The Definitive Guide to Living in the Capital , Cairo , Egypt

دي أوليفا – Di Oliva

دي أوليفا: مطعم إيطالي هادئ في كومباوند تارا بالشيخ زايد

  • كومباوند تارا
  • إيطالي
  • 0238504603,0120414141
  • 10 صباحاً - منتصف الليل
تم التقييم بواسطة
Angie El Batrawy
قيم
قيم الآن
دي أوليفا: مطعم إيطالي هادئ في كومباوند تارا بالشيخ زايد

الشيخ زايد معروفة بالـ Compounds الكثير والفخمة على بعد مسافات مش قليلة من بعض، فيه كومباوند “الربوة”، و”جيرا” و”زايد 2000″ اللى أمامه “أركان مول” وفيه كمان كومباوند هادئ اسمه “تارا” بداخله مطعم إيطالي لطيف ممكن تدخل تقعد فيه حتى لو أنت مش من سكان الكومباوند، لما عرفنا كده ما ترددناش أننا نروح نكتشفه وبالمرة نكتشف المكان من الداخل.. ودى كانت زيارتنا للمطعم الإيطالى الهادئ “دي أوليفا – Di Oliva”.

الكومباوند مش كبير قوي، أول ما تدخل هـ تفضل ماشي على طول وتحود شمال هـ تلاقى هناك مركز تعليم فنون للأطفال اسمه “هوايات”، المطعم موجود بجانبه وفيه منطقة للجلوس بره فى الهواء الطلق بجانبها ملعب كرة قدم كان هادئ وقت زيارتنا، الجو هناك روعة والمنطقة اللى جوه كمان لطيفة وشيك رغم بساطتها، الجرسونات ودودة ممكن تحسهم أصحابك، والترابيزات والمكان روحها إيطالية خالص.

أول حاجة هـ تستغربها بس هـ تحبها أن المنيو على شكل مكعب زجاجى كل واجهة منه فيها قسم من أقسام المطبخ: AntiPasti ودي فيها شوربات وسلاطات مش كثيرة قوي، والبيتزا، والباستا، والمشروبات والآيس كريم (Dolce) وأسعار الإضافات من لحوم وخضار أو جبنة لو عاوز تزود حاجة على طبقك، الأسعار بصفة عامة لطيفة جدًا مش غالية والكميات اللى قدمت لنا كانت كبيرة ومشبعة.

اختارنا شوربة الطماطم بالكريمة (18 جنيه) اللى جاءت لنا فى وقت قياسي وسخننا بها معدتنا فى البداية تلاها السيزر سلاد (22 جنيه) اللى كانت شهية جدًا وفريش، ده غير أن نزل لنا Bread Sticks أول ما طلبنا عليها جبنة وصلصة حمراء ومعاها Dipping زيتون مفروم كانت لذيذة جدًا.

الأطباق الرئيسية كان اختيارنا تشيكن ألفريدو باستا (42 جنيه) وبيتزا خضروات Vegetarian (38 جنيه) وحطينا إضافة فراخ (10 جنيه) لأن ما كانش فيه فى المنيو بيتزا بفراخ خالص، والمشروبات طلبنا بيبسي (7 جنيه) وسموزي خوخ (18 جنيه)، البيتزا حجمها كبير أوى على شخص واحد، ممكن تقسمها مع حد صاحبك، طعمها كان حلو أوى والمكونات فريش بس تقطيع القاعدة العجينة شوية كانت مش سلسة بس كويسة، وأحلى حاجة أنها جاءت لنا على قاعدة خشب زي المطاعم الإيطالى اللى بجد بـ تعمل، الباستا كانت حلوة أوى برضه والصوص مضبوط والفراخ مستوية كويس، بس برضه ما قدرناش نخلصها لوحدنا علشان الكمية كبيرة، السموزي كان خرافى رغم أن لونه كان غريب، مزازته حلوة وسكره مضبوط وقوامه كمان.

بعد الاستراحة شوية والاستمتاع بالهواء والقعدة الهادئة تمامًا دخلنا على الحلو الكبير الشوكولات فوندو (30 جنيه)، كان روعة، الكيك هشة ولما تقطعها الشوكولاتة السايحة تنزل أنهار، دائمًا بـ ننتظر اللحظة دي لما نطلب أى شوكولات فوندو، الآيس كريم الفانيليا كمان معاه قلل دسم الشوكولاتة شوية، بجد كان ختام لقعدتنا رائع.

“دي أوليفا” لهم صفحة على الفيسبوك، مواعيدهم فى الحظر بـ يقفلوا قبلها بساعة واحدة وفى الأيام العادية قبل الحظر بـ يفتحوا لمتأخر عادي، المكان لطيف وبجد ممكن نروحه كثير حتى لو علشان نشرب حاجة ونستمتع بالقعدة هناك.. إحنا اتبسطنا.

نصيحة 360

"دي أوليفا" عندهم خدمة توصيل داخل الكومباوند وكمان فى الشيخ زايد فقط، اسأل على منيو خدمة التوصيل قبل ما تمشي.

أحسن حاجة

مكان لطيف وهادئ وأسعاره كويسة.

أسوأ حاجة

قاعدة البيتزا الناشفة شوية.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح