The Definitive Guide to Living in the Capital , Cairo , Egypt

ديلاش – D’Lush

ديلاش: مطعمين x واحد في مدينة زايد 2000

تم التقييم بواسطة
Angie El Batrawy
قيم
قيم الآن
ديلاش: مطعمين x واحد في مدينة زايد 2000

في الشيخ زايد وتحديدًا قريب من مدينة
زايد 2000 فتح أماكن كثيرة جديدة من فترة: سوبر ماركت «سعودي» ومطعم «سبكترا»
وكمان جنبه مطعم خطف عنينا اسمه «ديلاش – D’Lush»، اللوجو صعب قراءته شوية لأننا كنا بـ نقرأه “Plush”، لكن مش مشكلة موضوع اللَبس
ده لأننا قضينا وقت حلو هناك يخليك تتغاضى عن أى نقاط صغيرة.

«ديلاش» عبارة عن مطعمين x واحد، بمعنى أن المكان داخله منيو
لمطعمين واحد لبناني اسمه «دناعناع – D’na3na3»
والثاني بـ يقدم مأكولات عالمية اسمه «دانتيكو – D’Antico» وكل ده تحت اسم “ديلاش”
وبصراحة مش عارفين ليه كل ده!

الاثنين منيو شكلهم شيك جدًا،
والمكان أشيك كثير، المبنى بتاع المطعم تحس أنه فيلا من الفيلات الموجودة في
المكان وخلوه مطعم، بـ تدخل من الباب هـ تلاقي قعدة بمساحة كبيرة أمامك، وفيه قعدة
ثانية على الشمال بـ تطلع لها بكام سلمة وبينهم فاصل زجاج شفاف، شاشات التليفزيون
في كل مكان بـ تعرض قنوان مختلفة على عكس أماكن ثانية بـ تثبت قناة واحدة علشان كل
واحد واتجاهاته. الغريب بقى أن المكان اللي في الأول للشيشة والثاني اللي فى
المستوى الأعلى لتدخين السجائر! وده غريب لأن كان من الأفضل حطوا الاثنين سواء
وسابوا مكان منهم لغير المدخنين!

ديكور المكان كلاسيك على مودرن،
شيك وتحسه شوية ارستقراطي لكن بسيط في نفس الوقت، مزيج عكس بعضه وعامل توازن،
المكان الأول بني والثاني بيج، والمطبخ مفتوح وموجود في واجهة المكان الثاني،
الأغطية على الترابيزات من الجلد الناعم وعليها لوجو المكان وشيك جدًا، حتى علبة
الشيك اللى جاءت لنا في الآخر كانت خشب محفور عليه لوجو المطعم وشيك جدًا.

المطعم بـ يحمل شعار “Food to match your mood” وحتى الجرسون رشح لنا أننا
ننتقى أصناف من الاثنين منيو علشان نجرب بما أننا أول مرة نروح، منيو D’Antico العالمي فيه
سلاطات وشوربات ومقبلات وساندويتشات وبيتزا وريزوتو وباستا وفيلية لحوم (من 62 إلى
90 جنيه) وفراخ (من 48 لحد 60 جنيه) سي فوود (من 64 إلى 80 جنيه) وكريب حادق ومسكر
وتحلية وحلوى وافلز، والمنيو اللبنانى D’na3na3 فيه ساندويتشات ميني شاورمة فراخ
ولحمة ومقبلات باردة وسلاطات (من 15: 24 جنيه) ومعجنات زي السمبوسك والصفايح
والمناقيش، وشوربات وأطباق رئيسية لبنانية (من 36: 66 جنيه) وحلو مصري.

جربنا من المنيو العالمي مقبلات
في البداية اسمها جراتان السبانخ (18 جنيه) كانت سخنة وعليها جبنة من فوق محطوطين
في قالب، كانت بداية قوية لزيارتنا، أخذنا بعدها طبق تشيكن سوبريم (48 جنيه)
وكعادة أي مطعم بـ ينزل لك معاه اختيارين فـ طلبنا أرز وبطاطس بيوريه، وكمان
بيكاتا (62 جنيه) معاها خضار سوتيه وبطاطس بيوريه برضه، كل الأكل كان وهمي خاصة أن
البيكاتا اختارنا لها صوص ليمون وكان اختيار موفق، الخضار بس ما كانش عاجبنا
الكوسة فيه لأنها كانت مستوية بزيادة فما كانش لها طعم لكن باقى الخضار فريش
وجميل.     

بعد شوية قلنا نكتشف المنيو اللبنانى،
بصراحة كانت بطننا على آخرها لأن كمية الأكل فى الأطباق كانت كبيرة، فـ أخذنا
تحلية كنافة نابلسية (22 جنيه) كانت رائعة وزعليها سكر سايح من فوق والشربات كان
مضبوط سكره جدًا فنفسنا ما جزعتش، وكمان جربنا الأوريو شيك (22 جنيه) مع ملاحظة أن
المشروبات مش مكتوبة فى المنيو خالص لكن الجرسون قال لنا كل المشروبات موجودة
عندهم وهو بـ يقولها لك بنفسه. الأوريو شيك ما كانش بنفس قوة الأكل والتحلية وفيه
أماكن ثانية بـ تعمله أفضل من كده كثير.

الطلب بتاعك بـ يزيد عليه 12%
خدمة و10% ضريبة، الجرسونات معاملتهم رائعة ومدير المكان شاطر ومتعاون جدًا، فيه
منيو صغيرة عاملها المكان علشان لو عاوز تطلب ديلفري. وخدمة توصيل الطلبات قيمتها
5 جنيه، لكن رأينا بصراحة أن مكان زي ده تروحه أفضل مما تقعد تستمتع بالأكل فى
بيتك.

نصيحة 360

حصري على كايرو 360، الموقع بـ ينفرد بنشر معلومات ونقد عن المطعم ده، مش لاقيين أى معلومات له على الإنترنت أو الدليل، ده اكتشافنا الخاص.

أحسن حاجة

أكل حلو وقعدة أحلى ومعاملة راقية.

أسوأ حاجة

ليه مافيش مكان لغير المدخنين؟

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح