The Definitive Guide to Living in the Capital , Cairo , Egypt

مش باين قوي وسط المحلات الكثير المنورة في تقاطع شارعي النصر واللاسلكي في المعادي الجديدة، ولازم تنزل له 4 درجات سلم علشان تدخل المحل. مطعم «زنجر» موجود أمام ألبان المالكي اللي من علامات الشارع المميزة، وجنب محل فطائر «تيبيستي». المكان من الداخل كبير وفيه عدد من الترابيزات لو عاوز تأكل داخل المحل، لكن أغلب الناس بـ تأخذ طلباتها تيك آواي وفيه توصيل طلبات للمنازل اللي هو أساس شغل المطعم. وممكن تأخذ كام ساندويتش وتقف تأكل أمام المحل في عربيتك.

أول ما تشوف كلمة «زنجر» على المحل أكيد هـ تتوقع دجاج مقرمش بالخلطة السرية زي بتاع كنتاكي، لكن هنا مافيش خلطة سرية، ولا فيه دجاج أصلًا، فيه كبدة ومخ وجمبري وسمك فيليه وسبيط مقرمش وكل حاجة لكن مافيش حاجة “زنجر” زي ما إحنا فاهمين. ومع ذلك قولنا نجرب، ودخلنا أخذنا مكان على أحد الترابيزات وطلبنا وجبة “زنجر” برضه اللي بـ 20 جنيه وبـ يبقى فيها أرز وبطاطس محمرة وسلاطات بجانب اختيارك من الكبدة او الجمبري أو السمك، إحنا أخذنا وجبة جمبري مقلي، وطلبنا طبق مشكل من الكبدة والمخ (الكيلو 120 جنيه).

أجمل حاجة السرعة في الأداء، 5 دقائق وكل الأكل كان أمامنا وتشكيلة رائعة من السلاطات والباذنجان والخيار المخلل وسلاطة الكبدة. الكمية في الوجبة كويسة جدًا بالنسبة لمبلغ الـ 20 جنيه، والجمبري كان متوسط الحجم أو أقل من المتوسط شوية وكان مرشوش عليه خلطة من التوابل والكمون خلت طعمه مميز بس ما كانش فيه أي حاجة سبايسي في الأكل علشان كده كانوا حاطين لنا قرن فلفل أخضر حار على وش كل طبق علشان اللي عاوز يولع الدنيا. الأرز كان فريش ومفلفل على غير العادة في المطاعم اللي بـ تعمل وجبات بأسعار قليلة. الكبدة والمخ هنا أحسن حاجة ممكن تطلبها من المحل، مُقطعين رقيق قوي ومقرمشين ومش هـ تحس بطعم الزيت أو القلي. والميزان هنا كريم والكيلو بخيره، مع سلاطة الكبدة والطحينة هـ تستمتع بوجبتك مافيش كلام.

ممكن تشتري جمبري بالكيلو (الحجم الكبير 140 جنيه) أو (الوسط 110 جنيه) وممكن تشتري أرز بالجمبري (16 جنيه) أو ساندويتشات سبيط أو فيليه (11 جنيه) ونضمن لك أنك مش هـ تقف كثير لحد ما تأخذ طلبك، كله في الإنجاز والطعم كويس وطريقة تقديم الأكل جيدة وفيه عناية بالنظافة وبالخدمة كمان داخل المحل. جرب كبدة ومخ من مكان غير “الشراقوة” اللي مسيطرين على السوق، وأكيد هـ تحب أكلات «زنجر» اللي مش اسم على مسمى زي ما قولنا.