The Definitive Guide to Living in the Capital , Cairo , Egypt

حي المهندسين
دائمًا مليان بالمطاعم، شوية منهم جامدين، وشوية لا بأس بهم، وشوية سيئين جدًا.
رغم أننا عدينا على «سوليدير – Solidaire»
مليون مرة، لكن الأسبوع اللي فات بس قررنا نزوره.

أغلب
المكان عبارة عن قعدة مفتوحة في الهواء الطلق؛ جوه هـ تلاقي مكان للدي جي بار،
وكام كرسي، التراس كبير شوية وأغلب الترابيزات تكفي 4 أفراد وأكثر. فيه نخل
وشلالات مياه على التراس، وأغلب الديكور عبارة عن أضواء وامضة. الموسيقى بـ يقدمها
الدي جي، وأقل ما يقال عنها أنها بشعة. مش بس بشعة؛ لكنها كمان صوتها عالي جدًا
لدرجة أنه من المستحيل أنك تعرف تتكلم مع اللي جنبك.

المنيو
كبير جدًا ويشمل ساندويتشات، بيتزا، مكرونات، وكمان طواجن سمك وميكس جريل تكفي
لخمسة أشخاص، الحاجة الوحيدة الناقصة في المنيو هي الأكل الصحي؛ مفيش غير نوعين
سلاطة على المنيو، في المقبلات جربنا فرفلي البلو تشيز (29 جنيه)، وكطبق رئيسي
جربنا فيليه اللحم بصوص الفلفل الأسود (69 جنيه) وشرائح البتلو بالصوص الكريمي (62
جنيه).

الأكل
كله نزل في نفس الوقت بعد ما استنينا حوالي 45 دقيقة، على ما كنا منتظرين الأكل،
كان الجرسونات بـ يسلونا برغيهم الودود زيادة عن اللزوم لدرجة أننا ماكُناش قادرين
نأخذ راحتنا.

الفرفلي
بالبلو تشيز طلعت في الآخر فوسيلي، ورغم أن كان باين فيها بقايا بلو تشيز، لكن
الجبنة كانت أساسي بارميزان أو رومي. المكرونة كان المفروض يبقى معاها فراخ بس
مالقينهاش، طبق الفيليه بصوص الفلفل الأسود الرئيسي كان حلو على عكس المتوقع، رغم
أن اللحم كان مستوي بالكامل ومش نص نص زي ما طلبناه. صوص الفلفل الأسود كان لذيذ،
حار، وكريمي.

شرائح
البتلو بالصوص الكريمي غالبًا ما كانش لحم بتلو. إحنا أصلاً كُنا بـ نشك في الطبق
ده لأن لمّا طلبنا اللحم البتلو، الجرسون سألنا لو عاوزينه لحم أو فراخ. اللحم كان
طعمه مزِز شوية، وكمية الصوص كانت كثيرة جدًا، والطبق نزل معاه خضار كصنف جانبي.

رغم
أنه واحد من الأماكن المفتوحة القليلة قوي في المهندسين، لكن جودة الخدمة والأكل
في «سوليدير» ما أبهرتناش خالص، ممكن كان مجرد توقيت مش مناسب أو حظ وحش، لكننا
لسّه ماقررناش نروحه ثاني.