The Definitive Guide to Living in the Capital , Cairo , Egypt

زوكيني – Zucchini

زوكيني: مطعم رائع اسمه “كوسة” في مول العرب

  • مول العرب - عند البوابة F - بجانب كافيه Paul - أمام النافورة الراقصة
  • عالمي
  • 01112404040
written by
Angie El Batrawy
قيم
قيم الآن
زوكيني: مطعم رائع اسمه “كوسة” في مول العرب

ده بجد مش بـ نهزر! في البداية ما
كناش عارفين نقرأ الاسم بالضبط، وبعدين ما كناش فاهمين معنى الاسم إيه! لكن
الجرسون ألغى الغموض اللى عندنا واستبدله بالدهشة لما قال لنا أن اسم المطعم نطقه «زوكيني
– Zucchini» ومعناه باللغة الإيطالية
“كوسة”!

المكان كلاسيك بـ يغلب عليه
الإضاءة الموف، الاسم بالأبيض والموف على خلفية حجر بني فاتح وموجود على نفس صف كافيه
«بول – Paul»
في الساحة الخارجية للمول عند بوابة F
وهـ تلاقي أمامك النافورة الراقصة علشان تستمتع بها كل ما يبدأ العرض وفى ظهرك
الفوود كورت.

المكان كله مفتوح مافيش قعدة
بالداخل وفيه نجف كبير فى الواجهة، فيه دفايات عند كل قعدة علشان الدفء بالليل وشمسيات
علشان القعدة الصبح، المزيكا الشغالة لطيفة بـ يغلب عليها طابع الترانس، القعدة
جميلة لكن عيبها الوحيد هو الظلام الحالك اللى بـ يسوده لدرجة أننا ما كناش شايفين
المنيو وشغلنا الكشاف بتاع الموبايل علشان نعرف نقرأ الأصناف، كمان المكان بـ يقدم
شيشة ودي حاجة مش على مزاجنا قوي لكن لها ناسها.

الجرسون اللى كان معانا لطيف جدًا
ومتابعنا لو محتاجين حاجة ومستوى الأكل، المنيو فيها أصناف كثيرة قوي للأطباق
والساندويتشات والباستا والبيتزا والمقبلات والشوربة، وفيه منيو ثاني ورقة واحدة
مستقل للمشروبات والتحلية.

بشكل عام من مميزات المكان أن
الأكل تحفة جدًا كله إلى جانب السرعة فى الخدمة، الجرسون وعدنا أنه هـ يجيب الطلب
بعد 20 دقيقة وأبهرنا لما لقيناه جاء في 10 دقائق!

طلبنا فى البداية طبق مقبلات اسمه
زوكيني فرايد بلاتر (40 جنيه) عبارة عن 3 أنواع مقبلات أنت بـ تختارها بشرط تكون
كلها مقلية فـ اختارنا: تشيكن كريسبي، كاليمارى مقلي، وسبرينج رولز وبـ ينزل معاها
3 أنواع صوص منها البلو تشيز ومعاهم خس وطماطم، كل الأصناف كانت ممتازة ومقرمشة
وطازجة لكن كان ممكن السلاطة تكثر شوية علشان كل الطبق كان نواشف فكانت تطري الأكل
شوية.

في الأطباق الرئيسية أخذنا تشيكن
كوردون بلو (60 جنيه) ومعاه اختيارين جانبيين فـ جربنا باستا بالصوص الأبيض وبطاطس
مهروسة، وكمان طلبنا سكالوب بانيه سشنتزل (85  جنيه) وطلبنا معاه خضار سوتيه وبطاطس مهروسة،
الخضار السوتيه كان متشوح مش مسلوق لكن كان طعمه حلو جدًا إلا أن أغلبه كان كوسة
وفلفل مقطع بحجم كبير والبطاطس المهروسة كانت طرية وغنية.

في التحلية طلبنا مشروب “فرابتشينو”
(28 جنيه) عبارة عن كريمة مخفوقة مع موكا وكراميل ولبن كانت جامدة قوي ودفتنا شوية
في السقعة اللى كنا فيها، وكمان ذقنا هوت تشوكلت بالمارشميلو (25 جنيه) وكانت قطع
المارشميلو طرية وسكرها حلو وقوام الشوكولا الساخنة مضبوط، وختمنا الزيارة بتاعتنا
بطبق اختراع اسمه ناتس كب (34 جنيه) وده كان نوعين بولة آيس كريم عليهم كريمة
مخفوقة كثير ومكسرات قطع مختلفة صغيرة، كان جامد جدًا ولكن الكريمة كانت كثيرة
شوية غطى طعمها على طعم الآيس كريم، كنا حاسين أننا بـ نأكل كريمة أكثر ما منها
آيس كريم.

أول ما قعدنا ما نزلش لنا مياه
معدنية (5 جنيه) كعادة أغلب المطاعم لكن إحنا اللي طلبناها، الشيك بـ يُضاف عليه ضريبة
وخدمة مش موضح كام فى المائة، لكن بتاعتنا كانت الضريبة (31.02 جنيه) والخدمة (33.24
جنيه)، قد يكون أسعار بعض الأطباق غالي شوية لكن المكان والأكل جدير بالتجربة
والزيارة مرة ثانية، لكن نتمنى المرة الجاية تبقى الزيارة في نور أوضح، خاصة
بالليل.

نصيحة 360

"زوكيني" لهم صفحة على الفيسبوك.

أحسن حاجة

الأكل بصفة عامة سواء أطباق رئيسية أو تحلية والسرعة فى الخدمة.

أسوأ حاجة

الظلام الحالك اللى كنا فيه.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح