The Definitive Guide to Living in the Capital , Cairo , Egypt

زوبا – Zooba

زوبا: الأكل المصري أخيرًا في سيتي ستارز

  • سيتي ستارز - المرحلة الثانية - الدور الرابع - شارع عمر بن الخطاب - مصر الجديدة
  • مصري
  • 01143376368
  • 9 صباحًا - 11 مساءً
تم التقييم بواسطة
Nada Faied
قيم
قيم الآن
زوبا: الأكل المصري أخيرًا في سيتي ستارز

ما حدش بـ يروح سيتي ستارز غير لو كان هـ يعمل شوبنج ويأكل بعدها من “الفوود كورت” وأغلب الأكل بـ يكون فاست فوود أو مطاعم إيطالية من اللي كلنا عارفينهم، الجديد بقى أن مكان زي “زوبا – Zooba” اللي اشتهر في الزمالك بأكلاته المصرية يفتح هناك.

زوبا موجود في الدور الرابع في سيتي ستارز واخد ركن لوحده كده، هـ تعرفه من الديكور الهائل وبابه الأزرق المشهور اللي بـ يخليك تحس أنك في منطقة شعبية أو في خان الخليلي مثلاً، المكان كله واخد الطابع المصري مش بس في أكله.

نيجي للأكل في زوبا، نبدأ بالثلاجة المفتوحة اللي فيها عصائر مختلفة وجديدة منها الدوم والمانجو بالروزماري والكركديه بالليمون والفراولة بالريحان وعصائر ثانية كثير، طريقة طلب الحاجات اللي في الثلاجة سهلة ومميزة لأنك بـ تروح تختار اللي أنت طلبته بنفسك من الثلاجة، ولا العيش مرصوص كأنه لسه طالع من الفرن، وليه كأنه؟! الحقيقة أنه لسه طالع فعلاً من الفرن كأنك في مخبز، الأكل بـ يتعمل أمامك والحواوشي مثلاً بـ تتفرج عليه وهو بـ يدخل الفرن ويطلع ييجي لك على طول.

مشكلتنا أول ما وصلنا كانت في الزحمة الرهيبة على المكان واللي من الواضح أنهم مش عاملين حسابهم عليها علشان الناس اللي كانت بـ تبقى “Waiting List” وإحنا منهم كانت بـ تقف على رجلها في أي جنب، المهم جاء دورنا وقعدنا وانتظرنا فترة بصراحة لحد ما جاء الجرسون علشان بس يعطينا المنيو، بدأنا في عمل الأوردر، طلبنا حواوشي (16.5 جنيه) وطبق كشري زوبا كبير (19 جنيه) وسلاطة عدس (15.5 جنيه) وعصير رمان (9 جنيه) وعصير ليمون بالنعناع (13.5 جنيه)، الأكل جاء لنا بعدها بثلث ساعة تقريبًا، السلاطة نزلت الأول كانت عبارة عن عدس وجبنة قريش وخص وزيتون ومعاها الصوص اللي بـ يغطي عليه طعم الليمون والبهارات، الحواوشي كان سخن وطعمه حلو، مشكلتنا الوحيدة معاه كانت أن حجمه صغير جدًا بالنسبة لسعره، أما طبق الكشري فكان عادي وما كانش فيه حاجة مميزة ووصل بارد شوية، بعد ما خلصنا دخلنا على الحلو وطلبنا أرز باللبن بالبطاطا بالقرفة كان طعمه حلو جدًا وجديد وبـ ييجي لك في برطمان كده شكله جميل.

وإحنا بـ نأكل اكتشفنا أن فيه “بوورد” وراء الكاشير مكتوب عليها منيو نفس اللي مكتوب على الورق لكن بزيادة جزء فيه فراخ مشوية وكذا نوع من الفراخ، دي حاجة ضايقتنا شوية أنها مش مكتوبة في المنيو وإحنا أخذنا بالنا بالصدفة، ولما سألنا قالوا أن الفراخ بس اللي مش مكتوبة علشان المنيو من فرع الزمالك.

المكان في زوبا نظيف جدًا والخدمة كانت معقولة مش هائلة يمكن بسبب الزحمة اللي كانت موجودة، الأكل عجبنا ومشينا مبسوطين من الروح المصرية اللي موجودة في الأكل والمكان وألوانه الجميلة.

نصيحة 360

لازم تجربوا الحواوشي.

أحسن حاجة

ديكور المكان.

أسوأ حاجة

الأماكن قليلة على عدد الزوار.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح