The Definitive Guide to Living in the Capital , Cairo , Egypt

مطاعم
شاورما الريم

شاورما الريم: ساندويتشات وفتة ومقبلات شامية في المعادي

  • 29 شارع النصر
  • لبناني,مأكولات سريعة
تم التقييم بواسطة
Waleed Abuarab
قيم
قيم الآن
شاورما الريم: ساندويتشات وفتة ومقبلات شامية في المعادي

أول مرة نجربه كانت في فرع مصر الجديدة الموجود في ميدان سانت فاتيما، كان
أحسن ميزة فيه أن الدليـﭭري بتاعه سريع والأكل بـ يوصل سخن. ما كناش نعرف حتى المحل
شكله إيه لأنه تعاملنا كله كان من خلال التليفون. عرفنا بعد كده أن المطعم أردني
وأنه متخصص في الشاورما والفلافل على الطريقة الشامية، وبدأنا نشوف فروع كثير له
في مدينة نصر والمهندسين وأخيرًا في المعادي الجديدة في شارع النصر.

فرع «شاورما الريم» اللي في شارع النصر مساحته صغيرة زي باقي فروع المحل
اللي شفناها في كل حتة، تقريبًا الاعتماد الأكبر على التيك آواي وتوصيل الطلبات
للمنازل. طلعنا كام درجة سلم وقعدنا على ترابيزة فيما يشبه تراس خارجي للمحل، بس
القعدة كانت حلوة علشان كنا بـ نتفرج على الشارع والأهم أنها مش حر زي القعدة
داخل المحل.

المكان نظيف وبسيط ومثالي لأكلات سريعة وساندويتشات، مش للقعدة أوقات طويلة أو للمجموعات الكبيرة، اللي غالبًا بـ تفضل أنها تأخذ أكلها وتقف تأكل أمام المحل.
المنيو بسيط ومافيهوش غير ساندويتشات وأطباق الفتة، الساندويتشات هي شاورما اللحم
والدجاج والفلافل والشابرجر (برجر بتتبيلة الشاورما، اختراع المحل يعني) وكفتة
شاورما، وفيه حجمين للساندويتشات وهم الوسط والكبير بأسعار من 6 لـ 15 جنيه. الفتة
بالأرز الأبيض أو البسمتي بسعر 22 جنيه، وفيه أطباق شرائح شاورما بصوص المشروم أو
البيبر صوص أو الكاري بنفس السعر. وممكن تطلب وجبات عائلية لـ 4 أفراد بسعر 76
جنيه أو شاورما بالكيلو (120 جنيه) أو كفتة شاورما بانيه بالكيلو (100 جنيه).
والمقبلات الشامية المعروفة زي السمبوسك والكبيبة وورق العنب والثومية والبطاطس
بالشاورما بأسعار من 4 لـ 12 جنيه للطبق.

سخننا بالسمبوسك بالخضروات (5 قطع بـ 8 جنيه) كانت معقولة بس غرقانة زيت،
والثومية كمان (2 جنيه للحجم الصغير) كانت خفيفة شوية وناقصها شوية طعم. بس
الأطباق الرئيسية كانت عكس المقبلات تمامًا، وعجبنا جدًا فتة الشاورما الميكس
بالزبادي (22 جنيه) واللي بـ ينزل معاها صوص الطماطم الأحمر الحار أو اللي بـ يسموه
(سلاطة إسكندر) وكمية الفتة كانت كويسة والعيش اللي فيها محمص ولذيذ والشاورما كلها
لحم صافي مش فيه أي دهون. نفس الكلام في طبق شاورما اللحم بصوص المشروم البني (22
جنيه) اللي بـ ينزل معاه أرز أو بطاطس محمرة. الخلط كان حلو بين الشاورما المشوية
على الجريل والصوص السميك وقطع المشروم اللي أخذت رائحة الشواء من الشاورما، بس
مشكلة الطبق ده أن الكمية فيه قليلة وما يشبعش فرد واحد لو كان جعان قوي. يعنى هـ
تحتاج تطلب جنبه عيش صاج أو طبق كبيبة كده ع الماشي.

فيه وجبة كومبو للأطفال بسعر 13 جنيه، والمشروبات هنا غازية بس، والحلو
المكتوب في المنيو (أرز باللبن وأم علي) مش موجود بالفعل في المحل وممكن تعمل أي إضافات على الساندويتش بتاعك من الموتزاريلا أو البطاطس أو الصوصات بإضافة جنيه أو
3 جنيه لسعر الساندويتش.

الخدمة هنا سريعة والمكان ظريف والأكل بـ يُقدم بطريقة نظيفة وعملية، وفيه
حمام في المكان، صحيح هو مشترك رجالي وحريمي بس معتنى به كويس. «شاورما الريم»
أكله حلو وميزته في سرعة الخدمة والطعم الشامي الأصيل من غير تفاصيل مالهاش لازمة.
هـ يعجبكم طعمه بالمقارنة بأسعاره.

نصيحة 360

الدليـﭭري بتاعه سريع، وفيه Wi Fi داخل بعض الفروع.

أحسن حاجة

الأكل هنا خفيف، يعني مش بـ يلكم زي مطاعم ثانية، وده معناه أن اللحم نفسه خالي من الدهون تقريبًا.

أسوأ حاجة

منيو المقبلات ناقصه كثير من المشهيات الشامية زي التبولة والفتوش والحمص.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح