The Definitive Guide to Living in the Capital , Cairo , Egypt

دوميرا

دوميرا: أكلات شامية ومشويات في مصر الجديدة

  • 69 شارع فريد سميكة
  • سوري
  • 0222405858,0222406677
تم التقييم بواسطة
Waleed Abuarab
قيم
قيم الآن
دوميرا: أكلات شامية ومشويات في مصر الجديدة

واحد من مطاعمنا المفضلة، سبق وكتبنا عنه من 3 سنين تقريبًا وأظهرنا إعجابنا بالمطبخ الشامي والخليجي للمكان واعتبرناه من أفضل المطاعم في تخصصه في منطقة مصر الجديدة. لكن جاء لنا بعض ردود الأفعال من القراء كانت سلبية للأسف بعد زيارتهم للمطعم، واعتبروا أننا بـ نبالغ في إعجابنا بالمكان، وأن كان فيه أخطاء فادحة وقت زيارتهم، طبعًا بمرور الوقت ممكن جدًا كل حاجة تتغير، الشيفات تتغير، مستوى الخدمة يتغير، فانتظرنا شوية وقررنا نعمل زيارة ثانية لـ «دوميرا» ونشوف تقييمنا له هـ يختلف ولا لأ.

المطعم موجود في ميدان الحجاز بمصر الجديدة، أمام محلات «عمر أفندي» ومطعم «جاد» الشهير. واخد ناصية مميزة وقعدته مفتوحة مش مكيفة، ومن موقعك هناك هـ تبقى شايف منظر كويس لميدان الحجاز والمحلات القريبة. لكن اللي حصل وقت آخر زيارة هو أن المكان كان مظلم بسبب عطل في أحد محولات الكهرباء، والإضاءة كانت محدودة ومعدومة في بعض أجزاء المحل، طبعًا الجرسون اعتذر لنا بشدة وقال لنا أن العطل هـ يتصلح حالًا، لكن للأسف ما اتصلحش لحد ما مشينا. القعدات بسيطة وملائمة أكثر للوجبات السريعة، مش قعدات مطعم كبير أو كافيه لكن أقرب لقعدات الكافيتيريات.

منيو أقرب للمطاعم السورية لكن زيادة عليه أطباق الكبسة والمشويات بالطريقة المصرية والباستا. أحسن حاجة عاملها المطعم هي الوجبات الكاملة اللي فيها أرز وبطاطس محمرة وورق عنب وثومية وكان بيبسي، وبـ تبقى لحوم أو دجاج أو شاورما عربي مقطعة بأسعار من 50 لـ 80 جنيه. طلبنا وجبة الدجاج المطفى (55 جنيه) وهي المفروض أكلة سورية بـ يكون فيها قطع الدجاج مسلوقة وعليها خلطة ثوم وليمون لكن اللي جاء لنا كان قطع شيش طاووق في صوص الصويا الحلو والثوم وقطع المشروم، فيها اختلاف عن اللي احنا عارفينها لكن كان طعمها ممتاز وقوام الصوص كان حلو وممكن تحطه على الأرز البسمتي هـ يعمل مذاق لذيذ.

فتة شاورما اللحم (33 جنيه) ما ينفعش تيجي هنا وما تطلبهاش، هي تخصص «دوميرا» اللي مستواه فيها من رائع لأروع، وبـ تبقى مليانة صنوبر وشرائح لحم محمرة وعيش مقرمش، سعرها مش قليل لكن مذاق غير عادي ويستاهل. بلاش مشويات من عند «دوميرا» طلبنا كباب وكفتة (الكيلو 150 جنيه) كانت دون المستوى والكمية قليلة جدًا في الطبق مع أنها المفروض بالوزن، الكفتة بـ تتفتت مش ماسكة نفسها والكباب كان ناقص تسوية، وحاولنا نطلب فلتو اللحم المشوي لكن مش موجود وقتها، فعرفنا أن المشويات فيها قصور لأنها مش تخصصهم الأصيل، خلينا في الفتات والوجبات، وبـ نفكركم أن هنا فيه فتة بالسي فوود ماحصلتش، وأطباق الأرز بالمكسرات وساندويتشات الدجاج والشاورما ظريفة.

السلاطات والمقبلات مش دائمًا حلوة، الكول سلو والثومية والفتوش واللبنة كويسين، لكن التبولة والطحينة مش قوي، جرب طبق مشكل اسمه سوق الحميدية (30 جنيه) فيه 5 أصناف من المقبلات الباردة علشان توفر، لأن التبولة بـ 12 جنيه لوحدها وكذلك الفتوش واللبنة. فيه سمبوسك وكبيبة طعمهم كويس لكن مش أحسن ما يكون. من الآخر المكان ما بقاش زي زمان، فيه قلة عناية به وفيه مشاكل في المذاق وجودة الأكل، باستثناء الفتات والوجبات، مش هو «دوميرا» بتاع زمان، نتمنى أنه يسترد عافيته ومكانته بسرعة لأننا بالرغم من كل حاجة لسه بـ نحبه.   

نصيحة 360

فيه توصيل طلبات لمصر الجديدة والمناطق القريبة.

أحسن حاجة

فتة الشاورما اللي مليانة صنوبر، والخدمة الجيدة.

أسوأ حاجة

المشويات ومشكلة الإضاءة اللعينة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح