The Definitive Guide to Living in the Capital , Cairo , Egypt

مطاعم
صاج وشاورما

صاج وشاورما.. ملتقى عشاق الأكل السوري في المنيل

أكل سوري صاج وشاورما محلات شاورما في القاهرة مطاعم في المنيل منيو صاج وشاورما
  • 85 شارع المنيل الرئيسي، محطة الغمراوي، المنيل.
  • سوري
  • 09:00 - 23:59
تم التقييم بواسطة
Cairo 360
قيم
قيم الآن
صاج وشاورما.. ملتقى عشاق الأكل السوري في المنيل

رنا شرف

الشاورما السوري لها عشاق كتير في القاهرة، حقيقة ماحدش يقدر ينكرها، علشان كده كل فترة بنحب نجرب مطعم سوري في العاصمة المصرية، والمرادي قررنا نروح “صاج وشاورما” فرع المنيل، اللي اكتشفنا هناك إنه الملتقى الرسمي لكل عشاق الشاورما السوري.

المطعم بيقدم شاورمات مختلفة، لحمة وفراخ، وعندهم كذا نوع من أنواع الفتة وكمان بيقدموا مناقيش وأكلات تانية.

المكان من حيث الديكور مش مميز، والصالة اللي فيه مافيهاش حاجة مختلفة، مجرد ترابيزات وكراسي وخلاص، ونقدر نقول إنه مناسب لخروجات الشباب والأصحاب أكتر من الخروجات الرومانسية أو العائلية.

أول انطباع هتاخده عن المكان لما تروحه هو إنه زحمة، ورغم إن ده دليل على إن المكان حلو وناجح، لكنه كمان بيدل على إن المطعم مش مناسب للناس اللي عاوزة مكان هادئ تفصل فيه شوية من ضغوطات الحياة.

نيجي بقى للأكل، أول صنف جربناه هو شاورما الفراخ، وده سعر الحجم الكبير منه 32 جنيه، كمان جربنا شاورما اللحمة، ودي سعرها 38 جنيه، لكن بصراحة الفراخ أجمد بكتير من اللحمة، معمولة حلو ومظبوطة في التسوية.

جربنا كمان فتة الفراخ واللحمة، وسعر فتة الفراخ 55 جنيه، أما سعر فتة اللحمة 61 جنيه، وعجبنا قوي إن قطع الفراخ واللحمة كانت كتير وطعمها حلو، لكن بنتصور إن الطبق كان هيبقى أجمد لو كان العيش أكتر، وكمان الأرز كان محتاج يكون متبهر أكتر. لكن بشكل عام التجربة كانت معقولة وعجبتنا.

جربنا كمان البطاطس، اللي المطعم مصمم إن اسمها هو البطاطس السوري، رغم إنها بطاطس عادية لكنها فقط محطوط عليها ثومية! وفعلًا البطاطس طعمها حلو، وسعرها 17 جنيه، وده سعر معقول جدًا بالنسبة للكمية.

صاج وشاورما له فروع كتير، بس إحنا حبينا فرع المنيل أكتر.

تجربتنا في المكان كانت إيجابية بدرجة كبيرة، وأكيد هنكرر الزيارة تاني وتالت.     

نصيحة 360

عندهم خدمة دليفري على: 01100256460

أحسن حاجة

شاورما الفراخ

أسوأ حاجة

الزحمة!

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح