإضافات. البطاطا بـ تُقدم فى علب خضراء حجمها مناسب تقدر تحافظ على الأكل الملخبط وممكن تستخدمها للتيك أوت.

طبق اللحم المفروم بالجبن كان بنفس جمال اسمه، يجمع بين كمية محترمة من اللحم المفروم وصوص وسترشير، زبادى بالنعناع وكمية كبيرة من الشيدر المبشور. قاع البطاطس كان محمر صح بحيث يضيف شوية قرمشة، والطبق بشكل عام كان بـ يشبع جدًا.

طبق التشيكن بابريكاش كان برضه ممتاز، عبارة عن صدور فراخ بصوص البابريكا (فلفل أحمر حلو)، ساور كريم، مشروم، ومن ثانى، كمية كبيرة من الجبن الشيدر.

قررنا نجرب طبق حلو، وكان اختيارنا بطاطا حلوة بالكريمة والعسل (19 جنيه). الكريمة قدرت تخفف شوية من سكر العسل القوى، ونجحت فعلاً فى عمل توازن فى الطعم.

صحيح 30 جنيه ممكن يكون كثير شوية على بطاطس مخبوزة، لكن جاكيت بوتيتو يستاهل؛ بـ يقدم لك وجبة سريعة، ولذيذة وبسيطة.

نصيحة 360

جاكيت بوتيتو بـ يوصل؛ اتصل بـ 01152000009.

أحسن حاجة

الإضافات كانت روعة، وبـ تضيف كثير لطعم البطاطس.

أسوأ حاجة

الأسعار غالية شوية، لكن الأكل يستاهل.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح