The Definitive Guide to Living in the Capital , Cairo , Egypt

مطاعم
ذا جريك – The Greek

ذا جريك-The Greek: اليونان انتقلت للمعادي؟

مطاعم المعادي مطعم يوناني مقال نقدي
  • 19 شارع 231
  • عالمي,يونانى
  • 2 مساءً لـ 10 مساءً -
تم التقييم بواسطة
Nagla Ashraf
قيم
قيم الآن
ذا جريك-The Greek: اليونان انتقلت للمعادي؟

المطبخ اليوناني فيه ملامح بسيطة من الأكل اللبناني والمصري في الأصناف يعني تلاقي عنده شيش طاووق أو كفتة أو كباب، بس الأسماء هتكون غريبة شوية، دي مش أول زيارة لفريق كايرو 360 لمطعم ذا جريك –  The Greek  أخر زيارة كانت في 2013.

والحقيقة إن المكان لسه محافظ على جماله وأكلاته الممتعة اللي صعب تلاقي زيها في القاهرة، الديكور يحسسك إنك رحت سانتوريني اليونانية، باللون الأزرق اللي مسيطر على أغلب بيوتها، للوحات والموسيقى اليوناني الجميلة، وبالرغم من إن المكان صغير حوالي 4 ترابيزات بس إلا إنه دافي بأكلاته المظبوطة.

المنيو مافيهوش اختيارات كتير خاصة في الأطباق الرئيسية والحلو، وللأسف وقت زيارتنا كانت فيه حاجات مش موجودة من الحلو والقهوة، فطلبنا كابتشينو نبريسو بـ 25 جنيه ومن المقبلات طلبنا Feta Me Sousami بـ 65 جنيه، ومن قسم الراب (شبه الكريب لكن عجينة أسمك)  اختارنا راب الـ Kefteds بـ 72 جنيه، ومن الأطباق الرئيسية chicken Souvlaki Meal بـ 140 جنيه.

أول ما طلبنا اتقدم لنا كوفر عبارة عن عيش يوناني حجم عريض شبه الفطير ومن الدقيق الأبيض، حاجة أقرب لعجينة البيتزا بس أطرى وعليه زعتر وبودرة توم وبصل وزيت زيتون حاجة كده منتهى الروعة، وطعم العيش يخليك مش عاوز تسيبه وفي نفس الوقت مش عاوز تشبع. بعد كده جات لنا القهوة مع المقبلات والقهوة كانت تحفة ومتقدمة على الطريقة اليوناني يعني مش سخنة قوي فتقدر تشربها على طول.

 أما المقبلات بقى “Feta Me Sousami” فده عبارة عن  قطعتين عراض جبنة فيتا مقليين بالسمسم وجنبهم عسل تحطه عليهم.  إحنا من عشاق الحلو والحادق بس الطعم كان بيخبط في دماغك مع طعم الجبنة الفيتا اليوناني والسمسم الحادق وحلاوة العسل حاجة كده غير متوقعة بس ممتعة، لكن اللي مالوش في الحلو والحادق مش هيستمتع.

أما بقى الطبق الرئيسي “chicken Souvlaki Meal” فده عبارة عن 2 سيخ شيش طاووق مع 2 طبق جانبي أخترنا منهم سلاطة بالفاصوليا البيضاء ورز بالزعفران وكان معاهم عيش يوناني، الطبق كان حكاية إغريقية بتلعب على مشاعرنا، حسستنا إننا رحنا اليونان ورجعنا، الفراخ مستوية كويس، والرز مفلفل ومليان نكهات، أما السلطة فكانت الإضافة المظبوطة اللي كملنا بيها الطبق علشان نشبع، بس ممكن لو حد معدته كبيرة شوية يحتاج يطلب حاجة جنبها، لأن الكمية مش كبيرة.

أما راب الـ Kefteds فهو كان أجمل حاجة استمتعنا بيها صحيح حجم صغير جدًا قد كف الإيد تقريبًا لكن طعمه مايتوصفش، الكفتة اليوناني اللي مقرمشة من بره وطرية من جوه مع الزبادي بالخيار والبصل والراب  عجينته نفسه معمولة حلو جدًا.

تجربتنا هناك كانت ممتعة جدًا كان نفسنا نجرب الحلو لكن النوع اللي كنا عاوزينه ما كنش موجود، ماكنش فيه غير آيس كريم مستكة وزبادي بالفاكهة وكيكة عادية، فقررنا نكتفي بهذا القدر، وأكيد مش هتكون زيارتنا الأخيرة للمكان اللي لسه محافظ على مستواه الممتاز.

نصيحة 360

ماتفوتوش القهوة.

أحسن حاجة

كل حاجة.

أسوأ حاجة

المكان صغير

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح