The Definitive Guide to Living in the Capital , Cairo , Egypt

سكاليني – Scalini

سكاليني: مطعم إيطالي أنيق في موقع مثالي في المعادي

تم التقييم بواسطة
Waleed Abuarab
قيم
قيم الآن
سكاليني: مطعم إيطالي أنيق في موقع مثالي في المعادي

مافيش أجمل من الأماكن اللي بـ تكتشفها بالصدفة وأنت بـ تتمشى بلا هدف في الشوارع، وبـ تكتمل سعادتنا لما نلاقي المكان كمان طلع كويس ونحب تجربتنا فيه من أولها لآخرها. الصدفة السعيدة خليتنا نعدي أمام مطعم وكافيه «سكاليني – Scalini» الموجود في نقطة هي الأجمل في قلب المعادي، بالقرب من منطقة دجلة والمعادي القديمة والجديدة جراند مول، ميدان ڤيكتوريا من الأماكن المميزة جدًا هنا، والفيلا الأنيقة اللي بـ يحتلها سكاليني خليته واحد من أجمع الأماكن من حيث الشكل والتصميم من الخارج، إحنا داخلين فيلا بمعنى الكلمة، بحديقة خارجية بتراس بساحة لعب للأطفال بصالة داخلية واسعة، كأننا معزومين عند ناس أصدقائنا في بيتهم، بس أصدقاء أغنياء حبتين.

دخلنا في الحديقة الخلفية للفيلا بالقرب من منطقة لعب الأطفال والمراجيح، مش بس علشان كان معانا أطفال؛ لكن علشان القعدات العادية في الجزء ده عبارة عن مرجيحة عملاقة للكبار، زي الموجودة في بعض فروع مطاعم تشيليز، أخذنا مكاننا المميز البعيد عن التليفزيونات والموسيقى العالية ودخان الشيشة، وبدأنا نتأمل المكان من الداخل، وكان ما يقلش أناقة عن شكل الفيلا من الخارج، كده مش فاضل غير الأكل والخدمة ويبقى «سكاليني» واحد من أجمل مطاعم القاهرة شكلًا وموضوعًا.

منيو إيطالي غني بالأصناف والأطباق المتنوعة، وفيه طبعًا بيتزا وباستا ولازانيا، لكن المميز هنا منيو الإفطار والمخبوزات المختلفة والمشروبات الصباحية، ونفتكر أن هنا من أحسن الأماكن اللي ممكن تأخذ فيها إفطارك لو كنت من سكان المعادي أو بـ تشتغل هناك، لأن القعدة هـ تفتح نفسك لليوم وللشغل ده أكيد. وجبة إفطار فيها كل حاجة تقريبًا من ساندويتش وكرواسون وكيك وشاي وعصير فريش بـ 45 جنيه.

جربنا الأكلات الإيطالية اللي هم متميزين فيها على حسب كلام الويترز، وهي الدجاج الإيطالي (57 جنيه) والبيف فيليه الكلاسيكي (86 جنيه) وطبق مقبلات متنوعة أو سكاليني كومبو (64 جنيه).  طلبنا الأوردر ينزل مرة واحدة، وحصل ده فعلًا وده كانت أول علامة أن الخدمة هنا جيدة ومركزين في اللي بـ نقوله. طبق المقبلات ممتاز، كل حاجة فيه مقرمشة ومقلية كويس من غير ما تكون مزيتة، أصابع الموتزاريلا وحلقات البصل والدجاج التندر والسبرنج رولز، وصوصات الساور كريم والمايونيز، طبق كبير يكفي 2 أو 3 أشخاص بجانب الأطباق الرئيسية.

الـ Italian Chicken هي صدور دجاج مشوية وعليها طبقة من الموتزاريلا والتوابل المرشوشة، طعمها حلو بس التسوية كانت زيادة شوية خلت قطع الدجاج ناشفة، بس محتفظة بطعمها اللذيذ. طبق البيف فيليه بصوص المشروم البني، الصوص حلو والمشروم فريش، لكن اللحم نفسه له نكهة متغيرة مش زي ما إحنا متعودين عليها، الطبق في مجمله كويس، لكن كنا نتمنى أن اللحم يكون فريش أكثر من كده. كل الأصناف الجانبية من أرز وبيوريه وبطاطس محمرة وسوتيه كانت كويسة، لكن لمسة التميز اللي تخلينا ننبهر بالأكل كانت مش موجودة للأسف، لكن هـ يفضل «سكاليني» واحد من الأماكن اللي هـ نيجي نأكل عندها وإحنا مطمئنين أننا هـ ننبسط.

كيك الآيس كريم بالفواكة (28 جنيه) عبارة عن كيكة تحتها وفوقها طبقات من الآيس كريم بالفراولة والفانيليا، وعليها موز وتفاح وسيرب الفراولة، دسمة جدًا وغنية بالطعم، تكفي أكثر من شخص بعد الوجبة الرئيسية.

زي ما قولنا الخدمة هنا أكثر من ممتازة، طاقم ضيافة كبير ومركز في كل التفاصيل، حتى مع الأطفال اللي في منطقة الألعاب، ممكن تأخذ أسرتك وأطفالك أو أصدقائك وتروح وأنت مطمئن، هـ تحب قعدة وموقع «سكاليني» أكيد، وخليك فاكر أننا في كايرو 360 اللي عرفناك عليه.

نصيحة 360

المكان من وقت للثاني بـ يعمل سهرات سالسا وكاريوكي، ممكن تتابعهم بالتليفون.

أحسن حاجة

موقع الفيلا، وفكرة أنها فيلا أصلًا.

أسوأ حاجة

فيه أطباق رئيسية للحوم أسعارها مبالغ فيها: 185 و190 جنيه للطبق!

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح