The Definitive Guide to Living in the Capital , Cairo , Egypt

شارع أنور المفتي شارع هادئ بـ يقطع الشوارع الأهم في مدينة نصر زي عباس العقاد والطيران، هادئ صحيح لكن مليان كافيهات ومطاعم على كل شكل ولون ومنها كافيه ومطعم «سترانو جريل – Strano Grill».
مكان متميز شكله من الخارج يوحي بالهدوء برضه ولكن الحقيقة أنه غير كده تمامًا. مقسم جزئين؛ مساحة خارجية مفتوحة فيها حوالي 8 ترابيزات وفيها شاشة LCD كبيرة وبروجيكتور، وكل القاعدين هنا تقريبًا بـ يلعبوا طاولة وبـ يشيشوا. أول انطباع أخذناه أن المكان فيه جو من المرح وأكد لنا ده الابتسامات على وجوه الموجودين والصوت العالي “بس بطريقة مش مزعجة”. وقت ما كنا هناك كان شغال مباراة كرة قدم. أما الجزء الثاني المغلق بـ يتميز عن باقي المطاعم والكافيهات المغلقة بأنه واسع وبين الترابيزات مساحات كبيرة، يعني مافيش ترابيزة متضايقة من دخان أو صوت الترابيزة اللي جنبها، وفيه شاشات بين كل مجموعة ترابيزات، وفيه كمان ركن حلو كده فيه حوالي 3 ترابيزات بعيد عن دوشة التليفزيون والصوت العالي “بس فيه دخان برضه” مناسب أكثر للقعدات الرومانسية أو العائلات.
المنيو هنا عالمي تقليدي فيه أطباق رئيسية ومقبلات وبيتزا وساندويتشات وعصائر فريش وسموزي بجانب منيو الحلويات. أسعار أطباق الدجاج الرئيسية تتراوح بين 50 لـ 56 جنيه واللحوم من 60 لـ 75 جنيه وفيه كمان فاهيتا لحم ودجاج وأطباق أسماك، لكن إحنا مش جربناها علشان خوفنا المطبخ هنا ما يبقاش متخصص ويعمل حاجة أي كلام! لكن رغم كده المنيو يفتح النفس وقررنا نخوض تجربة الأكل كاملة، وده كان قرار كويس.
كومبو مقبلات المحل (44 جنيه) في الأول كان مهم علشان نعرف مستوى المطبخ، فيه تندر تشيكن وكاليماري ومشروم فريش وسبرنج رولز مع الصوصات المختلفة، بداية موفقة جدًا. بعدها بدأت تتوافد أطباقنا الرئيسية. طبق دجاجPrimavera  وهو عبارة عن قطع دجاج مخلية ملفوفة مشوية على شكل حلقات محشية بالنعناع والزعتر ومغطاة بصوص جبن البارميزان اللذيذ، طبق أكثر من رائع (55.99 جنيه) وفي اللحوم طلبنا Beef Emansee بسعر 76.99 جنيه وفيه شرائح اللحم الفيليه عليها صوص مشروم وفلفل أسود، الطبق ده كان من ترشيحات الجرسون وعجبنا المذاق والكميات والتسوية العبقرية. وجربنا كل الأصناف الجانبية زي السوتيه “نص نص” والبطاطس المحمرة والأرز لكن البطاطس البيوريه اللي كانت ضمن الأصناف الجانبية كانت رهيبة وطعم زيت الزيتون فيها حلو قوي وطرية جدًا ولها مذاق فريد.
بعد الوجبة المحترمة طلبنا كوكتيل هاواي (19.99 جنيه) وهو عبارة عن شراب نعناع وصودا وعصير أناناس، منعش وله لسعة خطيرة وخصوصًا بعد الأكل. الآيس كريم كمان هنا حاجة مفتخرة جدًا، خاصة مع قطع الشوكولاتة الصغيرة اللي كانت فيه، البولة الواحدة بـ 8 جنيه.
أول سبب حببنا في المكان كان الخدمة الممتازة وسرعة وانتباه العاملين وابتسامتهم الحقيقية “مش المفتعلة”. الحيوية اللي في المكان سايبة أثرها على الموظفين زي ما كان لها أثرها على الزبائن، النظافة جيدة والجو العام يشجع على القعدة لفترات أطول. تجربتنا في «سترانو جريل» كانت مجرد اكتشاف لمكان هـ يبقى في قائمة المفضلين لأطول فترة ممكنة خاصة لما نقرر نتفرج على مباراة مهمة مع أكلة حلوة أو كوكتيل ظريف.