The Definitive Guide to Living in the Capital , Cairo , Egypt

مطاعم
ذا لوبي – The Lobby

ذا لوبي: بديل بلاك ستون بيسترو في طريقه لاحتلال مكانة متميزة في الزمالك

تم التقييم بواسطة
Ramy Soliman
قيم
قيم الآن
ذا لوبي: بديل بلاك ستون بيسترو في طريقه لاحتلال مكانة متميزة في الزمالك

بعد الافتتاح المبدئي لمطعم "ذا لوبي – The Lobby" الموجود في الزمالك، أكيد قصاده رحلة طويلة علشان يثبت نفسه، ذا لوبي اختار أنه يحتل مكان المطعم السابق بلاك ستون بيسترو، وقدر يظهر علامات واعدة بتقول أنه يقدر يوصل لنجاح المكان السابق، ومنها توفيره أجواء لطيفة هتحسها من وقت دخولك المكان.

كل العوامل اجتمعت علشان تقدم روح جميلة وجو هايل للمكان، من اختيارهم لديكورات من الخشب والحجر مع ترابيزات لفردين، لغاية المدفأة ومجموعة عتيقة من الساعات.

بدأنا أكلتنا مع وصول سلّة عيش طازج روعة هدية من المكان، ومعاها بقسماط مملح وشوية زبدة مع سلاطة سيزر بالسبانخ (45 جنيه).

السلاطة كان فيها خس طازج وعيش محمص، بس النكهة الرائعة فعلاً كانت بسبب السبانخ ودريسنج الليمون وشرائح جبن الجرانا بادانو –ودي ملحها بيكون أقل شوية من البارميزان-، بجد مافيش بداية أحلى من كده.

عندك يا سيدي منيوهين تختار منهم، منيو ذا لوبي التقليدية ومنيو ثانية فيها اختيارات شهرية مخصوصة، يعني مثلًا أطباق لذيذة منها سباجيتي سي فوود (65 جنيه) وبيف فيليه 200 جرام (100 جنيه) ودول من منيو شهر فبراير، ومعاهم أكلات لذيذة منها ساندويتش بط (75 جنيه) وبرجر سلامون (75 جنيه) ودول من المنيو العادية.

بعد تفكير عميق قررنا نطلب تشيكن تشيز ديب (75 جنيه) من المنيو الشهرية ومعاها بيف سوفلاكي Beef Souvlaki على الطريقة اليونانية (65 جنيه) من المنيو العادية.

الفراخ المحشية جبنة وسلامي بطبقتها الخارجية الذهبية المقرمشة وقلبها الطري من جوه كانت هايلة، وصوص الجبنة كان مميز خصوصًا مع إضافة السلامي والجبنة السايحة والزيتون والمشروم وعملت طعم هايل كمان مع الفراخ، البطاطس المهروسة اللذيذة اللي مع الطبق كانت ممتازة خصوصًا لما تدلعها بشوية صوص جبنة.

أما الجريك بيف سوفلاكي الشبيه بالتاكو بس في عيش بلدي كان يشبه الحواوشي، واللحم كان محشي في عيش بلدي ومتقطع شرايح، في الأول حسينا باستغراب شوية، بس الموضوع طلع لطيف.

لو ركزت في الحشو الموجود في العيش البلدي المشوي هتلاحظ أن اللحم معاه نعناع وجبن ماعز، ودول أضافوا نكهة يوناني لذيذة، أما الطماطم فعملت نكهة لاذعة طازجة، المشكلة الوحيدة في الموضوع كان صوصtzatzaki ، اللي ما قدمش اللمسة اليونانية المطلوبة، بيقدموا مع الطبق بطاطس من البطاطا الحلوة بتكون مقرمشة من بره وطرية من جوه، وغالبًا دي كانت أحلى مرة نجربها في حياتنا.

نروح لمنيو الحلو، والمفاجأة السعيدة أنها مقدمة من باتر هاف أند كو، ومعاها 6 أطباق من المطعم وشوية مخبوزات منها ريد فيلفيت وكاروت كيك، طبعًا كان نفسنا نجرب كل حاجة عندهم، بس في الآخر قررنا نطلب كروكان Croquant باتر هاف أند كو (42 جنيه).

نوصف لكم أكثر ونقول أنها كانت عبارة عن كيكة رطبة جدًا متغطية بعجينة feuilletine، وحولها خلطة كراميل مع بندق وعليها آيس كريم زبادي بالتوت، مافيش شك أن الكروكان من باتر هاف أند كو من عالم ثاني وبتذوب في فمك من جمالها، صحيح بولة الآيس كريم الزبادي بالتوت كانت هايلة ولذيذة، لكن طعمها مش ماشي مع باقي المكونات.

نقدر نقول أننا ما بين الديكورات المميزة والأجواء اللطيفة، لغاية الأكل اللذيذ والخدمة الممتازة فعلاً قضينا وقت رائع في ذا لوبي، جايز تشوف أن المنيو مافيهاش حاجة مميزة، بس أكيد تنفيذ الأصناف هيبهرك، أكيد هـ نستنى على نار علشان نجرب منيو الشهر الجاى.

نصيحة 360

ذا لوبي بيقدم منيو إفطار فيها كل حاجة من الوافلز والبان كيكس المحشية لغاية Eggs Benedict وحتى طبق السجق والبطاطس المهروسة موجود.

أحسن حاجة

منيو الشهر فكرة هايلة فعلًا وهتشجع الناس تزورهم ثاني.

أسوأ حاجة

صحيح صعب تلوم ذا لوبي على مشكلة الركنة، بس الموضوع في شارع طه حسين بجد كارثي.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح