The Definitive Guide to Living in the Capital , Cairo , Egypt

الشارع اللي فيه المكان ده مغمور شوية، اسمه شارع ابن الهيثم وهو متفرع من
شارع عباس العقاد، قبل نهايته بالقرب من شارع مصطفى النحاس. والكافيه واخد ناصية
ومدخله على شارع اسمه محمد يوسف موسى متفرع من شارع الطيران. طيب بعد التوهان ده
كله يا ترى المكان يستاهل؟ الحقيقة هو فعلًا يستاهل، الشارع الهادئ اللي هو فيه
(اللي ظهر فيه عدد من الكافيهات والمطاعم مؤخرًا) أضاف الطابع الهادئ ده للمكان من
الخارج. أضواء بيضاء أنيقة وديكورات مميزة في المدخل خلتنا نعرف من اللحظة الأولى
من دخولنا للمكان أنه مش مجرد مكان تقعد فيه شوية وتأخذ ساندويتش وحجرين شيشة
وخلاص، ده مكان ممكن بسهولة يبقى مكانك المفضل لو كانت ساكن في مدينة نصر أو قريب
منها، وده لأن الجو العام مريح وأنيق بزيادة، وهـ تلاحظ كمان أن زوار المكان من
طراز خاص وواضح أنهم من المترددين بكثرة على المكان وده باين من العلاقة الودية
بينهم وبين العاملين في «جوستو – Gosto».

المكان مقسم لـ 3 أجزاء: جزء خارجي مفتوح أشبه بحديقة وفيها ساحة لعب
للأطفال ومراجيح، وجزء نصف مغطى ومحاط ببلاستيك شفاف لكنه مكيف، وجزء داخلي مقفول.
كنا فاهمين أن الجزء الداخلي ده لغير المدخنين إنما طلع مافيش فرق وكل الأماكن
مسموح فيها بالشيشة والدخان، لكن المساحات الواسعة والمسافات المعقولة بين الترابيزات
والتهوية الجيدة هـ تخليك مش متضايق من الدخان وهـ تحب القعدة جدًا سواء بره أو
جوه، وممكن تستخدم الإنترنت الخاص بالمكان (Wi-Fi) مجانًا.

«جوستو» عنده منيو غني بالمشروبات والأطباق العالمية والباستا والبيتزا
والمقبلات والساندويتشات والحلويات والآيس كريم، هـ تتعب شوية علشان تعرف تختار من
بين كل الأصناف الموجودة، فهـ نحاول نسهل عليك المأمورية ونقول لك إحنا طلبنا إيه
وعجبنا. شوربة كريمة بالمشروم والدجاج (17 جنيه) كانت ضرورية لفتح الشهية وكانت
اختيار موفق جدًا والمشروم فيها كان مقطع بحجم كبير زي ما بـ نحب. مبدئيًا الباستا
هنا تجنن، جربنا باستا كواترو فورماج (33 جنيه) اللي فيها 4 أنواع جبنة منها البلو
تشيز الرائعة، وطلبنا جبنة إكسترا (6 جنيه) فبقى طعمها خيالي (طبعًا الكلام ده
لعشاق الجبنة). طبق رئيسي بـ يحمل اسم “جوستو” أكيد هـ يبقى جامد، ميكس
جوستو (70 جنيه) فيه قطعة دجاج بصوص الليمون وقطعة فيليه لحم بصوص المشروم البني
ووحدات جمبري مقشر بصوص الكابوريا مع صنفين جانبيين من اختيارك. الطبق أقل ما يقال
عنه أنه رائع، شكلًا وموضوعًا. استمتعنا بالـ 3 مذاقات للصوصات المختلفة وحسينا
بالتناغم الموجود في الطبق رغم اختلاف المكونات، والبطاطس البيوريه والخضار
السوتيه هـ يبقوا أحسن حاجة تطلبها من الطبق. واحد من أصدقائنا طلب طبق هو متعود
يطلبه في كل زيارة للمكان وهو دجاج بالصوص الأبيض الحلو مع النعناع والريحان، اسم
الطبق “دي مينتي” وسعره 53 جنيه. الطبق مشهور في بلاد البحر المتوسط
ورغم النكهة القوية للنعناع والسكر الظاهر في الطعم إلا أن المذاق كان خطير ومميز،
وطلع له حق يطلبه كل مرة.

بعد الوجبة المحترمة كان عندنا فضول نشوف المشروبات والحلويات بنفس الجودة
ولا لأ، وما خذلناش «جوستو» وقدم لنا أحلى ميلك شيك بالكراميل (23 جنيه) وتروبيكال
آيس كريم بالفواكة (27 جنيه)، صحيح اتأخر علينا شوية قبل ما يجيب لنا الحلويات،
لكن الموضوع كان يستاهل الانتظار.

عرفنا أن البيتزا هنا حلوة وحجمها كبير، وفيه مقبلات شرقية وشامية، ومنتجات
القهوة الساخنة والباردة كويسة، وفيه سموزي وعصائر وشاي وقهوة “Cold
As Ice” أو شبه مجمدة، وطبعًا
الشيشة هنا لها زبائنها المخلصين وسعر الشيشة الفاخرة بطعم العنب والخوخ والتفاح
18 جنيه واللي الطبي بـ 5 جنيه.

حبينا المكان بجد والخدمة الجيدة وأناقة المكان وطعامة الأكل هـ تخلي
رِجلنا تأخذ على المكان ده بسرعة ونحطه في قائمة “المفضل” وسط كل
المطاعم والكافيهات اللي بـ نزورها. ننصحكم تجربوا «جوستو».