The Definitive Guide to Living in the Capital , Cairo , Egypt

مطعم وكافيه ديو – DUO Restaurant & Cafe

ديو: أطباق تقليدية معمولة بامتياز وبأسعار معقولة في هليوبوليس

  • شارع عثمان بن عفان
  • 01141899990
تم التقييم بواسطة
Hend Salah
قيم
قيم الآن
ديو: أطباق تقليدية معمولة بامتياز وبأسعار معقولة في هليوبوليس

أكلة كويسة في أجواء فخيمة غالبًا لازم تكون مكلفة، وصعب تلاقي مكان يجمع بين الأكل الحلو المميز ويكون أسعاره مناسبة، إحنا عملنا زيارة لمطعم وكافيه ديو –DUO  الموجود جنب الأكاديمية البحرية، وبعيدًا عن شوية أخطاء بسيطة، نقدر نقول أنه حقق المعادلة الصعبة.

ديو بمكانه على ناصية واحد من أهدأ الشوارع في المنطقة بيقدم قعدة أوت دور مستوحاة من قعدات البحر بترابيزات خشب وكراسي بمخدات وشمسيات، وكل ده وسط خضرة بديعة، أما داخل المطعم فهتلاقي أجواء هادئة أكثر بفضل الإضاءة الخافتة والكنب والكراسي المريحين.

نروح للمنيو وتشكيلتها الكبيرة من الأطباق من مطابخ مختلفة بنشوفها في مطاعم كثيرة، مع عدد من الأطباق المبتكرة منها سلاطة Peach and Goat Cheese Salad بـ (45 جنيه) صدور فراخ مع جبن الماعز وخوخ ودريسينج مخصوص- و Bonne Femme وهو عبارة عن طبق سي فوود عليه صوص كريمة ومشروم (85 جنيه).

بعد تفكير عميق قررنا نلتزم بالتقاليد ونطلب شوربة طماطم وشوربة عدس (25 جنيه و23 جنيه على الترتيب) وطبق مقبلات ميكس (35 جنيه) عبارة عن سمبوسك لحم وجبن، وشرائح فراخ مقلية وسبرينج رولز خضروات، أما بالنسبة لأطباقنا الرئيسية فطلبنا بيف فيليه (50 جنيه) وتشيكن كولورادو (55 جنيه).

شوربة الطماطم بيقدم معاها عيش محمص، وتتبيلتها كانت هايلة وطعمها لذيذ، لكن صعب تقارنها بشوربة العدس الخفيفة جدًا وطعمها غير المميز خالص.

خلصنا الشوربة ودخلنا على طبق المقبلات، أول حاجة كانت السمبوسك المحشية جبنة سايحة سخن مخلوط بتوابل طازة وقطعة السمبوسك كانت مقلية باحترافية، نروح لسمبوسك اللحم بعجينتها الرقيقة اللي عوضتها تتبيلة اللحمة المفرومة اللذيذة، شرايح الفراخ كانت مقرمشة ولذيذة، وتتبيلتها الرائعة عملت النكهة اللاذعة المطلوبة، وأخيرًا السبرينج رولز كانت محشية خضروات طازة، لكنها للأسف كانت مزيتة جدًا ومحروقة من الأطراف.

سريعًا وصل أكلنا سخن وطازة، نبدأ مع البيف فيليه اللي يستحق العلامة الكاملة، اللحم العايم في صوص مشروم روعة كان طري وعصاري، ومعاه طبق جانبي من البطاطس المهروسة اللذيذة وأرز أبيض خفيف، نقدر نقول بكل ثقة أنه طبق لذيذ ومعمول بإتقان.

نفس جمال الطعم كان مع التشيكن كولورادو المكون من فراخ مقلية ملفوفة في بيف بيكون ومتغطية بطبقة جبنة موتزاريلا سايحة، اكتملت روعة الطبق مع خضار سوتيه وبطاطس محمرة سخنة عليها تتبيلة قمة في الروعة.

كان لازم نهضم الأكلة بعصير واضح أنه تحفة من اسمه Frozen Cheese drink بـ (30 جنيه) عبارة عن نوتيلا ولبن وجبن أبيض قدروا يعملوا كوكتيل رائع ومميز.

بعد جولة استكشافية في قسم الحلويات، شوفنا مجموعة من الاختيارات التقليدية زي براونيز شوكولاتة بالآيس كريم (32 جنيه) وكريب نوتيلا (36 جنيه)، مع اختيارات مثيرة زي الجلاكسي تارت (35 جنيه) وفروت مادنيس (35 جنيه).

طلبنا فروت مادنيس، وهو عبارة عن بولة آيس كريم كبيرة مع قطع فاكهة وسطها وعلى البولة كلها، العيب الوحيد في الطبق قوام الآيس كريم اللي كان لزج شوية وسايح، وكمان طعمه مش على المستوى، النهاية كانت مع شيشة لبان -بطيخ ولبان- ونعناع (35 جنيه للواحدة)، وصحيح كانوا بيخدّموا عليها كويس، لكن الحجر خلص أسرع من توقعاتنا.

صحيح ديو ما قدرش يقدم أي جديد، لكننا استمتعنا بزيارتنا جدًا بعيدًا عن شوية غلطات بسيطة، وعمومًا كل طلبنا في الأكل أنه يتنفذ صح وخلاص.

نصيحة 360

ديو بيستضيف ليلة كاريوكي كل خميس وجمعة من 7 مساءً، للحجز اتصل بـ 01141899990.

أحسن حاجة

خدمة ممتازة وأسعار معقولة.

أسوأ حاجة

المنيو مش هتبهرك لو كنت من خبراء الأكل.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح