The Definitive Guide to Living in the Capital , Cairo , Egypt

دجاج تكساس – Texas

دجاج تكساس: وجبات وساندوتشات دجاج في سيتي ستارز

  • صالة طعام بيراميدز، المرحلة الثانية
  • مأكولات سريعة
  • 0224800500
  • 10 صباحاً - منتصف الليل
تم التقييم بواسطة
Waleed Abuarab
قيم
قيم الآن
دجاج تكساس: وجبات وساندوتشات دجاج في سيتي ستارز

في ساحة الطعام أو
الـ Food
Court اللي في المرحلة
الثانية في سيتي ستارز، فيه مطعم ممكن ماتخدش بالك منه بسهولة وسط دائرة المطاعم الكبيرة
واللي عينينا بـ تقع فيها بشكل أوتوماتيكي على المطاعم المألوفة بلافتاتها المميزة
زي «هارديز» و«برجر كينج». مطعم «تكساس» متخصص في الدجاج الكرسبي المقلي بالخلطة السرية
على طريقة كنتاكي الشهيرة، والمنيو بتاعه كمان مش بعيد خالص عن منيو كنتاكي بأشكال
الوجبات والساندوتشات وحتى السلاطات والأرز.

يمكن الفرق الوحيد
بينه وبين كنتاكي أن المكان لسة جديد فـ محافظ جداً على جودة الأكل عشان يقدر ينافس
ويبقى قد المقارنة اللي لازم تتعمل من أي حد بـ ياكل عنده بينه وبين كنتاكي. المنيو
على البورد أو اللوحة الخلفية ورا الكاونتر، مفيش منيو مطبوع، طلبنا وجبة إسمها «تكس
سوبر ميكس» سعرها 29 جنيه ودي فيها قطعتين دجاج عاديين وقطعة مخلية أو (تندر) مع بطاطس
وأرز وكوكاكولا من الماكينة. التتبيلة هايلة والخلطة “السرية” بتاعتهم شبه
بتاعة كنتاكي كتير، بس الدجاج نفسه طعمه طازة أكتر وما تشعرش بأي ريحة نفاذة وانت بـ
تقطمها، والبطاطس متقطعة سميكة قوي وملحها كان قليل، والأرز كان حلو بس بدون أي إضافات
والكمية صغيرة جداً عشان العلبة اللي بـ يتقدم فيها هي نفسها علبة سلاطة الكول سلو
الصغيرة جداً. حبينا نجرب الساندوتشات واللي فيه منها تشكيلة كبيرة، طلبنا ساندوتش
اسمه «ميكسيكانا» وده عبارة عن عيش كايزر مدوَّر عادي وحجمه مش كبير خالص، فيه قطعة
دجاج حارة ومقرمشة وشرائح خس وطماطم مع شرائح عيش الذرة المكسيكي المقرمش اللي شبه
الشيبسي، وللأسف ماكانش حلو زي ما توقعنا وجالنا بارد شوية وماحسيناش بأي طعم
“مكسيكي” في الموضوع، ده غير أن حجمه مش مشبع خالص وسعره مش قليل (23 جنيه).

سلاطة الكول سلو
(5 جنيه) لذيذة، وعندهم كمان سلاطة خضراء (4 جنيه) ممتازة، وفيه ساندوتش اسمه «تكس
راب» وده شبيه التويستر اللي في كنتاكي بعيش التورتيا ونفس الإضافات وسعره 10 جنيه،
وعندهم طلب أجنحة مقرمشة مع صوص البافالو بـ 10 جنيه، وطبعاً ممكن تطلب أي دجاج حار
أو عادي، بس ننصحك بالحار لأنه أولاً مش حار قوي، ثانيا بـ يدّي طعم ونكهة أحلى للأكل،
وممكن تطلب قطعتين فلفل أخضر هالبينو بـ 2 جنيه.

في منيو الحلويات
فيه فطيرة التفاح التقليدية والبيسكيتس أو قطعتين البسكويت الأمريكي السميك المعجون
بالزبدة والعسل (6 جنيه)، جربنا البيسكتس وواضح أن مش عليه إقبال لأننا إنتظرنا كتير
جداً على ما تم تجهيزه لدرجة أننا زهقنا وكنا عايزين نستبدله بأي حاجة تانية، وفي الآخر
جالنا البسكويت وماكانش يستاهل أي إنتظار ومقدرناش نكمله.

الخدمة جيدة بإستثناء
الإنتظار الطويل للبسكويت، والمطعم الأمريكي الأصل هـ يكون له شأن كبير لو إبتدى يتوسع
ويعمل فروع في مناطق تانية، لأن جودة الدجاج عنده فعلاً ملحوظة، وبـ يملك كل مقومات
النجاح.

نصيحة 360

أطلب من منيو التوفير اللي فيه كل حاجة بـ 5.50  جنيه.

أحسن حاجة

قطع الدجاج المخلية (التندر) طعمها رائع.

أسوأ حاجة

البيسكيتس أو قطعتين البسكويت، ياريت يعيدوا النظر في وجوده في المنيو.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح