The Definitive Guide to Living in the Capital , Cairo , Egypt

ذا بانيني هاوس – The Panini House

ذا بانيني هاوس: بانيني وبان كيك في قلب مصر الجديدة

  • 128 شارع الميرغني
  • مأكولات سريعة
  • 01008000917
تم التقييم بواسطة
Waleed Abuarab
قيم
قيم الآن
ذا بانيني هاوس: بانيني وبان كيك في قلب مصر الجديدة
في شارع جانبي متفرع من شارع الميرغني اسمه شارع لومومبا هـ تلاقي في أوله محل مستخبي وحجمه صغير جدًا اسمه «ذا بانيني هاوس – The Panini House» أو بيت البانيني. البانيني للي مش عارف جاي من كلمة panino الإيطالية بمعنى ساندويتش، بس اللي بـ يبقى حجمه صغير ومضغوط والمصنوع بأنواع معينة من الخبز زي الباجيت أو التوست، وبـ يبقى فيه ماكينة معينة بـ تقوم بضغط الساندويتش على الجريل علشان يبقى شكله النهائي رُقيق وتختلط مكوناته بشكل رائع نتيجة الضغط والتسخين على الجريل، وفي بعض الأحوال ممكن يتاكل بارد زي الكلوب ساندويتش وبانيني السالمون المدخن.
المحل الصغير ده اللي هو أقرب لكاونتر تعمل من عليه الطلب وفيه حوالي 5 أو 6 كراسي بار خارج المحل على ترابيزة واحدة طولية، ورغم المساحة المحدودة وأماكن الجلوس القليلة إلا أننا حبينا القعدة في المكان ومتابعة مبارة كرة قدم كانت شغالة في التليفزيون اللي داخل المحل. وأخذنا مكاننا على البار الخارجي وقعدنا نتابع الموظف الوحيد اللي كان موجود في المحل وقت زيارتنا وهو بـ يحضر لنا الطلب بتاعنا اللي هـ نقول لكم عليه حالًا.
المنيو فيه Chicken House وMeat House وCold House وCheese House كلها أشكال مختلفة من البانيني لكن بـ تتعمل كلها بحجم واحد وبـ تختلف في الحشو والإضافات والبرودة أو السخونة. وفيه عدد من السلاطات والمقبلات زي السلاطة اليونانية وسلاطة الكابوريا وأصابع الموتزاريلا والميني بانيني والبوبس المقرمشة. أسعار البانيني من 13 لـ 28 جنيه، والحجم مش كبير ومش صغير، بـ يُقدم في طبق مقسوم لنصفين مع الكومبو اللي فيه بطاطس وبيبسي (6 جنيه) ممكن تشبع وتقوم مبسوط، لكن لو جعان قوي ننصحك تطلب جنب الكومبو سلاطة أو حتى تجيب 2 بانيني مش واحد.

طلبنا بانيني فيلي وايلد ستيك Philly Wild Steak بقطع اللحم المشوي والمشروم وجبنة أمنتال وخس وخيار (27 جنيه). دي من أحسن الحاجات اللي ممكن تطلبها من هنا حسب كلام الجرسون، وفعلًا كان طعمها لذيذ والمكونات فريش وحسينا بلمسة احترافية وتخصص شديد في صناعة الساندويتش المضغوط. بانيني بالدجاج المشوي والسلامي والجبن والخيار Chicken Salami Tempataion بسعر 26 جنيه كان طلبنا الثاني وكان اختيار موفق ويمكن طعم الدجاج عجبنا أكثر من طعم البيف كمان. والمفاجأة كانت البطاطس المحمرة الرفيعة العجيبة والخلطة المرشوشة عليها وطعمها الخرافي. مع الوجبة طلبنا تشيكن سيزر سلاد (20 جنيه) وجاءت لنا في علبة كبيرة تكفي فردين أو أكثر وبدأنا والكابوتشا فيها فريش وصوص السيزر العبقري متخللها وعامل ميكس خطير مع قطع الدجاج المشوية والجبن المبشور.
رغم جودة الأكل الملحوظة، إلا أن الطلب تأخر جدًا علشان ينزل أمامنا، بس فيه لفتة ذكية من الموظف الوحيد بالمحل اللي كان بـ يحضر الأكل وبـ يقدمه بنفسه، جاء للترابيزة واعتذر عن التأخير وقال لنا أن زميله في الشغل في أجازة بسبب حادثة حصلت له وأنه شغال لوحده في المحل علشان كده التحضير بـ يأخذ وقت. عذرناهم طبعًا خصوصًا أن الأكل وطريقة التقديم كانوا ممتازين. وناويين نروح ثاني علشان نجرب السرعة والبانيني البارد لما يكون المحل شغال بكامل طاقته وبعد عودة الموظف المصاب.

نصيحة 360

فيه منيو إفطار من البانيني والبان كيك ممكن تلحقه قبل الساعة 11 صباحًا. وشوف صفحتهم على الفيسبوك.

أحسن حاجة

بانيني زي الكتاب ما بـ يقول، وأسعار وقعدة حلوين.

أسوأ حاجة

المكان متداري بزيادة، محتاج دعاية أحسن من كده علشان يأخذ حقه من الشهرة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح