The Definitive Guide to Living in the Capital , Cairo , Egypt

بقلم: رنا شرف

لو نفسك تجرب مطعم جديد بيقدم أكل حلو وخدمة مميزة وفي نفس الوقت سعره معقول وعلى قد الإيد، يبقى ننصحك تجرب مطعم “حمزة”، واللي هنقولك على تفاصيل تجربتنا معاه في السطور الجاية.

“حمزة” هو مطعم من المطاعم اللي بتقدم أكلات مصرية شرقية جميلة بسعر مناسب، وأول حاجة هتلاحظها لما تدخل المكان هي الديكورات الريفية البسيطة المبهجة.

عجبنا في المطعم مستوى الخدمة العالي، والسرعة، وكمان النظافة اللي لاحظناها في المكان، وبالنسبة لنا ده بيكون مفتاح نجاح أي مطعم، وهي دي الأسباب اللي بتخلينا نكرر زيارتنا لنفس المكان أكتر من مرة.

أول حاجة مهم نقولها هي إننا جربنا عرض بيقدمه المطعم اسمه عرض الـ 55، وده عرض فيه كل صنفين بسعر 55 جنيه.

جربنا فتة الشاورما، اللحمة والفراخ والحقيقة الشاورما كانت عظيمة، لكن كنا نتمنى التومية تكتر شوية، لكن بصفة عامة كمية الفتة كانت كافية جدًا بالنسبة لنا.

جربنا كمان الحوواشي، ونقدر نقول عليه إنه معمول زي ما الكتاب بيقول، البهارات مظبوطة ومش كتيرة، وطعم اللحمة باين كويس، وعجبنا إنه كان خفيف يعني مش دسم قوي، والطحينة اللي كانت معاه كانت جميلة.  

جربنا كمان الكفتة، وكانت بشكل عام حلوة بس السلطة كتير، لكن في المجمل كانت عظيمة، وبرضه معاها طحينة مميزة.

نيجي بقى للمكرونة.. ننصحك تجرب في المكان المكرونة بالكبدة الميكس، طبق عمره ما فشل إنه يسعدنا.. كان جميل والكبدة كتير.

وأخيرًا.. جربنا الحلو، واستمتعنا بفطيرة كسترد وفطيرة جالكسي، الكسترد كانت جميلة وخفيفة، والجالكسي ميكس كانت عبارة عن شوكولاتة بيضاء وكسترد وشوكولاتة عادية.