The Definitive Guide to Living in the Capital , Cairo , Egypt

كشري زيزو

زيزو: كشري وفطائر وبيتزا شرقي في مصر الجديدة

  • 3 شارع دمشق
  • مصري
  • 0224544151
تم التقييم بواسطة
Waleed Abuarab
قيم
قيم الآن
زيزو: كشري وفطائر وبيتزا شرقي في مصر الجديدة

في شارع دمشق القريب من ميدان روكسي، وهو بالمناسبة زحمة جدًا طول الوقت؛ فيه
مطعم له باع طويل في عالم الكشري والأكلات الشعبية وهو محل «كشري زيزو». المكان
إحنا عارفينه من زمان وكان من أحسن الأماكن اللي ممكن نأكل من عندها كشري في مصر
الجديدة، لكن لما رحناه مؤخرًا اكتشفنا أنه طور من نفسه كثير وبقى يقدم بجانب
الكشري وطواجن المكرونة فطائر وبيتزا شرقي وساندويتشات لحوم. يعني تجرتنا المرة دي
في «زيزو» ما كانتش كشري وبس.

المطعم من الخارج شكله أحسن من الداخل، أضواءه ولافتاته الخارجية باللون
الأحمر بـ توحي أنه أشيك من كده من الداخل. شكله من جوة مطعم كشري عادي بس على
مستوى أعلى من المعتاد من حيث النظافة والملابس الرسمية للعاملين والمحل مكيف وفيه
شاشات تليفزيون. وفيه مكان داخلي متداري شوية نقدر نقول عليه للعائلات، لكن أفضل
ما في المحل أنه فيه حمامات رجالي وحريمي وده كمان مش معتاد في محلات الكشري.

المنيو مش كبير قوي وده كان مريح بالنسبة لنا، مقسم لكشري وبيتزا وفطير
حادق وحلو ومشلتت وساندويتشات وحلويات. الأصناف مش كثير في كل قائمة. الكشري
بحجمين بس بـ 4.50 و 6.50 جنيه. البيتزا هنا شرقي بس مش إيطالي، يعني مش بـ تفرق
عن الفطير حاجة غير أنه بـ يبقى فيها موتزاريلا والإضافات عليها من فوق مش من
الداخل، لكن بنفس عجينة الفطائر. أسعار البيتزا من 16 لـ 35 جنيه وكلها حجم واحد
وسط يكفي لفرد واحد أو فردين مش جعانين قوي. الفطائر الحادقة من 11 لـ 28 جنيه،
والحلوة من 4 لـ 16 جنيه. فيه قائمة اسمها (جديد مع زيزو) فيها طواجن باللحمة
المفرومة (6 جنيه) وحواوشي إسكندراني (6.50 جنيه) وساندويتشات كبدة وسجق (3.50
جنيه) وعيش محمص بالثوم (1.50 جنيه).

طلبنا بيتزا زيزو المشكلة باللحوم (35 جنيه) وعليها إضافة جبنة رومي (3
جنيه) وكانت مفاجأة من حيث الطعم وجودة الإضافات خاصة المشروم والبسطرمة
والسوسيس، لكن اللي ما كانش حلو فيها هو اللحم المفروم اللي ما كانش مستوي كويس.
لكن طعمها عمومًا لذيذ وحجمها مثالي لفرد واحد جعان قوي.

الحواوشي الإسكندراني هنا شبه الكالزوني اللي في المطاعم الإيطالية، عجين
الفطير بـ يتم حشوه باللحم المفروم بالصلصة وبـ يستوي في الفرن لحد ما ينضج ويبقى
شبه الكرواسون. صنعته حلوة لكن طعمه مش تحفة زي شكله. كان لازم نجرب الكشري بما أننا
عند «زيزو» وطبعًا مافيش خلاف على صنعته وطعمه ونظافته وكل حاجة.

الخدمة مترددة شوية وينقصها بعض الخبرة، يمكن على حظنا بس الجرسون الي كان
معانا كان لسه جديد، لكن في النهاية الطلب بـ ييجي لك زي ما أنت عاوز بالضبط وده
المهم. فيه فطائر وبيتزا صيامي وممكن يعمل لك كشري بالكبدة حسب الطلب، وعنده حلويات
محلات الكشري المعهودة زي الأرز باللبن بإضافات من القشطة والعسل. عجبنا «زيزو»
وهـ يبقى من أماكننا المفضلة في زيارتنا المتكررة لمصر الجديدة.

نصيحة 360

«كشري زيزو» له فروع في ميدان الجيزة والمنيب، وعنده خدمة توصيل.

أحسن حاجة

فطائره حلوة زي الكشري بتاعه وأسعاره معقولة والقعدة فيه مسلية.

أسوأ حاجة

ما عجبناش اللحم المفروم في كل الأصناف.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح