The Definitive Guide to Living in the Capital , Cairo , Egypt

في ميدان الجمهورية في المهندسين هـ
تلاقي فيلا واخدة ناصية مكونة من دورين، الدور الأرضي فيه مطعم «جوليوز – Golio’s» وده الهدف اللي كنا متوجهين
علشانه، والدور الثاني فيه محل «بريد باسكيت –  Bread
Basket».

“جوليوز” واخد ناصية،
واسع جدًا من جوه أشبه بالخيمة لأن السقف فيه أجزاء مفتوحة بـ تدخل أشعة الشمس
بشكل جميل والأرضيات خشبية وبـ يغلب على الديكور اللون الرمادي في أبيض وفيه أعمدة
عادية وأعمدة ثانية عبارة عن جذع نخل ضخم، والمكان نفسه عامل زي دائرة والترابيزات
والقعدات مرصوصة حول مركزها، وفيه جزء من السقف متحرك بـ يتفتح بالليل علشان تتفرج
على منظر السماء بالنجوم. عندهم منيو مطبوعة لكن فى الديكور فيه أطباق من المنيو
مكتوبة على الأعمدة.

التليفزيونات كثيرة فى المكان وكل
شاشة عليها قناة مختلفة، لدرجة أننا دخلنا الحمام لقينا شاشة تليفزيون كبيرة جوه
شغالة جنب الحنافيات! وفيه شكل لدفاية كبيرة تقريبًا ديكور. المكان مطعم ولكن الشيشة
فيه أساسية لدرجة أن مافيش مكان لغير المدخنين.

قضينا اليوم بطوله هناك من الصبح
لحد الليل، أول ما قعدنا قلنا نفرفش نفسنا بمشروبات باردة فطلبنا عصير برتقال وسموزي
ليمون بالنعناع، طعمهم كان فريش ومنعش كبداية، بعد شوية طلبنا شوربة: شوربة فراخ
بالكريمة وشوربة طماطم، الاثنين كان قوامهم كويس والطعم كمان وبـ ينزل لك معاهم
عيش محمص علشان تضيفه على الشوربة بتاعتك.

للأطباق الرئيسية طلبنا بيكاتا
بصوص الليمون والمشروم اختارنا معاها بطاطس مهروسة وخضار سوتيه، البيكاتا كانت
مستوية حلو قوي والصوص كان وهمي وكثير جدًا على قطعة اللحم، تقديم الطبق كان جيد
والبطاطس والخضار أحلى من كده مافيش، جربنا كمان طبق كوتوليتا ألا ميلانيز وهو عبارة
عن سكالوب معاها باستا بالطماطم لكن إحنا غيرنا الباستا واختارنا معاه الأرز
والبطاطس المحمرة، وبرضه ما يتخيرش عن اللي قبله في جودة الطعم.

على آخر اليوم المكان ازدحم رغم
أنه ما فضيش من ساعة ما دخلنا إلا أن الناس زادت بالليل، قلنا نختم بتحلية جامدة
وخاصة أن طعامة أكلهم شجعتنا، لقينا في المنيو أن عندهم بروفيترول وتحمسنا له جدًا
لكن الجرسون اعتذر أن ما عندهمش غير 3 أنواع تحلية من الستة في المنيو من ضمنها
الكريب اللي ما كانش مكتوب أصلاً!، طلبنا سلاطة فواكة وكانت طازجة جدًا وضخمة فيها
تنويعات للفاكهة كثيرة جدًا: تفاح أحمر وأصفر، شمام، رمان، كيوي، موز وبعضه مقطع
أحجام كبيرة وبعضه صغير. الكمية كبيرة قوي ومشبعة لكن جامدة. وكريب بالشوكولاتة
الجلاكسى كان مقرمش شوية حسب الطلب ومقسم مربعات كل مربع عليه قطعة جالاكسي، دسم
شوية والكمية كبيرة لكن حلو.

أكثر حاجة بس مش مريحة في المكان هي
الشيشة ودخانها لأننا مالناش فيها، وكمان الكنب اللي هناك مش مريح للظهر خالص، وقيمة
الضريبة والخدمة عالية جدًا (76 جنيه) لكن المكان كان حلو ويستحق التجربة حتى لو
لمرة.