The Definitive Guide to Living in the Capital , Cairo , Egypt

ستيك كورنر – Steak Corner

ستيك كورنر: ستيك تحفة وفوندو شوكولاتة أحلى فى المهندسين

  • 45 شارع ميشيل باخوم
  • عالمي
  • 01005546309
تم التقييم بواسطة
Angie El Batrawy
قيم
قيم الآن
ستيك كورنر: ستيك تحفة وفوندو شوكولاتة أحلى فى المهندسين
فى شارع الدكتور ميشيل باخوم القريب من نادي الصيد واللى مليان مطاعم زي “الست حسنية” و”كورتيجيانو” هـ تلاقى على الشمال فى بدايات الشارع مطعم «ستيك كورنر – Steak Corner» أمام محل إكسسوارات المنزل «أت هوم – @home»، مؤخرًا عدد المطاعم اللى فيها كلمة “ستيك” انتشرت كثير زي “ستيك أوت” و”ستيك تايم”.. لكن الفكرة مش بالاسم.. الى يهمنا هو الحرفية والجودة.. وده اللى رحنا علشان نكتشفه هناك.
أول ما دخلنا رحب بنا الجرسون ترحيب حار حسسنا أننا أصحاب المكان واختارنا المكان اللى قعدنا فيه، المكان بـ يغلب عليه اللون الفضي وفيه شلال مياه على الجنب عامل روح حلوة للمكان وكمان زرع عليه إضاءات جميلة، فيه شاشات فى كذا حتة بـ تعرض أخبار لكن استغربنا أنهم حاطين لوجو Samsung على الحوائط لدرجة تحس أنه Sponsor لهم.

المنيو كبيرة ومتنوعة وشكلها يفتح النفس على الأكل، بدأنا بشوربة الخضروات على الطريقة الإيطالية Minestrone soup (8.99 جنيه)، “ستيك كورنر” عندهم فى قسم المقبلات أصناف بـ ينفردوا بها أول مرة نشوفها زي عجائن بالخضار (10.99 جنيه) محشية بالبصل والجزر والكرنب الأبيض والكوسة، وزيها بالسي فوود (14.99 جنيه)، وكانيلونى بالمشروم أو السبانخ (16.99 جنيه) وفيه بالدجاج (19.99) أو السي فوود برضه (24.99). 
مافيش حد أدنى للطلبات، فى الأطباق الرئيسية طلبنا بيف مع صوص السبانخ بالصنوبر (69.99 جنيه) وطلبنا أن تسوية البيف تكون Well-Done، وكمان جريلد تشيكن مع الصوص الأبيض (45.99 جنيه) واختارنا معاهم بطاطس بيوريه وخضار سوتيه. نزل لنا زجاجة مياه صغيرة (4.99 جنيه) وبعد ما بـ تطلب الأكل بـ ينزل لك سبت Bread Sticks فيه 4 أنواع كل نوع عليه زيتون أو جبنة رومي ..إلخ، كان لذيذ جدًا وكانت بداية حلوة لقعدتنا خاصة لما ذقناها كمان مع الشوربة اللى جاءت لنا سخنة جدًا والخضار كان طازج، دي أول مرة لنا نذوق صوص السبانخ والصنوبر، بس بعد أول قطمة وقعنا فى غرامه، كان قوام الصوص حلو جدًا والخليط ده مع البيف اللى كان تسويته رائعة مزيج مثالى، الخضار السوتيه كان حلو جدًا والبيوريه كمان، ما كناش عاوزين الطبق يخلص. الفراخ المشوية بصوص الليمون برضه كانت تحفة فى التسوية والطعم.. ما تتخيرش عن الأولى إلا أننا استمتعنا بالبيف أكثر، وده يثبت أنهم «ستيك كورنر» بجد.

لما جئنا نطلب التحلية فرحنا الجرسون بأحلى مفاجأة ممكن يتمناها حد، قال لنا أن المطعم هـ يقدم لنا فوندو الشوكولاتة مع آيس كريم الفانيليا هدية مجاملة من المكان، وكمان تفاجأنا أنهم جابوا لنا اثنين مش واحدة بس، كرم بجد، ودى كانت خاتمة لطيفة جدًا بعد غذاء ألطف، الشوكولاتة كانت سخنة وبـ تسيح بطريقة تنومك مغناطيسيًا وهى نازلة على الكيك وفوقهم آيس كريم الفانليا اللى عادل الدسم اللى ممكن تحسه من أكل كيك شوكولاتة مع صوص شوكولاتة برضه، بجد كانت خطيرة، وعقبال ما أكلناها طلبنا كمان من المشروبات مورنينج كيت كات (18.99 جنيه) اللى للأسف ضيعت لنا فرحتنا بالفوندو لأنها كانت خفيفة قوي وما كانتش باردة خالص، فكنا بـ نحس أننا بـ نشرب حاجة مفتقدة للطعم.
المكان فيه 12% خدمة و10% ضريبة مبيعات، والكوفر بـ 2 جنيه، وعلى فكرة المكان مالهوش فروع ثانية، يعني “ستيك كورنر” اللى فى المعادي الجديدة واللى كتبنا عنه قبل كده مش تابع له، إحنا اتبسطنا فى «ستيك كورنر» وأكيد لنا زيارة ثانية هناك علشان نستمتع بأكله التحفة وكمان نستكشف منيو المقبلات.

نصيحة 360

وأنت ماشي المطعم بـ يعطيك هدية منيو خدمة التوصيل وكمان معاه كوبون خصم 20% لما تزور "ستيك كورنر" ثاني.

أحسن حاجة

صوص السبانخ بالصنوبر، وفوندو الشوكولاتة.

أسوأ حاجة

مشروب المورنينج كيت كات.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح