The Definitive Guide to Living in the Capital , Cairo , Egypt

صبحي

صبحي: مشويات مثالية في مصر الجديدة

  • 157 شارع جسر السويس
  • مصري
  • 0226340539,0226322024
written by
Waleed Abuarab
قيم
قيم الآن
صبحي: مشويات مثالية في مصر الجديدة

في شارع جسر السويس وقريب قوي من ميدان التجنيد موجود
كبابجي عريق بقاله أكثر من 40 سنة، من علامات مصر الجديدة لما نتكلم عن الكباب
والكفتة. «رستوران صبحي الحاتي» زي ما مكتوب على المنيو اسم له تاريخ لكل سكان مصر
الجديدة والمناطق اللي حواليها. مبنى شيك مكون من 3 أدوار ومكتوب عليه من الخارج
باللون الذهبي والخط العربي الكلاسيكي «صبحي».

من على الباب بـ يقابلك أحد المضيفين بالزي الرسمي اللي
العاملين كلهم لابسينه وبـ يوجهك لمكان تقعد فيه حسب عدد الأفراد، وده بـ يبقى في
الدور الثالث لأن الدور الأول مخصص لاستراحة الزبائن اللي بـ تطلب تيك آواي،
والدور الثاني عبارة عن كوفي شوب لو عاوز تطلب مشروبات فقط وهو مجهز بكراسي جلد
ضخمة وقعدات مريحة. في صالة الأكل الترابيزات شبه كل محلات الكباب المعروفة زي «فرحات»
و«هوليدايز» و«الفقير». والديكورات تقليدية جدًا لكن الجدران والسقف فيهم بعض
اللمسات الجمالية وزخرفات كلاسيكية ظريفة، والإضاءة هادئة والمكان عمومًا مريح
للأعصاب ويساعد على الاستمتاع بالأكل.

منيو محدد مكون من صفحتين، واحدة باللغة العربية
والثانية بالإنجليزية، الاختيارات مش هـ تخرج عن كباب وريش وكفتة وطرب وحمام وفراخ
وموزة بالفتة وممبار. والأطباق الجانبية فيها أرز بالخلطة ومحشي مشكل وورق عنب
وأطباق خضار. ومنيو سلاطات ومخللات. كيلو كباب صافي بـ 140 جنيه، كفتة بـ 120
جنيه، الريش بـ 160 جنيه والممبار 80 جنيه وكل اللحوم في المحل ضاني مافيش بتلو
خالص والأسعار دي بـ تزيد 10 جنيه لما بـ تطلب الأكل دليفري علشان بـ يضيف عليها
ثمن السلاطات والعيش. والفرخة المشوية 50 جنيه والحمام بـ 30 جنيه وأي طبق سلاطة
بـ 4 جنيه، ومكتوب في المنيو أن فيه فتوش وتبولة وثومية لكن للأسف ما كانتش موجودة
وقت زيارتنا للمطعم.

بدأنا بطبق ورق عنب (10 جنيه) كمشهيات، كان ساخن مش بارد
لحسن الحظ، لكن الكمية كانت قليلة قوي، بس فعلًا فتح نفسنا هو وسلاطة الطحينة
الرائعة اللي عاملة زي الكريمة وطبق السلاطة الخضراء المميزة لمحلات الكباب بشرائح
البصل الرفيعة الطويلة وحلقات الفلفل الحار. وكالعادة خلصنا كل المشهيات قبل ما
اللحوم تنزل وطلبنا طقم سلاطات غيرها. جربنا كيلو مشكل فيه كباب وكفتة وطرب وكان
أحلى حاجة فيه الكباب اللي كان مش فيه ولا حتة دهن وكان مستوي كويس جدًا واللحم
طازج ولونه خطير. الطرب كان كويس بس دسم شوية والكفتة نقدر نقول أنها كانت عادية أو
مش فيها أي حاجة مميزة، خاصة حجمها كان أكبر من اللازم ومش شاربة الطعم قوي. يعني
الكباب كان نجم الوجبة بلا منازع، بالذات مع الطحينة العبقرية بتاعتهم.

الخدمة سريعة والمكان نظيف جدًا وخصوصًا الحمامات، كان
فيه مشكلة بس في الشيك لما طلبناه وكان مضاف عليه حاجات إحنا مش طالبينها، وكان
ممكن نحاسب عليها لو ما كناش أخذنا بالنا! لكن المتر رجع أخذ الشيك وصححه بسرعة.

«صبحي» الحاتي من أهم مطاعم الكباب والمشويات في مصر
الجديدة، بـ يقصده كثير من المشاهير والنجوم وسمعته هي سر نجاحه، لازم تجربه لو
كنت بـ تفكر تأكل كباب وكفتة وأنت في مصر الجديدة.

نصيحة 360

بجانب توصيل الطلبات للمنازل، المطعم مستعد لتجهيز واستضافة الحفلات، وأبوابه مفتوحة لحد 5 صباحًا.

أحسن حاجة

الكباب الصافي لا يعلى عليه.

أسوأ حاجة

غلطة الشيك كانت مريبة وغير مقبولة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح