The Definitive Guide to Living in the Capital , Cairo , Egypt

دوس كانياس – Dos Cañas

دوس كانياس: مطعم جاردن سيتي بـ يضيف نوع من الرقي على ساحة الأكل القاهرية

تم التقييم بواسطة
Haisam Awad
قيم
قيم الآن
دوس كانياس: مطعم جاردن سيتي بـ يضيف نوع من الرقي على ساحة الأكل القاهرية

لما نتكلم عن المطاعم المصنفة كأرقى الأماكن في عالم الأكل والسهرات في القاهرة، أماكن قليلة ممكن نتكلم عليها بعيدًا عن الفنادق الكبيرة، صحيح فيه عدد بسيط من الأماكن قدرت تجذب الناس على مدار سنين فاتوا، أماكن ثانية قفلت أو واجهت المصير الأسوأ وهو أن مستواها ينحدر، ودي حاجات صعب أننا نتخيل حدوثها لـ “دوس كانياس – Dos Cañas“.

المطعم مكانه في كايرو كابيتال كلوب جاردن سيتي، وصحيح مدخل العمارة مش مشجع إطلاقًا، بس أول ما تطلع من الأسانسير، الموضوع بـ يدخل في الثقيل، دوس كانياس يتميز بأجواء راقية والفضل يرجع لبساطتهم، في الآخر جنب البار هـ تشوف أوراق لعب ضخمة على الحائط مرسوم عليها بالخط العربي، ونرجع ونقول من ثاني أن جمال دوس كانياس نابع من بساطته وبـ يركز على منظر النيل الرائع الموجود في وسط المشهد، أحلى حتة تقدر تستمتع فيها بروعة منظر النيل هي الكراسي العالية عند البار، وعندهم كمان للمجموعات الأكبر من أربعة أفراد قعدات أكبر وأريح، نبعد عن منظر النيل شوية ونتفرج على اللمسات اللي بـ تلفت الانتباه، وأكثر حاجة شدتنا كانت باب عتيق متركب على حائط منفصل عامل شكل جمالي للمكان.

المكان بـ يقدم مشروبات كحولية، ومنيو الأكل كانت بنفس أسلوب منيو الكوكتيلات المختصرة، وعدد المعروض في المنيو أقل من 25 صنف على عكس أغلب مطاعم القاهرة، ممكن تشوف الموضوع ده إيجابي أو سلبي، بس إحنا مع الرأي الأول، الجودة عندهم أهم من الكمية وده المهم عندنا كمان، أول حاجة هـ تستغرب منها هي اختلاف الأطباق المعروضة، يعني مثلاً منيو دوس كانياس فيها أطباق لاتينية زي بوكاديلّوز  bocadillos وسيفتشي ceviche وبطاطس برافاز patatas bravas وحاجات ثانية، مع أطباق من مطابخ ثانية زي جريك سلاد وبرياني بالجمبري وتشيكن تكّا سلاد، ثاني مفاجأة هي الأسعار، أرخص طبق كان السمر توماتو سلاد وسعرها 25 جنيه، أما أغلى طبق فكان 91 جنيه وهو طبق سي فود فريتو ميستو Frito Misto، بعيدًا عن الأسعار، الاختيارات كانت لذيذة ووقت زيارتنا الأكل كان ممتاز، البرياني بالجمبري (85 جنيه) كان غني بالبهارات والتتبيلة، والبيف بوكاديلّوز (63 جنيه) –عبارة عن ساندويتش– يمكن مش طبق أصلي 100%، بس طعمه لذيذ مافيش كلام والفضل يرجع لمربى الكرات وصلصة الثوم، جرّبنا كمان تشيكن بروتشيتا Chicken Brochetas (57 جنيه) –أسياخ لحم مشوي– وكانت معمولة بامتياز.

صحيح فيه حاجات كثيرة ممكن نحكيها عن أكل دوس كانياس، بس الأسعار كانت صعبة علينا خصوصًا مع كميات الأكل القليلة، بس دي حاجات تميّز دوس كانياس لأنه مش مجرد مطعم عادي، لو رايح وهدفك أكلة تشبعك، يبقى أكيد هـ تمشي مبسوط، بس ميزة دوس كانياس الرئيسية أنه مكان قعدته لطيفة ومالهاش مثيل في القاهرة.

نصيحة 360

لازم تحجز قبلها، نصيحة كمان: فيه كلام أن دوس كانياس بـ يعمل تعديلات على المنيو.

أحسن حاجة

أجواء تحفة بـ تبعدك خالص عن دوشة وزحمة القاهرة، الخدمة كمان كانت هايلة.

أسوأ حاجة

الأسعار غالية شوية، ووقت كتابة المقال كان الحد الأدنى لطلبات للفرد 350 جنيه.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح