The Definitive Guide to Living in the Capital , Cairo , Egypt

مطاعم
سانتانا – Santana

سانتانا: أكل رائع وديكور بروح الكريسماس في المهندسين

تم التقييم بواسطة
Angie El Batrawy
قيم
قيم الآن
سانتانا: أكل رائع وديكور بروح الكريسماس في المهندسين

مافيش مكان نروحه إلا ونلاقي روح
الكريسماس والعام الجديد مخيمه عليه.. وده شيء طبيعي لأن الاحتفال باليوم ده له
بهجة خاصة عند الكل سواء صغار أو كبار وبـ يكون سابق لليوم ده يمكن من أول شهر
ديسمبر.

في شارع النخيل المتفرع من البطل
أحمد عبد العزيز وبالقرب من مطعمي «جافا لافا – Java Lava» و«ستيك أوت – Steak Out» هـ تلاقي مطعم ولاونج «سانتانا –
Santana» زي ما بـ يسميه القائمين عليه، المكان
كله خشب من بره ومن الداخل، مكون من دورين، وأنت قاعد تحت وباصص لفوق هـ تلاقي جسر
بـ ينتقل عليه الناس، فيه جزء في الدور الأول لما تدخل مفتوح بـ يطل على جنينة. المكان
بـ يقدم شيشة وأنواره خافتة.

قعدنا فى الدور اللى تحت وكان شكل
الجسر حلو جدًا فوقنا، والمكان كله كان مزين بزينة ملونة وستائر منورة وراء الكنب وفي
كل جزء فيه شجرة كريسماس عليها نفس الشىء، أول ما تدخل المكان ناحية الشمال فيه
كاونتر كبير وبار (مش لشرب الخمور) بـ يخدموا الناس فيه وفوقه شاشة تليفزيون مشغلة
بصوت عالي قناة الأغاني.   

المنيو شكلها لطيف وشاملة أى
عناصر أو أطباق ممكن تشوفها فى منيو مطاعم ثانية، طلبنا في البداية شوربة تشيكن
مشروم (14.99 جنيه) وكانت رائعة وسخنة والفراخ كان مذاقها حلو ومستوية كويس، دخلنا
بعدها على الثقيل وهو الأطباق الرئيسية، طلبنا جريلد تشيكن (62.99 جنيه) ونزل
معاها خضار وبطاطس محمرة لأنك بـ تختار طلبين جانبيين معاه (ما عندهمش بطاطس
بيوريه والاختيار الثالث هو الأرز)، الخدمة كان توقيتها كويس ما انتظرناش كثير
والطبق كان شكله يفتح النفس، على الرغم أننا كنا نصف بطن لكن من حلاوة الطبق أكلناه
كله!

في التحلية ما كناش قادرين فـ
قلنا نأخذ حاجة في المعقول ومش ثقيلة ولا كبيرة فـ طلبنا فروت سلاط بالآيس كريم
(26.99 جنيه)، المفاجأة أننا لقينا كأس كبير جاء لنا محطوط فيه كمية فاكهة مش
طبيعية وطالعة من كل حتة وحجمها كبير: تفاح، برتقال، موز، كيوي، أناناس ومعاهم
بولتين آيس كريم من اختيارك وتحت ده كله برضه فاكهة مقطعة قطع صغيرة، كان قوي جدًا
وكان وجبة مغذية لكن العيب الوحيد أن الآيس كريم فوق فأنت مش هـ تعرف تأكله مع
الفاكهة لأنك لازم تلحقه قبل ما يسيح وبعدها تكمل باقى الفاكهة اللى تحت لوحدها.

الطلب بـ يضاف عليه خدمة (12.60
جنيه). اللي إحنا اكتشفناه بقى لما جينا نحاسب على الطلب بتاعنا أن “سانتانا”
كان زمان اسمه «سيتي توك – City
Talk
» لكن قفل وفتح بدلاً منه، لأن لقينا مكتوب في الشيك الاسم القديم
ومافيش أى ذكر أو تنويه أن بقى اسمه “سانتانا” ودي كانت حاجة غريبة!

نصيحة 360

ما تقعدش قريب من السماعات لأن الصوت عالي.

أحسن حاجة

المكان خشب فبـ يعطي دفء للمكان والأكل والخدمة جيدين.

أسوأ حاجة

موضوع الشيشة لأننا مش من محبيها خالص!

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح