The Definitive Guide to Living in the Capital , Cairo , Egypt

مطاعم
سنووز – Snooze

سنووز: خدمة ممتازة وأكل مخدوم كويس في الشيخ زايد

Snooze EG أكتوبر الشيخ زايد برجر خدمة ممتازة سنووز مطاعم
  • سكاي سنتر فيل – Sky Center Ville في الشيخ زايد
تم التقييم بواسطة
Angie El Batrawy
قيم
قيم الآن
سنووز: خدمة ممتازة وأكل مخدوم كويس في الشيخ زايد

فيه معايير كتيرة بناء عليها الناس بتختار هتخرج تاكل فين أو تقابل أصحابها، فيه اللي بيختار الـ View، وفيه اللي ما بيتنازلش عن جودة الأكل، وبما أننا في موسم كأس العالم فتقريبًا اللي بيحرك 90% من المصريين هو إيه الأماكن اللي بتعرض الماتشات، ويا سلام بقى لو المكان ده فيه خدمة كويسة وأكل حلو، وده اللي الصراحة لقيناه خلال زيارتنا لمطعم سنووز – Snooze في الشيخ زايد.

سنووز موجود في سكاي سنتر فيل – Sky Center Ville في الشيخ زايد، المكان مقسم لـ indoor وOutdoor، الأخير فيه شاشة ضخمة بره للماتشات، وجوه فيه شاشات تليفزيون صغيرة، الديكور مريح ومودرن بيغلب عليه ألوان الأسود والأصفر والأبيض، الحوائط بيضاء وعليها سبورات سوداء مكتوب عليها المنيو بشكل جميل، وفيه أنابيب صفراء في السقف عجبتنا جدًا وكمان جزء الـ indoor فيه إزاز علشان تبص على القعدة اللي بره.

حجزنا قبل ما نروح، أول ما وصلنا استقبلنا مدير المكان بابتسامة وقعدنا جوه لأن الدنيا كانت حر، كل الجرسونات بلا استثناء ذوق جدًا وما بيفوتوش تفصيلة ومركزين معاك (بس بدون مضايقة) وروحهم حلوة، نزل لنا 2 منيو: الأولى خاصة بكأس العالم (لإن زيارتنا للمكان كانت أثناء كأس العالم) عاملين فيها أوفر على وجبات بيتزا مع حلو، أو سلاطة مع مشروب أو حلو، وساندويتش مع مشروب وحلو، أو طبق رئيسي مع مشروب أو لو عاوز حلو بس، أكلات خفيفة وسريعة تاكلها وأنت بتتفرج على الماتش كأنك في بيتك.

والمنيو التانية عبارة عن ورقة ضخمة وش وظهر (منيو المطعم الأساسية)، مقسمة لإفطار وشوربة ومقبلات ووجبات للأطفال وسلاطات وباستا وبيتزا وساندوتشات وأطباق رئيسية.. إلخ زي أي منيو.

وإحنا رايحين المكان كنا مقررين أننا لازم ندوق البرجر بتاعهم لأنه عمالين ينزلوا بوستات مغرية له على صفحتهم على الفيسبوك، فاختارنا برجر بالبصل المكرمل Caramelized onion Burger بـ 73 جنيه، ومن الأطباق الرئيسية أخدنا فراخ مشوية (83 جنيه).

نزل الأكل وشكله يفتح النفس، البرجر كان معاه بطاطس محمرة محطوطة في باسكيت أسود شيك وطبق جانبي صغير فيه توابل للبطاطس، والبرجر نفسه عليه بصل مكرمل وطماطم وخس، طعم تتبيلة البرجر كانت مميزة جدًا ومختلفة خاصة كمان مع البصل، عجبتنا جدًا بس كان نفسنا حجمها يكون أكبر لأن العيش كان حجمه أكبر منها، البطاطس كانت لطيفة، رفيعة ومقرمشة من بره، بس إحنا شخصيًا بنحب البطاطس التخينة شوية.

الفراخ المشوية عبارة عن 3 قطع بتختار معاها 2 صنف جانبى، اختارنا بطاطس وسوتيه، تتبيلة الفراخ وتسويتها برضه كانت حلوة جدًا، ما كانتش ناشفة وكميتها كويسة، السوتيه كان نص مستوي بس إحنا بنحب الخضار بيقرمش ما يبقاش مهري، في الأول نزلوا لنا مع الطلب أرز بدل البطاطس بس بدلوه لنا من غير تكلفة زيادة، الأرز برضه كان طعمه وتسويته كويسين.

ندخل بقى على المشروبات والحلو، اختارنا بيتزا بالتفاح المكرمل Caramelized Apple Pizza بـ 62 جنيه، وشدنا أول مرة نشوف ميلك شيك بالدايجستف والنوتيلا (51 جنيه) فقررنا نجرب، نزل لنا الأول الميلك شيك، عليه صوص شوكولاتة من فوق ومارشميللو وقطع بسكويت دايجستف، زي ما بيقولوا كده “اختراع يا كوتش”، طعمه كان رائع وخفيف على عكس توقعنا، اللي كان لطيف بس ما عجبناش بدرجة كبيرة بيتزا التفاح، عبارة عن عجينة بيتزا عليها قطع تفاح وصوص كراميل مع بولة آيس كريم، زي فطيرة التفاح بس العجينة بتاعة بيتزا رفيعة مش فطيرة، ما تقبلناهاش شوية يمكن علشان كانت رفيعة أوي أو إحنا اتعودنا أن فطيرة التفاح بتبقى سميكة وطرية مش رفيعة وأطرافها بتقرمش، بس عامة كانت كطعم كويسة والآيس كريم خفف من السكر في الكراميل.

زيارتنا لمطعم سنووز كانت مريحة وممتعة واللي ساعد على ده كمان الخدمة الممتازة، المكان بالنسبة لنا بقى على قائمة الأماكن في زايد اللي هنكرر زيارتها.

نصيحة 360

احجز قبل ما تروح خاصة لو عددكم كبير أو في الويك إند.

أحسن حاجة

كل حاجة.

أسوأ حاجة

بيتزا التفاح ما عجبتناش شوية.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح