The Definitive Guide to Living in the Capital , Cairo , Egypt

مطاعم
شامي فوود

شامي فوود: مطعم شامي شكلًا ومضمونًا في مصر الجديدة

تم التقييم بواسطة
Waleed Abuarab
قيم
قيم الآن
شامي فوود: مطعم شامي شكلًا ومضمونًا في مصر الجديدة

ضمن مجموعة المطاعم الشامية وبالتحديد السورية اللي فتحت مؤخرًا اكتشفنا مطعم جديد موجود في ميدان الإسماعيلية في مصر الجديدة اسمه «شامي فوود» أو “شامي Food” زي ما مكتوب عليه من الخارج.

المحل موجود في مكان مليان مطاعم زي «عمو حسني» وكبدة ومخ الشرقاوي و«بيسترو» لكن هو السوري الوحيد تقريبًا اللي في المنطقة وعلشان كدة الإقبال عليه كان كبير جدًا لكن من أهل سوريا اللي ساكنين في مصر الجديدة وقريب منها، إحنا بالفعل كنا المصريين الوحيدين داخل المكان وقت زيارتنا، كل العاملين والشيفات والزبائن كمان من سوريا، وده معناه أن «شامي» بـ يعمل الأكل السوري بالطريقة السورية الأصلية اللي أهل سوريا في مصر أكيد مفتقدينها، وعلشان كدة بـ ييجوا هنا بكثافة علشان يتذوقوا الطعم اللي بـ يحبوه، لأن مهما حبوا الأكل المصري أو حتى المطاعم السورية اللي في القاهرة وبـ توازن بين الذوق المصري والشامي، أكيد من وقت للثاني بـ يحنوا لمطاعم ومطابخ بلادهم اللي بـ مجرد ما بـ تدخل فيها بـ تنسى أنك في بلد تانية أصلًا، وهو ده اللي عمله «شامي» بأنه حافظ على الشكل والمضمون السوري، الشكل من حيث تصميم المحل من الداخل والفواصل اللي حاططها بين الترابيزات علشان الخصوصية، يعني وأنت قاعد بـ تأكل في صالة الطعام اللي في الدور الثاني من المحل هـ تحس أنك قاعد لواحدك في المطعم لأنك مش هـ تشوف حد ولا حد هـ يشوفك، وهنا نظام الخدمة غريب شوية على المطاعم من النوع ده، اخدم نفسك بنفسك، أطلب الأوردر من عند الكاشير في الدور الأرضي وأطلع انتظره فوق في الصالة، مافيش جرسون هـ يجيبلك أي حاجة بعد ما تقعد، زي مطاعم أمريكانا كدة.

المنيو فيه مشاوي سورية وشاورما ودجاج بروستد وعرايس ومقبلات شامية ساخنة وباردة، وفيه منيو للمشروبات والحلويات والكريب. الأكل هنا روعة، جربنا وجبة ميكس جريل فيها كل حاجة مشوية ممكن تلاقيها في المطعم وسعرها 45 جنيه، والكميات فيها كبيرة ومعاها سلاطات وحمص وأرز بسمتي وبطاطس مسيَّحة شامية بجانب الكفتة (اللي هو اسمه كباب في المطبخ السوري) وشقف اللحم (وهي مكعبات كباب على الطريقة السورية) وشيش طاووق ودجاج مشوي وكفتة دجاج. وجبة ممتازة ومشبعة وسعرها كويس، وأحلى ما فيها كان مكعبات اللحم المشوي (الشقف) اللي ما شوفناش في حلاوتها في أي مطعم سوري في القاهرة. وطلبنا طبق تبولة (5 جنيه) وكانت مزِّة ولذيذة. ساندويتش شاورما اللحم (14 جنيه) في عيش سوري ملفوف كان طعم الشاورما فيه فعلًا مختلف، شاورما سوري مالهاش أي علاق بالساورما اللي بـ نأكلها في مصر، مع الثومية والحمص كانت حكاية. والمفاجأة بعد وجبتنا لما طلبنا من منيو المشروبات المتنوع اللي فيه أي حاجة ممكن تلاقيها في أي كافيه، طلبنا كوكتيل اسمه سي بريز (11 جنيه) فيه مجموعة فواكه استوائية مخلوطة بالصودا وسيرب الفراولة وقطع الثلج، المفاجأة كانت في المذاق الرائع رغم عدم التخصص في الكوكتيلات، لكن بعد ما جربنا المشروب ده آمنا خلاص أنهم متخصصين ونص، وكل حاجة بـ تتعمل هنا بـ تتعمل بضمير.

حبينا مطعم «شامي فوود» وعجبنا سرعة الخدمة وتنوع الأصناف وإخلاصه الشديد لكل ماهو سوري، وأكيد هـ يبقى لنا زيارات تانية هنا قريب.

نصيحة 360

فيه خدمة توصيل وكاترينج للمناسبات.

أحسن حاجة

شقف اللحم..أو الكباب السوري.

أسوأ حاجة

موضوع "اخدم نفسك بنفسك" ده مش منطقي ومش مناسب للنوع ده من المطاعم.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح