The Definitive Guide to Living in the Capital , Cairo , Egypt

جمبالايا – Jambalaya

جمبالايا: إفطار رمضان بالأسبانية في الزمالك

  • 37 أ شارع أحمد حشمت
  • أسباني
  • 01100220077
تم التقييم بواسطة
Dina Mokhtar
قيم
قيم الآن
جمبالايا: إفطار رمضان بالأسبانية في الزمالك

أي واحد بـ يبقى بـ يحلم يفطر وجبته المفضلة بعد جوع يوم صيام طويل، إنما في كايرو 360 الموضوع عندنا مختلف تمامًا، إحنا حلمنا أن الإفطار يكون قابل للأكل؛ ده لأننا لازم نفطر ونتسحر أي حاجة وكل حاجة تتاكل في القاهرة، علشان نوفر عليك عناء التجربة في رمضان.

اتصلنا بجمبالايا وحجزنا؛ لك مطلق الحرية أنك تطلب وجبتك وأنت بـ تتصل تحجز حتى قبل الساعة 5، أو أنك توصل للمطعم بوقت كافي –قول ساعة- وتطلب اللي أنت تحبه، مافيش منيو جاهز، وبالتالي الموضوع كان ألطف بكثير بالنسبة لنا.

وصلنا قبل الإفطار بساعة، استقبلنا الجرسون بترحاب، وتركنا لحظات مع المنيو اللي حاولنا فك طلاسمها في صفحتهم على الفيسبوك قبل ما نوصل للمكان، بعدها رجع وسهل الموضوع علينا، فوضح الأطباق الأسبانية الموجودة وعرفنا أن فيه أطباق عالمية لكل اللي مش بـ يحب المفاجآت على الإفطار… لكننا تعودنا على كل المفاجآت، فطلبنا أنه يرشح لنا أطباق على ذوقه، وقد كان!

طلبنا شوربة كريمة المشروم بالبروكلي (30 جنيه) بداية موفقة جدًا، بالرغم من أن شرائح المشروم كانت رفيعة إلا أنه كانت طازج ووفير. البروكلي كان مهروس في المرقة نفسها، إلا أنه ما فقدش نكهته. اللطيف أن الشوربة خفيفة وكميتها مناسبة فتحمسك أنك تكمل وجبتك.

من المقبلات نصحنا الجرسون بتجربة Pimientos del Piquillo بـ 30 جنيه… اللي هو عبارة عن شرائح فلفل أحمر مشوية عليها جبنة حلومي سايحة. النكهات كلها متناغمة وفعلًا طبق يفتح النفس.

من الأطباق الرئيسية طلبنا Pollo Empanado بـ 60 جنيه والطبق عبارة عن صدور فراخ مقلية في البقسماط، عليها جبنة موتزاريلا وبجانبها بطاطس مقلية على شكل مكعبات. بالرغم من أن شرائح الفراخ رفيعة نسبيًا إلا أنها كانت طرية ومستوية بشكل جيد. مكعبات البطاطس كانت ممتازة، إلا أننا كان نفسنا كميتها تبقى أكبر، لأن الأصناف الجانبية المكتوبة في المنيو ما قُدمتش لنا: بدل ريزوتو البابريكا جاء لنا أرز عادي بالبابريكا، وسلاطة كول سلو بدل الخضروات المشوية… دي مش مفاجأة سعيدة، لأن ببساطة كان ممكن يتم تنبيهنا مسبقًا بالتغييرات دي.

الطبق الرئيسي الثاني كان الأسوأ في تجربتنا Pollo Con Salsa de Crema de Pimiento بـ (68 جنيه)، وهو عبارة عن صدور فراخ محشوة بالمشروم والسبانخ، وعليهم صوص البابريكا… نظريًا الكلام ده ممتاز ويشجع أي شخص أنه يأكل، عمليًا التنفيذ كان سيء للغاية الفراخ كانت ناشفة جدًا محشوة سبانخ دون وجود أي أثر للمشروم، صوص البابريكا ما كانش له نكهة مميزة. طعم الخل هو الشيء اللي قدرنا نفتكره من سلاطة الكول سلو التفاح، لأننا اكتشفنا أن نكهته بـ تتسرب لبقية أصناف الطبق -وهو مش ناقص- أما أرز البابريكا فكان هو كمان عبارة عن أرز أصفر عادي جدًا، بلا أي نكهة… للأسف ما توقعناش أن المطب يكون في الأطباق الرئيسية!

كان لازم نستكمل رحلة الاستكشاف ونجرب الحلو وهو الـ Churros بـ (68 جنيه)، وهو عبارة عن عجينة مقلية تشبه لحد كبير عجينة الدونتس، مرشوش عليها قرفة، سكر ومعها صوص شوكولاتة. ما توقعناش أننا ننبهر بل على العكس تمنينا أن الجرسون يجيب الطبق بسرعة علشان ننهي التجربة المتوسطة دي. إلا أننا فوجئنا بحلو ممتاز يعوضنا عن اللي حصل في الأطباق الرئيسية، العجينة ساخنة وهشة من غير ما تكون شاربة زيت، عليها كمية مضبوطة من السكر والقرفة وصوص الشوكولاتة.

السرعة في الخدمة والضيافة كانوا ممتازين، قبل الإفطار كانت المشروبات والمياه جاهزة، الأطباق بـ تُقدم بالترتيب وبينهم فترة مناسبة للتذوق، إلا أن مستوى الأطباق نفسها متذبذب… فهي إما رائعة جدًا أو سيئة.

نصيحة 360

تقدر تتفرج على نهائي كأس العالم هناك.

أحسن حاجة

الـ Churros بصوص الشوكولاتة، شكلنا هـ نعدي نأكل منه ثاني.

أسوأ حاجة

طبق الفراخ بالمشروم والسبانخ... بأصنافه الجانبية.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح