The Definitive Guide to Living in the Capital , Cairo , Egypt

لو استثنينا عدد بسيط من مطاعم القاهرة، صعب تلاقى أكلة صينية محترمة فى العاصمة. من العملاق الفندقى جى دبليو ماريوت، فندق رينسانس الجديد فى القاهرة الجديدة بـ يقدم لك “شينوا – Chinoix” مطعم أسيوى فاخر بـ يقدم أكلات صينية بجد. بالنسبة لتصميمات الفندق والمطعم فعلاً تحفة مع لمسة معاصرة رائعة.

أبواب مزدوجة حمراء لها مقابض ذهبية تطل على اللوبى المفتوح، بـ توصلك لمكان الأكل الأسيوى الشكل. أثاث خشبى غامق، زخارف وقعدة لونها متناقض بين الرمادى والأحمر، كلهم بـ يضفوا على المكان جو من الطقوس الأسيوية التقليدية. لسه مكملين مع الشرق الأقصى وحكاياته بقطع فنية تزين المكان مع مزيكا أسيوية وملابس حريرية للموظفين. فى حين أن نصف المحل تحسّه غامق بسبب الألوان، النصف الثانى مضئ ومنعش، بإطلالة كاملة على حمام السباحة الخاص بالفندق.

منيوهات من الجلد الأحمر فيها مجموعة من الأطباق الصينية الشهيرة؛ مقبلات متنوعة زى dim sum بأسعار من 12 لـ 30 جنيه وأصناف من الشوربة (55: 95 جنيه)، أطباق مأكولات بحرية (135: 230 جنيه)، طيور (140: 280 جنيه)، لحم أحمر (90: 210 جنيه) وخضروات (40: 50 جنيه) بجانب تشكيلة من الأرز أو النودلز (25: 40 جنيه).

شينوا بـ يقدم كمان مشروبات غازية (20: 25 جنيه)، عصائر (25: 28 جنيه)، ليمون (25 جنيه)  وشاى مثلج (25 جنيه). الليمون كان لذيذ باللسعة المنعشة، بس ينقصه فقاعات الليمون  الشهيرة، وبالتالى كان عبارة عن مجرد عصير ليمون طازج. الشاى المثلج الخاص بهم للأسف كان غير متاح، ومتوفر منه معلبات فقط.

ندخل على الشغل الثقيل، طبق من ثلاثة أنواع مقليات لذيذة وصلت ترابيزتنا. طعم الثلاثة كان روعة مع أنهم كانوا باردين شوية، وأجمد اثنين من وجهة نظرنا هما الجمبرى الكريسبى وقطع الفلفل الحلو بالزبدة. بعد شوية ظهرت بشاير المقبلات وبرضه كانت حكاية، مع سبرينج رولز الجمبرى (65 جنيه) الملفوفة بامتياز ومقلية للون الذهبى الغامق. فطيرة الخضروات بالبخار (32 جنيه) عبارة عن قطع طرية من الخضروات، ورغم أن شكلهم بـ ينطق بالأصالة، كان واضح أن مستواه ضعيف والسبب هو سعره.

فى البداية، بالنسبة للأطباق الرئيسية طلبنا نصف بطة مشوية مع بان كيكس (160 جنيه)، لكن عرفنا أنها بـ تحتاج ساعة ونصف كاملين للتحضير.

الأطباق اللى طلبناها كانت لحسن حظنا تكملة للإبهار مع الكميات الكبيرة والنكهات الخرافية. قطع لحم الضأن المقلية (210 جنيه) كانت طرية جدًا، مع صوص فلفل ثقيل القوام. الكريسبى تشيكن بصوص الليمون (140 جنيه) من جديد كان رائع بطعم مسكر مميز، مذاقه بـ يدوم لبعد الأكل، ويكمله صوص الليمون الشهى بقوامه السميك. ننصح وبكل شدة الجمبرى الحلو/ الحادق بالأناناس الطازج (165 جنيه)، وده فى الحقيقة سببه أن الجمبرى الكبير العصاري معاه كمان تشكيلة من الخضروات والأناناس الطازج زى ما الكتاب بـ يقول، غطسانين فى صوص حلو/ حادق لذيذ متماسك القوام. الأزر المبهر (25 جنيه) كمّل وبشدة كل الأطباق، ونفس الكلام عمله طبق النودلز المسلوقة (40 جنيه) المقدمة مع قطع كثيرة من اللحم العصاري.

نروح للحلو، اللى طلبنا منه توفى الموز اللذيذ (50 جنيه) بس أحبطنا بعد ما شوفنا قطعتين موز صغيرين عليهم طبقة خفيفة والغريب أن ينقصه كمان الطعم المسكّر.

رغم أنها كانت أكلة مكلفة، شينوا بـ يقدم واحدة من أروع وألذ التجارب الصينية اللى جربناها فى القاهرة، المطعم كمان يتميز بالقعدة المريحة، ويعتبر مكان ممتاز للمناسبات الخاصة.