The Definitive Guide to Living in the Capital , Cairo , Egypt

أكتر حاجة ممتعة بالنسبة لنا أننا نجرب حاجة جديدة، ساعات بـ تبقى تجربة ممتعة وساعات بـ يبقى مقلب، المتعة مش في أنك جربت حاجة ما تعرفهاش وطلع حظك حلو فـ عجبتك، المتعة أنك غامرت وخرجت بره صندوقك، بره الحاجات اللي أنت متعود عليها ومتعود تريحك، وفي الأغلب معظم الناس اللي بـ تحب السوشي كده.

قررنا نروح بنفسنا هناك وكنا متحمسين جدًا، إلا أنه بمجرد لما وصلنا مدينة نصر وكلمنا المطعم علشان نتأكد من العنوان.. اكتشفنا أن المطعم بـ يوصل بس، وطبعًا دي كانت صدمة عظيمة في الأول إلا أن ده ما منعناش من الاستمرار في التجربة بل بالعكس، رحنا وقعدنا في الاستقبال، واختارنا اللي إحنا عاوزينه من المنيو وفي أقل من 40 دقيقة كان الأكل جاهز أمامنا.

أول ما شفنا منيو “سوشي شايك – Sushi Shack” لفت نظرنا جدًا تعدد أصناف السوشي واختلافها، بس أكثر حاجة جذبتنا “السوشي بالكنافة” (64 جنيه للرول/ 6 قطع) اللي مكونة من سلامون تيمبورا وجمبري تيمبورا وأرز وجبنة، من بره كان طعم الكنافة الهشة والمقرمشة ومن جوه كانت طرية جدًا بالجبنة الخفيفة والأرز الطازة ومافيش حاجة ضايقتنا غير أن الكنافة كانت قليلة وكان نفسنا تبقى أكتر بالذات كمان لما تغمسها بالترياكي صوص (7 جنيه).

وثاني حاجة جديدة وغريبة لفتت انتباهنا “ماكي باربكيو بلحمة ثعبان البحر” Maki BBQ Eel بـ 40 جنيه للرول/ 6 قطع. وأول ما بـ تدوقها بـ تحس بملوحة ولذة خفيفة بـ تمتزج مع حلاوة الباربكيو صوص وبـ تبقى أحلى لما تغمسها في ترياكي صوص (7 جنيه).

بعد كده أكلنا “سوشي نياجيري بالجمبري” (20 جنيه للقطعتين)، كان طازة وفريش، بس للأسف ما عجبناش سوشي “النايجيري بالأخطبوط” (18 جنيه لـ 4 قطع بدون أرز) لأنه كان مطاطي كده ومش بـ يتندغ بسهولة.

كمان سوشي “النيجيري كليماري تيمبورا” (19 جنيه للقطعتين) كان حار ومتبل حلو، لكن أحلى واحد فيهم كان سوشي “النيجيري بالسلامون المدخن وصوص الليمون” (24 جنيه للقطعتين) لذاعة الليمون مع السلامون وبيض السمك المدور (الكافيار) اللي من فوق كان حاجة فوق الوصف، كأنك وسط البحر وأخدت جزء من جماله وسحره على لسانك ومشيت وبدون تعب أو رملة أو غطس.

أجمل حاجة في الأكل أنك تأكل مع حد أنت بـ تحبه وتجرب معاه حاجة جديدة، فلو نفسك في يوم تجرب سوشي اطلب “سوشي شايك” والطلب هـ ييجي لك في أي مكان في مصر إلا الهرم للأسف علشان الزحمة.

كمان هو عامل سوشي كومبو بأسعار أقل بـ تجمع لك كل الأنواع اللي بـ تحبها وبـ تنقي النوع اللي يناسبك من المنيو على صفحتهم في الفيسبوك.