The Definitive Guide to Living in the Capital , Cairo , Egypt

مهما رحنا أماكن كتير، يفضل شارع 9 في المعادي له بريقه ومميزاته. رغم زحمته. والمرة دي هننقل لكم تجربتنا في مطعم “شباك حبيبي”.

المكان مميز وفيه 3 مناطق تقدر تقعد فيهم. مساحة خارجية على الشارع، ودي موجودة بالليل بس. ومساحة تانية مكيفة ومغلقة بالكامل. ومكان أخير متقفل ومكيف ولكن مفتوح على الشارع، والشارع كله مكشوف لكل الموجودين. الديكورات مختلفة ومميزة، وهتلقى هناك الكنب والكراسي الخشب والبامبو الحديث. الخدمة عندهم ممتازة جدًا.

طلبنا من عندهم بيف هاوس(198 جنيه). ده عبارة عن خضار سوتيه وبطاطس محمرة، مع قطعتين بيف وعليهم جمبري، أيوة بالجمبري والله. وكان طعمهم تحفة. البيف مختلف في الطعم وله نكهة مميزة، وده تقريبًا لاستخدامهم الخضرة في تسويته. الجمبري رغم إنه قطعتين فقط لكن الطعم كان ممتاز.

طلبنا كمان سلطة فتوش (49 جنيه). ودي مجموعة من الخضروات المختلفة، المخلوطة بدبس الرومان. كانت حلوة جدًا. وكمان أخدنا مقبلات برينج رول (54 جنيه). محسيناش بالحشو بتاعها الحقيقة ولكن كانت مقرمشة حاجة بسيطة. وسمبوسك جبنة (39 جنيه). كانت محشية بخضرة مع الجبنة، ومعمولة صح في تقفيلها وتحميرها وظبطها.

كمان كان من ضمن الأوردر طاجن المصري (112 جنيه)، وبينزل معاه أرز. بييجي في طاجن متقفل بعيش مخبوز ومتسوي عليه من فوق، وفيه صوص معرفناش هو إيه للأسف. لكن نعتقد إنه مزيج من دبس الرومان وزيت الزيتون وخلافه. مُطعم بالخضار السوتيه، ولحمة عجالي. للأسف كان طعم اللحمة سيء جدًا، ومش هنقتنع أنها بلدي لأنها كانت تقيلة في المضغ. كمان مستوية زيادة عن اللزوم، وبلغة الطباخين نقول إنها كانت منسرة.

وتقدروا كمان تشربوا من عندهم مشروبات كتير، إحنا شربنا شاي (20 جنيه). من أفضل أنواع الشاي اللي ممكن مكان يقدمها. وقهوة (24 جنيه). البن بتاعهم حلو جدًا. المكان متاح فيه تدخين الشيشة بالمنطقة الخارجية. طبعًا الأسعار غير شاملة الضريبة والخدمة، ومفيش تنويه بده فخلوا بالكم. صفحتهم على فيسبوك.