The Definitive Guide to Living in the Capital , Cairo , Egypt

لما تبقى في سيتي ستارز وتيجي تأكل ومش
عاوز تحس أنك بـ تأكل في سيتي ستارز، روح على المرحلة الثانية Phase
2  في الدور الرابع وادخل مطعم «رومانوز مكروني
جريل» الإيطالي. خذ ترابيزتك في الجزء الداخلي المغطى من المحل وساعتها هـ تنسى
أنك في سيتي ستارز وهـ تحس أنك في مطعم شيك كلاسيكي غير كل مطاعم الفوود كورت في
المول.

الديكور بسيط بألوان من الطبيعة زي البني
والأخضر وعلى الجدران لوحات زيتية بـ تجسد الريف الإيطالي، والإضاءة هادئة وهـ
تسمع أغاني إيطالية من الخمسينيات والستينيات طول ما أنت في المكان. فيه ترابيزات
عادية وترابيزات المطاعم الأمريكية ( (American Dinnerملاصقة للحائط ودي مخصصة للأعداد الكبيرة، وممكن تختار
تقعد في المساحة المفتوحة لو كنت هـ تدخن. بمجرد ما قعدنا نزل لنا مجاملة من
المطعم عبارة عن قطعة عيش بروشيتا ضخمة وقام الجرسون بوضع بعض زيت الزيتون في طبق
صغير أمامنا علشان نغمس فيه العيش الطازج مع بعض الفلفل الأسمر.

المنيو عملاق في حجمه وفي محتوياته؛ مطبخ إيطالي متكامل، من أول المقبلات والشوربة لحد المعجنات والمشويات على الطريقة
الإيطالية. ولازم يكون فيه بيتزا ولازانيا طبعًا. بدأنا بطبق المفروض أنه مشهيات إنما كان وجبة مشبعة في حد ذاته، عجبنا مكوناته المكتوبة في المنيو وقبل ما نختاره
طلبنا من الجرسون يرشح لنا طبق لذيذ يفتح نفسنا فـ رشح لنا نفس الطبق وهو طبق فيه
خليط جمبري وقطع خرشوف وعيدان سبانخ مع الموتزاريلا وجبن البارميزان (52 جنيه) وده بـ يُقدم في طبق زجاجي معمولة بالبشاميل ومعاه قطع عيش محمصة مقرمشة، وعلى قد ما كان لذيذ على قد ما حسينا أنه هـ يشبعنا ومش هـ نقدر ننطلق في
الطبق الرئيسي اللي لسه ما جاش.

من منيو الأطباق الإيطالية الكلاسيكية
اختارنا طبق اسمه Mama’s Trio بـ يكون فيه 3 أصناف
من أشهر ما يقدمه المطبخ الإيطالي وهم الكانيلوني واللازانيا وفيليه الدجاج بصوص
البارميزان (89 جنيه). الكانيلوني محشو بقطع الدجاج وجبن الريكوتا من غير ملح مع الخضروات ومغطى بصوص الطماطم وأجمل حاجة فيه كانت العجين نفسه اللي هـ تشم فيه
رائحة الخبيز الطازج، نفس الكلام على اللازانيا باللحم المفروم وإن كان ناقصها
كثير من التوابل ولفائف العجين كانت كثير ومحتاجة صوص أو حشو أكثر وعلشان كده
استخدمنا كاتشاب كثير معاها لضبط الطعم. فيليه الدجاج هو الأجمل في الطبق؛ مغطى
بطبقة البارميزان والموتزاريلا وصوص طماطم ومقرمش من الخارج وطري من الداخل. الطبق
ده مشبع جدًا لفرد واحد، وممكن ما تقدرش تخلصه كمان.

طبق ثاني من منيو المشويات كان ستيك فيليه
اسمه (بيستيكا)، قطعة لحم بقري مشوية على الجريل وبـ تتقدم مع بطاطس كالابريزي
المشوية والروزماري وحبات طماطم الشيري ومغطى بصوص الثوم المشوي اللي اسمه (ديمي جلاس) وسعر الطبق 97 جنيه. «مكروني جريل» فاهمين يعني إيه جريل، واللحمة فريش والتسوية
الكاملة اللي طلبناها كانت مثالية، وجاءت لنا مُشربة من الصوص اللذيذ وقعدنا نفتكر
هو إذا كنا أكلنا ستيك بالحلاوة دي قبل كده؟ صحيح غالي لكن ثمنه فيه.

فيه أطباق أسماك وسلمون وجمبري كله بـ يتعمل
على الجريل، وفيه كل أشكال الباستا والبنا والبيتزا، وسلاطات سيزر وفلورنتين،
والأهم هو أطباق الباستا المحشوة بفواكة البحر (125  جنيه) وفطائر المشروم (61 جنيه)، وعجبنا أن
المحل بـ يستخدم 4 أنواع فقط من الجبن بمنتهى الحرفية بما يناسب المطبخ الإيطالي
وهم الموتزاريلا والريكوتا والبيكورينو والبارميزان، وتقريبًا هم داخلين في مكونات
كل الأكلات. فيه منيو للمشروبات وكوكتيلات الفاكهة، والبيبسي هنا Refill يعني ممكن تملأ كوبايتك أكثر من مرة وسعره 17 جنيه.

الخدمة جيدة، والعاملين متعاونين جدًا
وفاهمين في المطبخ الإيطالي كويس، والجرسون اللي معاك هـ يكتب لك اسمه على غطاء
الترابيزة بالألوان الشمع علشان تنادي عليه لما تحب، بـ يسيب لك أقلام الشمع علشان
تلعب وتشخبط براحتك وأنت منتظر الأكل. باختصار «رومانوز مكروني جريل» أكله حلو
وأصلي، وقعدته كلاسيكية وراقية وأسعاره غالية وخدمته مميزة.